Read KIMERU BIBLE PROTESTANT EDITION 2Ane 4 Bible Online

2Ane 4 - KIMERU BIBLE PROTESTANT EDITION bible

2Ane 4

¹Kûrakara atîrî, mwekûrû ûmwe wa muntû waarî kîroria nî eetîre arakaîra Elisha aramwîra atîrî, “Itû mwathi waakwa, mûkûrû waakwa nî arakuîre, na araarî mwîtîkia Mûrungu. Îndî nandî kûrî muntû ûreejîrîte îraandû. Tontû bwa îraandu rîu arîenda gwîta na ataana baakwa bobaîrî akabaeethie nkombo ciaawe.”

²Elisha aramûûria atîrî, “Nîatîa ûkwenda nkûthithîria? Mbîîra kîrîa ûrî nakîo nyomba yaaku?” Nawe mwekûrû ûu aramwîra, “Ûûni nthûûmba yaaku ya mûka ntî na gantû nyomba tiga tûguta tûnini tûrî kabûyûûne.”

³Elisha aramwîra, “Ita ûkîrombaga atûûri nyongû ciaao intheri, inyiingî o ûrîa ûkoomba.

⁴Ûcoke wîte ûciingîre nyomba amwe na ataana baaku bwambîrîîrie gwîîkîra maguta jau ûrî najo nyongûûne iu. O nyongû yoojûra ûkamîûûmbia.”

⁵Mwekûrû ûu areeta araciingîra nyomba amwe na ataana baawe araambîrîîria kwonoria maguta nyongûûne. O nyongû yoojûra ataana bakamûnenkera îngî.

⁶Rîrîa nyongû cionthe ciojûrîre maguta, areera mûtaana atîrî, “Nenkeeria îngî.” Nawe aramûcokeria atîrî, “Gûtî îngî îtigeere.” Najo maguta jarathira arîa jaaumaga.

⁷Mwekûrû ûu, areeta kîrî kîroria Elisha. Elisha aramwîra atîrî, “Îta weendie maguta jau ûrîee marandû jaaku jonthe, na mbeecha irîa igaatigara bwiteethie nacio.”

⁸Ntukû îmwe, Elisha nî eetîre ntûûreene ya Shunemu. Naku nî kwaarî na mwekûrû ûmwe ûmûtongu. Mwekûrû ûu nî eerencere Elisha arûma tûirio. Tontû bûû, îgiita rîonthe rîrîa aakûrûkagîîra ntûûreene îîu, nî aaûkagîra kwa mwekûrû ûu, nîkenda agagûrwa.

⁹Mwekûrû ûu areera mûkûrû waawe atîrî, “Nandî nî menyete atî muntû ûûjû ûkûrûkagîîra gweetû rîonthe nî muntû wa Mûrungu.

¹⁰Ga tûmwakîre kanyomba îgûrûgûrû, na tûmwîkîre ûrûrî ku, na meetha, na gîtî, na taa nîkenda rîrîa akeeja akaraga ku.”

¹¹Ntukû îmwe Elisha nî eetîre Shunemu, arakûrûka kanyomba karîa aakîri nîkenda anogoka.

¹²Areera nthûûmba yaawe Gehazi atîrî, “Îta mwekûrû ûu Mûshunemu.” Gehazi areeta mûka ûu. Mwekûrû ûu areeta kîrî Elisha.

¹³Elisha areera nthûûmba yaawe, “Nandî mwîre ûjû, ‘Nî withangîkîîtie mono nîûntû bweetû; nîatîa ûkwenda nkûthithîria? Nkwarîrîîrie kîrî mûnene kana kîrî mûtongeeria wa njûûrî?’” Mwekûrû ûu aracokia arauga atîrî, “Nî ng'anîri ndî kîrî antû beetû.”

¹⁴Elisha arooria, “Nîatîa oomba kûthithîrua îndî?” Gehazi nawe aramûcokeria atîrî, “Mwekûrû ûûjû atî kaîjî na mûkûrû waawe nî ûmûkûrû.”

