Read KIMERU BIBLE PROTESTANT EDITION 2Ane 23 Bible Online

2Ane 23 - KIMERU BIBLE PROTESTANT EDITION bible

2Ane 23

¹Josia mûnene nî aatûmanîîre atongeeria bonthe ba Juda na ba ntûûra ya Jerusalemu.

²Mûnene areetania nabo kîûrûûne amwe na antû bonthe, na athînjîri-Mûrungu, na iroria. Mûnene arabathomera na kajû Yuku rîonthe rîa kîrîkanîro rîrîa rîaarî rîkwonwa kîûrûûne.

³Nawe mûnene ararûngama gîtugîîne areekanîra kîrîkanîro na MWATHANI atî akaathîkagîra MWATHANI, na oojûragie maathana jaawe, na athingatage Waatho bwaawe na nkoro yaawe yonthe na mwoyo jwaawe junthe. Ningî atî akaathithagia ûrîa kîrîkanîro kîu kîaugaga o ta ûrîa kîaandîki yukuune rîu. Nabo antû bonthe bareeka wîrane bwa kwathîkîra kîrîkanîro kîu.

⁴ Mûnene Josia nî eerîre Hilikia mûthînjîri-Mûrungu ûrîa mûnene, na athînjîri-Mûrungu, na akaria ba mwari jwa kîûrû barite kuuma kîûrûûne into bionthe birîa biaatumagîrwa kûthaathayia Baali, na mûrungu jwa mûka jwa Ashera, na njota. Mûnene arabiîthîria oome ya ntûûra ya Jerusalemu akuî na kîguuru gîa Kidironi. Naju mûju jwaabio jûrakamatwa jûraikua ntûûreene ya Betheli.

⁵Ningî nî eengîre athînjîri-mîrungu ya mîng'uanano barîa baathuuri nî anene ba Juda nîkenda bamîritagîra igongwana iritîroone bia mîrungu îîu birîa biaarî ntûûreene ya Juda, na birîa biaathiûrûkîrîte ntûûra ya Jerusalemu. Aracoka arenga athînjîri-mûrungu bonthe barîa baaritaga igongwana nîûntû bwa kûthaathayia Baali, na riûa, na mweri, na njota cionthe.

⁶Ningî nî aaritîre gîtugî kîa mûrungu mûka jûrîa jweetagwa Ashera, kuuma kîûrûûne. Arajuumagaria oome ya ntûûra ya Jerusalemu, arajwîthîria Kîguuruune gîa Kidironi. Aracoka aranyagia mûju jwa gîtugî kîu mbîrîreene cia antû barîa bataarî îgweta.

⁷Ningî nî aatharîrie tûnyomba twa aringi maraya ba arûme tûrîa twaarî kîûrûûne. Kûu nîku aka baatumagîra ndwambaambio cia gûtumîra rîrîa bakûthaathayia Ashera.

⁸Josia nî aaritîre athînjîri-mûrungu bonthe kuuma ntûûreene cia Juda kuuma nthîgûrûûne kunthe arabaikia Jerusalemu. Aracoka arathûûkangia iritîro bia igongwana birîa baatumagîra bakîrita igongwana, kuuma ntûûreene ya Geba mwanka Beerisheba. Arathûûkangia iritîro bia igongwana birîa biaarî akuî na mpingîro îrîa yaaki nî Joshua ûrîa waarî mûrûngamîîri wa ntûûra. Iritîro biu bia igongwana biaarî rûteere rwa ûmotho rwa mpingîro ya ntûûra na biatumagîrwa kûthaathayia Nkoma cia mbûri.

⁹Athînjîri-Mûrungu bau baariti ntûûreene cia Juda na nthîgûrûûne kunthe gûtumîka kîûrûûne, îndî nî beetîkagîîrua kûrîa mîgaate îtiimbithîtue amwe na athînjîri-Mûrungu bangî.

¹⁰ Ningî mûnene Josia nî aathûûkangîrie gûntû kûrîa kwaaritagîrwa igongwana nîûntû bwa mîrungu ya mîng'uanano, kûrîa gweetagwa Tofethi, Gûntû kûu kwaarî kîguuruune kîa ataana ba Hinomu. Aathûkangîrie gûntû kûu nîkenda antû batiga kûritîra mûrungu jwa Moleki aana baao barî igongwana bia gwakîîria.

