Read KIMERU BIBLE PROTESTANT EDITION 2Ane 24 Bible Online

2Ane 24 - KIMERU BIBLE PROTESTANT EDITION bible

2Ane 24

¹ Rîrîa mûnene Jehoiakimu aathanaga, nîrîo Nebukadineza mûnene wa Babiloni aaithûkîîre Juda. Jehoiakimu areethîrwa arî waathoone bwa Nebukadineza mîaka îthatû. Îndî nyumeene ararega kwathîkîra Nebukadineza.

²MWATHANI nî aamûtûmîîre ikundi bia atuunyani bia antû ba Babiloni na ba Sîria na ba Moabu, na ba Amoni. Aabatûmîre nîkenda bathiria Juda kûringana na nteto cia MWATHANI irîa cieerani nî nthûûmba ciaawe iroria.

³Gûtî nkaanja nî MWATHANI waugîîte Juda îthithîrue mantû jau nîkenda amîînga yuma mbere yaawe nîûntû bwa meeyia jarîa jonthe mûnene Manase aathithîtie.

⁴Ningî aathithîrie mantû jau nîûntû bwa antû bateeîîtie barîa Manase ooragîte akoojûria Jerusalemu tharike. MWATHANI ateendaga kûrekanîra.

⁵Najo mantû jangî jonthe jarîa mûnene Jehoiakimu aathithîtie nî jaandîki yukuune rîa ngono cia anene ba Juda.

⁶Jehoiakimu nî aakuîre. Jehoiakini mûtaana waawe araa mûnene

⁷Mûnene wa Misri atauma nthîgûrû yaawe kaîrî eeta na njûûrî kwithûkanîra nîûntû mûnene wa Babiloni nî aarî akûjûkia gûntû kûrîa kwaarî kwa mûnene wa Misri kuuma mwankeene jwa bwa ûrîo jwa Misri mwanka mûuroone jwa Eufurate.

⁸Jehoiakini aarî na ûkûrû bwa mîaka îkûmi na înaana rîrîa aaere mûnene. Aathanîre mîeri îthatû arî Jerusalemu. Ng'ina eetagwa Nehushita mwarî wa Elinathani kuuma Jerusalemu.

⁹Nî aathithîrie mantû jamathûûku mbere ya MWATHANI athingatîte jarîa jonthe îthe aathithagia.

¹⁰Îgiiteene rîu, atongeeria ba njûûrî ba Nebukadineza mûnene wa Babiloni nî beetîre kwithûkîra Jerusalemu na baramîcîgîîria.

¹¹Nebukadineza mûnene wa Babiloni nî eetîre Jerusalemu îgiita o rîu atongeeria ba njûûrî yaawe baamîcîgîîrîîtie.

¹² Nebukadineza mûnene wa Babiloni nî aajûkîrie antû baba arabaeethia atae: Jehoiakini mûnene wa Juda, ng'ina wa Jehoiakini, na ataana ba Jehoiakini na atongeeria baawe ba njûûrî na barîa baamenyagîîra gîkaro kîa mûnene. Mûnene Nebukadineza aabajûkîrie barî atae mwakeene jwa înaana kuuma akwambîrîria kwaathana.

¹³Nebukadineza nî aajûkîrie into bionthe birîa biaarî mîthithûûne ya kîûrû, na bia gîkaro kîa mûnene, na arathûûkangia into bia thaabu bionthe birîa biatumagîrwa kîûrûûne, birîa Solomoni, mûnene wa Israeli aathithîtie. Mantû jau nîjo MWATHANI aaugîîte jagaakarîka.

¹⁴Ningî nî aajûkîrie antû bonthe ba Jerusalemu arabaikia kîthamîrioone. Nabo nî baarî amwe na ataana ba anene bonthe, na atongeeria ba njûûrî bonthe. Bonthe baarî antû ngiri îkûmi. Nî aathaamîrie kinya atea ba mîthemba yonthe, na aturi. Gûtî muntû waatigwa tiga nkîa.

¹⁵ Ningî Nebukadineza nî aajûkîrie mûnene Jehoiakini aramwikia Babiloni arî mûtae, amwe na ng'ina wa mûnene Jehoiakini, na aka baawe na atongeeria baawe ba njûûrî, na antû barîa baarî îgweta nthîgûrûûne îîu. Nebukadineza nî aabaritîre kuuma Jerusalemu arabaikia Babiloni.

¹⁶Nebukadineza nîwe waajûkîrie antû ngiri mûgwanja (7,000) barîa baarî îgweta, na atea na aturi, bonthe ngiri îmwe, na barî inya ya gwîta ndweene.

¹⁷ Ningî mûnene Nebukadineza nî aaeetherie Matania, îthe mwanake wa Jehoiakini mûnene wa Juda. Aracoka aramwaa riîtwa rîngî aramwîta Zedekia.

¹⁸ Zedekia aarî na ûkûrû bwa mîaka mîrongo îîrî na jûmwe rîrîa aaere mûnene wa Juda. Aathanîre arî Jerusalemu mîaka îkûmi na jûmwe. Ng'ina eetagwa Hamutali, na aarî mwarî wa Jeremia kuuma ntûûra ya Libuna.

¹⁹Nî aathithîrie mantû jamathûûku mbere ya MWATHANI, o ta jarîa jonthe mûnene Jehoiakimu aathithîtie.

²⁰ Mantû jau jonthe jaakarîkîte nîûntû MWATHANI nî aathûûrîtue nî antû ba ntûûra ya Jerusalemu na ba nthîgûrû ya Juda, mwanka arabeebia kuuma kîrî we. Zedekia mûnene wa Juda nî aareganîre na waatho bwa mûnene wa Babiloni.