¹⁵Elisha aramwîra, “Mwîte.” Gehazi nî aamwîtîre nawe mwekûrû ûu areeta ararûngama mwariine.

¹⁶ Elisha areera mwekûrû ûu atîrî, “Îgiita ta rîrî mwakeene jûu jûngî ûkëethîrwa ûrî na kaîjî.” Îndî mwekûrû ûu aramûcokeria atîrî, “Itû arî! Mwathi waakwa, muntû wa Mûrungu; tiga gûmpaîria.”

¹⁷Îndî mwekûrû ûu nî aagîîre îu na araciara kaîjî îgiita o ta rîrîa Elisha aamwîrîrîte.

¹⁸Nyuma ya mîaka mma, kûrî îgiita rîa maketha kaîjî kau nî kaumagarîre kareeta kîrî îthe muundeene naarîa baakethaga.

¹⁹Mwana ûu araambîrîîria kûrîra akiugaga atîrî, “Nî ngûkangatwa nî mûtwe! Nî ngûkangatwa nî mûtwe!” Îthe areera nthûûmba îmwikie kîrî ng'ina.

²⁰Nayo nthûûmba îramûkamata îramwikia kîrî ng'ina. Ng'ina aramûgwata amûrîkîrîte bieroone mwanka thaa thita, rîrîa mwana ûu aakuîre.

²¹Mwekûrû ûu areeta aramamia mwîrî jwa kaîjî kau ûrûrî bwa Elisha, muntû wa Mûrungu, arajwingîra ku araumagara.

²²Aracoka areeta mûkûrû waawe aramwîra atîrî, “Tûma nthûûmba îmwe îreete ntigiri nîkenda mbîtanga kwona muntû wa Mûrungu, na ncoke kaîrî.”

²³Mûkûrû waawe aramûûria atîrî, “Nîkî tontû ûkwenda gwîta kîrî we naarua, na tî ntukû ya sabatû, kana ya kîatho kîa Mweri jûkîguûka?” Mwekûrû waawe aramûcokeria atîrî, “Tiga kûûria.”

²⁴Mwekûrû ûu aratandîka ntigiri, areera nthûûmba yaawe atîrî, “Îngaînga ntigiri, na ûkárûngama mwanka rîrîa ngaakwîra.”

²⁵Tontû bûû, mwekûrû ûu arambîrîria rûgendo rwa gwîta kîrî muntû wa Mûrungu ûrîa waarî kîrîmeene gîa Karimeli. Rîrîa Elisha oonere mwekûrû ûu eejîte areera nthûûmba yaawe Gehazi atîrî, “Tega tûjû mwekûrû ûrîa Mûshunemu.

²⁶Ûgîaanga ûtirimane nawe ûmûkeethie ûmûûrie këethîra nî ûmwega na këethîra mûkûrû waawe na kaîjî kaawe nî babeega.” Mwekûrû ûu aramwîra, “Tûrî babeega.”

²⁷Rîrîa mwekûrû ûu aakinyîre kîrî muntû wa Mûrungu kîrîmeene, aragwata Elisha magûrû. Gehazi areeta kûmûritarita o. Îndî muntû wa Mûrungu aramwîra atîrî, “Tigana nawe nîûntû arî na kwithikîîra na gûtîu MWATHANI aramenyithia.”

²⁸Mwekûrû ûu nawe aramwîra atîrî, “Mwathi waakwa, ka ndaakûrombeete kaîjî? Ntaagûkaanîtie gûmpaîria?”

²⁹Elisha areera Gehazi atîrî, “Ithuranîre ûjûkie rûturo rwaakwa wîte. Wacemania na muntû ûkámûkeethia; na muntû aagûkeethia ûkámwîtîkîîria. Weeta ûrîkîîre rûturo rwaakwa ûthiûne bwa mwana ûu.”