¹¹Ningî nî aaritîre mbarathi mwariine jwa kîûrû irîa cieeki nî anene ba Juda nîûntû bwa kûthaathayia mûrungu jwa riûa. Mbarathi iu cieeki akuî na kanyomba ka mûtongeeria ûmwe weetagwa Nathani-meleki. Josia aracoka araîîthia ngaarî cia ndwaa îria ciatûmagîrwa kûthaathayia mûrungu jwa riûa.

¹² Mûnene Josia nî aathûkangîrie iritîro bia igongwana birîa anene ba Juda baakîte îgûrûgûrû rîa gîkaro kîa mûnene Ahazi. Aracoka arathûkangia iritîro bia igongwana birîa mûnene Manase aakîte biaragoone bio-biîrî bia kîûrû. Rîu arathetheranga iritîro biu bia igongwana arabigera Kîguuruune kîa Kidironi.

¹³ Ningî mûnene Josia nî aathûûkangîrie iritîro bia igongwana birîa mûnene Solomoni aakîte bwa gaiti ya Jerusalemu na biaarî bwa ûmotho bwa kîrîma kîa Mizeituni. Au nîo kwathaathagîrua mîrungu ya mîng'uanano tayo: mûrungu jûmûûî jwa mûka jûrîa jweetagwa Ashitarothi jwa nthîgûrû ya Sidoni, na Kemoshi, mûrungu jûmûûî jwa nthîgûrû ya Moabu, na Moleki, mûrungu jûmûûî jwa nthîgûrû ya Amoni.

¹⁴Josia aracoka arathûkangia itugî bia maiga na bia mbaaû birîa biaathithîtue birî mûrungu mûka jûrîa jwîtagwa Ashera. Au itugî biu biaarî kûrakunîkwa na marûitû ja antû.

¹⁵ Ningî Josia nî aathûûkangîrie kîritîro kîa igongwana kîrîa gîaaki ntûûreene ya Betheli nî mûnene Jeroboamu mûtaana wa Nebati, ûrîa waatûmîre Israeli îtonya meeyiene. Arakîthetheranga, araaragania maiga jaakîo, arakîthiaa kîraa mûtu. Aracoka araîîthîîria gîtugî kîrîa gîatumagîrwa kîrî mûrungu mûka jweetagwa Ashera.

¹⁶ Rîu mûnene Josia araciûkia meetho aroona mbîrîra irîa ciaarî kîrîmeene. Aratûmana, marûitû jararitwa mbîrîreene iu, nawe arajaîthîria kîritîroone kîa igongwana. Tontû bûû, areekîra kîritîro kîa igongwana mûgiro ta ûrîa kwaroreetue nî kîroria kîmwe karaaja.

¹⁷ Josia aracoka arooria, “Nî yaaû mbîrîra îîrîa?” Nabo antû ba ntûûra ya Betheli baramûcokeria baramwîra atîrî, “Nî mbîrîra ya kîroria kîrîa kîaumîte Juda kîraroria mantû jau wathithîria kîritîro kîa igongwana kîa Betheli.”

¹⁸Josia arauga atîrî, “Bûkáringithia mbîrîra îîu kana bûringithia marûitû jaawe.” Tontû bûû, baratigana na marûitû jau amwe na marûitû ja kîroria kîngî kîaumîte Samaria.

¹⁹Josia nî aathûûkangîrie irombero bia kûthaathagîria mîrungu ya mîng'uanano birîa biaaki nî anene Israeli ntûûreene cionthe cia Israeli nîûntû nî biaathûûrîîtie MWATHANI. Josia aabithûûkangîrie o ta ûrîa aathithîrîtie bia ntûûra ya Betheli.

²⁰Josia nî ooragîîre athînjîri-mîrungu ya mûng'uanano bonthe, iritîroone bia igongwana, kûrîa athînjîri-mîrungu bau baatumîkaga. Aracoka araîîthîîria marûitû ja antû iritîroone biu bia igongwana.

²¹“Mûnene Josia nî eerîre antû bonthe bathithie mambura ja Pasaka nîkenda bakumia MWATHANI Mûrungu waao o ta ûrîa kwaandîki yukuune rîu rîa Kîrîkanîro.”

²²Naku gûtaarî gûkûthithua mambura jangî ja Pasaka ta jau nî anene ba Israeli kana Juda kuuma rîrîa agambi baathanaga.

²³Îndî nandî mwakeene jwa îkûmi na înaana jwa waathani bwa mûnene Josia, nîrîo mambura jau ja Pasaka ya MWATHANI jaathithîrue ntûûreene ya Jerusalemu.

