Read KIMERU BIBLE PROTESTANT EDITION 2Ane 3 Bible Online

2Ane 3 - KIMERU BIBLE PROTESTANT EDITION bible

2Ane 3

¹Mwakeene jwa îkûmi na înaana jwa waathani bwa Jehoshafati mûnene wa Juda, Joramu mûtaana wa Ahabu nî aaere mûnene wa Israeli. Joramu aathanîre mîaka îkûmi na îîrî arî Samaria.

²Joramu nî eeîîrie MWATHANI, kinya këethîra ataathithia meeyia jamanene ta jarîa îthe na ng'ina baathithîtie. Nîkwîthîrwa we nî aagitangîre gîtugî kîa mûrungu jwa mûng'uanano taju Baali jûrîa îthe aathithîtie.

³Amwe na bûu, nî eetîre na mbere kûthithia meeyia atîgûtigana najo ta jarîa mûnene Jeroboamu mûtaana wa Nebati aatûmîte antû ba Israeli bathithia.

⁴Mûnene wa Moabu weetagwa Mesha, aarî mûrîîthi wa ng'ondu. Nî aaritagîra mûnene wa Israeli ûgoti bwa tûng'ondu ngiri îgana rîmwe (100,000) o mwaka na guee ya ntûrûme ngiri îgana rîmwe (100,000).

⁵Îndî Ahabu agûkua, mûnene ûu wa Moabu nî aaregere kwathîkîra mûnene wa Israeli.

⁶Tontû bûû, mûnene Joramu nî oothûranîrie njûûrî ya Israeli yonthe, arauma Samaria eetîte ndweene.

⁷Nî aatûmanîre kîrî Jehoshafati mûnene wa Juda aramwîra atîrî, “Mûnene wa Moabu akûrega kûmbathîkîra. Ûganteethia kwithûkîre Moabu?” Jehoshafati aramûcokeria, “Îî ngagûteethia, ûûni na antû baakwa na mbarathi ciaakwa.”

⁸Ningî mûnene Jehoshafati arooria atîrî, “Nî njîra îrîkû tûgeeta nayo?” Joramu aramwîra ûjû, “Tûgeeta na njîra ya rwanda rwa Edomu.”

⁹Tontû bûû, mûnene wa Israeli na mûnene wa Juda amwe na mûnene wa Edomu nî beetîre ndweene. Rîrîa beetîre rûgendo rwa ntukû mûgwanja nî baathirîîrwe nî rûûjî; antû baraaga rûûjî rwa kûnyua na kinya nyomoo iraaga.

¹⁰Mûnene wa Israeli arauga, “Tûkûthira! Tuuge MWATHANI aratwîtîte tuî anene bathatû nîkenda atûnenkanîra kîrî mûnene wa Moabu!”

¹¹Mûnene Jehoshafati arooria, “Gûtî kîroria kîa MWATHANI kîrî gûntû gûkû gîtûûrîria mantû kuuma kîrî MWATHANI?” Nayo nthûûmba îmwe ya mûnene wa Israeli îrauga atîrî, “Elisha mûtaana wa Shafati arî o. Elisha nîwe waatumîkagîra Elija.”

¹²Jehoshafati arauga, “Îî ûu nî kîroria kîa mma.” Tontû bûû, anene bau bo-bathatû bareeta kîrî Elisha.

¹³Elisha areera mûnene wa Israeli atîrî, “Nîmbi ûkwenda kîrî ni? Îta ûkoorie mantû kîrî iroria birîa abaagu na nyakwe booragia.” Îndî mûnene wa Israeli aramwîra, “Arî, MWATHANI nîwe ûtwîtîte baatuî tu-bathatû nîkenda atûnenkanîra kîrî mûnene wa Moabu.”

¹⁴Elisha nawe arauga, “Ga-ngûciîtia na MWATHANI Mweneinya ûrîa ntumîkagîra atî këethîra tî nthoni cia Jehoshafati mûnene wa Juda, ûûjû bûrî nawe, ntîgûtega kinya na meetho.

¹⁵Îndî nandî nî ndeeterwe mûringi wa wandîîndî.” Rîrîa mûringi wa wandîîndî aamîringîre, Elisha areejîîrwa nî inya ya MWATHANI,

¹⁶Nawe arauga atîrî, “Ûjû nîu MWATHANI akuuga, ‘Înjeeni mîtaro kîguuruune gîkî.’

¹⁷Tontû MWATHANI ariuga ûjû: ‘Kinya këethîra gûtîîthîrwa kûrî na ruuo kana ngai, mûguuru jûjû jûkoojûra rûûjî. Naabuî, amwe na ndîîthia cieenu na mbarathi cieenu bûkoona rûûjî rwa kûnyua.’

¹⁸Kau nî gaûntû kanini kîrî MWATHANI. Nawe agaatûma bûûmbe antû ba Moabu.

¹⁹Naabuî bûkoomba ntûûra irîa ciirigîri na nthingo cionthe. Ningî bûkaarîîka mîtî yaao ya matuunda yonthe, na bûthike ithima biaao, na bûthûûkangie miuunda yaao îrîa mînoru na maiga.”

²⁰Rûûneene thaa irîa kîgongwana kîa rûkîîrî kîaaritagwa rûûjî nî rweejîre kuuma bwa Edomu rûroojûra nthîgûrû kunthe.

²¹Rîrîa Amoabu bonthe baigîrue kûrî na anene beetîte kûbaithûkîra, nî boothûranîrie antû bonthe; kuuma ûrîa mwanake mwanka ûrîa mûkûrû; bonthe barîa baarî na inya ya gwîta ndweene bareeta gûkaba mwankeene.

²²Amoabu bagîûkîîra rûkîîrî baroona rûûjî rûrîa rwaarî mbere yaao rûkari ta tharike nîûntû bwa weerû bwa riûa.

²³Nabo bareerana atîrî, “Îîjî nî tharike. Gûtî nkaanja njûûrî irîa cia anene barîa bareejîte kûrwaa naatuî nî ciûraganîte ciongwa ciathirania. Twîteeni tûgatae into biaao!”

²⁴Îndî rîrîa baakinyîre kambîîne ya Israeli, Aisraeli nî baaithûkîîre Amoabu. Amoabu baramatûka. Nabo Aisraeli bareengana na Amoabu bakîbooragaga.

²⁵Ningî barataa ntûûra cia Amoabu baraimomoranga. Bareeta bakîgeraga maiga miuundeene ya Amoabu yonthe îrîa yaarî îmînoru mwanka îroojûra maiga. Baracoka barathika ithima bia rûûjî bionthe na bararîîka mîtî ya matuunda yonthe. Ntûûra ya Kiriharesethi yonka akî nîyo yaatigarîre îrûngi. Nayo îracîgîîrua nî barîa baarûjaga na ikûtha baramîtaa.

²⁶Rîrîa mûnene wa Moabu oonere atî akwambîrîîria kûûmbwa nî aajûkîrie asikarî magana mûgwanja ba nchiû. Nabo bareerekera anthû bakîendaga kûmatûka kîrî mûnene wa Sîria, îndî bararemwa.

²⁷Rîu mûnene wa Moabu arajûkia mûtaana waawe ûrîa mûkûrû, ûrîa ûrîngî kûjûkia waathani, aramûrita arî kîgongwana gîa gwaakîîria rûthingoone îgûrû. Nabo Aisraeli baraigua ûguaa, baratigana na ntûûra îîu baraana nthîgûrû yaao.