³⁰Îndî ng'ina wa mwana areera Elisha atîrî, “Ga ngûciîtia nîûntû bwa MWATHANI na nîûntû bwaaku atî ntîgûtiga.” Tontû bûû, Elisha arookîîra aramûthingata.

³¹Gehazi nî aarî agwîta arî mbere. Ararîkîîra rûturo rwa Elisha ûthiû bwa mwîrî jwa mwana, îndî mwîrî jûu jûtaagaragara. Gehazi aracoka aratirimana na Elisha aramwîra atîrî, “Mwana atîrookîîra.”

³²Elisha nî aakûrûkîre nyomba areethîra mwana ûu arî ûrûrî arî ûmûkuû.

³³Arakûrûka araciingîra ndeene amwe na mwîrî jwa mwana ûu araromba MWATHANI.

³⁴ Areeta aramama îgûrû rîa mwana ûu araringithia mûromo kîrî mûromo jwa mwana ûu, na aratirithia meetho jaawe kîrî meetho ja mwana ûu, na ararîkîîra njara ciaawe îgûrû rîa njara cia mwana ûu. Rîrîa aitambûrûkîrie îgûrû rîa mwîrî jwa mwana ûu, mwîrî jûu jûrambîrîria kûgwata mûruutîra.

³⁵Elisha arookîîra, araamba gwîtaîta kûu nyomba ndeene aracoka kaîrî araitambûrûkia îgûrû rîa mwana. Nawe mwana araathimûra maathimûra mûgwanja, na aramincûria meetho.

³⁶Elisha areeta Gehazi aramwîra atîrî, “Îta mwekûrû ûu Mûshunemu.” Nawe aramwîta, mûka ûu areeta arakûrûka nyomba. Elisha nawe aramwîra atîrî, “Jûkia mûtaana waaku.”

³⁷Mwekûrû ûu areeta kîrî Elisha araturia maru, areenamîîria aratiirithia ûthiû nthî. Rîu arajûkia mwana waawe, araumagara.

³⁸Îgiita rîmwe rîrîa kwaarî na mpara nthîgûrûûne, kîroria Elisha nî eetîre ntûûreene ya Giligali. Nî baacemanîrie na gîkundi kîa iroria, areera nthûûmba yaawe, “Tegeka nyongû înene riiko ûrugîre iroria gîtwero.”

³⁹Ûmwe wa iroria biu areeta miuundeene gûcwaa nyani. Nawe aratua tûûngûnjûe tûtwingî tûrîa oombaga gûkamata. Nawe areeta aratûgiitangîra nyongûûne ya gîtwero, nabo bataamenyaga nîmbi.

⁴⁰Nabo antû bau barataîrwa gîtwero kîu, îndî bakwambîrîîria kûrîa, barakaîra Elisha bakiugaga, “Wûi muntû wa Mûrungu, gîtwero kîrî na ûrogi!” Bararemwa nî kûrîa gîtwero kîu.

⁴¹Elisha nawe arauga, “Reeteeni mûtu.” Nawe arajwîkîra nyongûûne arabeera atîrî, “Taîreeni antû barîe.” Nakîo gîtwero kîrathira ûrogi.

⁴²Kûrakara atîrî, muntû ûmwe nî aaumîre Baali-shalisha araikîria Elisha mîgaate mîrongo îîrî yaathithîtue na mûtu jwa mûnyaki jwa îketha rîa mbere. Ningî aramwikîria nkano nkunia îmwe ciakethi o rîo. Elisha arauga atîrî, “Nenkeeria antû barîe.”

⁴³Îndî nthûûmba yaawe îrooria atîrî, “Nîatîa nkaagaîra antû îgana into bibi?” Elisha aracokia atîrî, “Banenkere bio barîe, nîûntû MWATHANI augîîte ûjû: ‘Bakaarîa na bitigare.’”

⁴⁴Tontû bûû, nthûûmba îrabanenkeera. Nabo bararîa na biratigara o ta ûrîa MWATHANI aaugîîte.