²⁴Nkûrûki, Josia nî aathirîrie aringia na barîa boonagîra antû mantû, na arogi, na antû barîa baranagîria na roho cia antû barîa baakuîre, na mîrungu ya mîng'uanano, na into birî mûgiro bionthe birîa biaatumagîrwa kûthaathayia mîrungu ya mîng'uanano, kuuma nthîgûrûûne ya Juda na ntûûreene ya Jerusalemu. Aathithîrie ûu nîkenda oojûria Waatho bûrîa bwaandîki yukuune rîrîa Hilikia mûthînjîri-Mûrungu ûrîa mûnene ooneete kîûrûûne,

²⁵Gûtaarî gûkwoneka mûnene ûngî tawe mbereene, ûrîa watumîkagîra MWATHANI na nkoro yaawe yonthe, na mwoyo jwaawe junthe, na inya yaawe yonthe, akîathîkagîra Waatho bunthe bwa Musa. Nyuma yaawe gûtooneka mûnene ûngî tawe.

²⁶Amwe na jau, MWATHANI nî aathûûri nîûntû bwa Juda na nîûntû bwa mantû jarîa mûnene Manase aathithîtie.

²⁷Tontû bûû, MWATHANI arauga atîrî, “Nkeebia antû ba Juda baume kîrî ni, o ta ûrîa ndeeberie antû ba Israeli. Ningî nkaathiria ntûûra ya Jerusalemu na nthirie kîûrû kîrîa ndaaugîîte nîku nkaathaathagîrua.”

²⁸Najo mantû jangî jonthe jarîa mûnene Josia aathithîrie nî jaandîki yukuune rîa ngono cia anene ba Juda.

²⁹O mûnene Josia akîathanaga, Farao Neko mûnene wa Misri nî eetîre mûuroone jwa Eufurate arî na njûûrî yaawe gûteetheeria mûnene wa Asîria. Mûnene Josia nî eetîre kûrwaa na njûûrî ya Farao Neko ntûûreene ya Megido, îndî Josia arooragîrwa ku.

³⁰Nabo atongeeria ba njûûrî ya Josia nî baajûkîrie mwîrî jwaawe barajwîkîra ngaarîîne ya ndwaa barajûcokia Jerusalemu, baramûthika mbîrîreene cia anene. Nabo antû ba Juda nî baathuurîre Jehoahazi mûtaana wa Josia, baramwîtûûrîria maguta, baramweethia mûnene.

³¹Jehoahazi aarî na ûkûrû bwa mîaka mîrongo îîrî na îthatû rîrîa aaere mûnene wa Juda. Aathanîre mîeri îthatû arî Jerusalemu. Ng'ina eetagwa Hamutali, na aarî mwarî wa Jeremia kuuma ntûûreene ya Libuna.

³²Nî aathithîrie mantû jamathûûku mbere ya MWATHANI o ta jarîa biûjûjû biaao biaathithagia.

³³Farao Neko nî aamûtheekere ncheera ntûûreene ya Ribula nthîgûrûûne ya Hamathi nîkenda atîkaathane arî Jerusalemu. Ningî Farao Neko nî aaritithagia nthîgûrû ya Juda ûgoti bwa Kilo ngiri ithatû cia magana jana (3,400) cia fetha na kilo mîrongo îthatû na inya (34) cia thaabu.

³⁴ Farao Neko nî aaeetherie Eliakimu mûtaana wa Josia mûnene wa Juda. Ningî aragarûra riîtwa rîa Eliakimu aramwîta Jehoiakimu. Farao Neko arajûkia Jehoahazi aramwikia Misri, nawe Jehoahazi arakuîra ku.

³⁵Jehoiakimu nî oothûranagia ûgoti kuuma kîrî antû ba Juda, kûringana na ûrîa o muntû aarî na ûtonga bûng'ana. Aathithagia ûu nîkenda ang'ania mbeecha irîa ciendekaga cia kûrîaa Farao Neko mûnene wa Misri ûgoti.

³⁶ Jehoiakimu aarî na ûkûrû bwa mîaka mîrongo îîrî na îtaano rîrîa aaere mûnene wa Juda. Nî aathanîre mîaka îkûmi na jûmwe arî Jerusalemu. Ng'ina eetagwa Zebida na aarî mwarî wa Pedaia wa kuuma ntûûreene ya Ruma.

³⁷Jehoiakimu nî aathithîrie mantû jamathûûku mbere ya MWATHANI o ta ûrîa biûjûjû biaao biaathithagia.