Read KIMERU BIBLE PROTESTANT EDITION 2Ane 6 Bible Online

2Ane 6 - KIMERU BIBLE PROTESTANT EDITION bible

2Ane 6

¹Ntukû îmwe gîkundi kîa iroria birîa biakaraga na Elisha, nî biamûnung'unîîre bikîmwîraga atîrî, “Antû aja tûkaraga nî anini mono.

²Reka itû twîte mûuro jwa Jorodani tûgateme mîtî, nîkenda twaka antû a gûtûûra” Nawe arabeetîkîîria.

³Ûmwe waao aramwîra atîrî, “Itû îtîkîîrîa gwîtania naatuî.” Nawe areetîkîîria.

⁴Tontû bûû, areetania nabo. Nabo baakinya mûuro jwa Jorodani barambîrîria gûtema mîtî.

⁵Îndî rîrîa muntû ûmwe aatemaga mûtî, ntûûru yaawe nî yakûûkîre îragwa rûûjîîne. Nawe muntû ûu arauga, “Wûi, mwathi waakwa! Îgûkarî ya kûromba.”

⁶Elisha aramûûria, “Nîkû yaagwîrîîra?” Nawe muntû ûu aramwonia. Elisha aratema kamûtî arakagera au oonerue, nayo îreereera.

⁷Elisha aramwîra, “Jûkia ntûûru yaaku.” Nawe aratambûrukia njara aramîjûkia.

⁸Îgiita rîmwe mûnene wa Sîria nî eetîre kûrwaa na njûûrî ya Israeli. Araireba na atongeeria ba njûûrî yaawe, arabeera, “Antû ana na ana nîo nkaamba kambî.”

⁹Îndî Elisha aratûmana kîrî mûnene wa Israeli aramwîra atîrî, “Menyeera, ûgákûrûkîîra rûteere rûrû, nîûntû njûûrî ya Sîria îîjîrîte rûteere rûu.”

¹⁰Mûnene wa Israeli nî aatûmanaga o kûrîa eeragîrwa nî kîroria nîkenda baikaria. Nawe arathithia o ûu magiita na magiita.

¹¹Mûnene wa Sîria nî aathangîkîre mono nîûntû bwa mantû jau. Nawe areeta atongeeria baawe ba njûûrî arabooria atîrî, “Mbîîreeni nûû weenu ûkûgwata mûnene wa Israeli mbaru?”

¹²Ûmwe wa atongeeria nî aamwîrîre atîrî, “Gûtî we, itû mwathi waakwa, mûnene. Elisha ûrîa kîroria kîa Israeli nîwe wîraga mûnene wa Israeli mantû jarîa waaragia kinya ûmami.”

¹³Mûnene arauga atîrî, “Îta ûmenye arîa arî nîkenda ntûmane agwatwe.” Nawe areerwa atîrî, “Arî Dothani.”

¹⁴Tontû bûû, aratûma njûûrî înene mono îrî na mbarathi, na ngaari cia ndwaa. Nayo îrakinya ntûûreene îîu ûtukû, îramîcîgîîria.

¹⁵Nayo nthûûmba ya muntû wa Mûrungu nî yookîrîîre rûkîîrî kainda, îraumagara. Îgîtega rî, îroona njûûrî îrî na mbarathi, na ngaarî cia ndwaa icîgîîrîîtie ntûûra. Nthûûmba îîu îreera Elisha atîrî, “Wûi, mwathi waakwa, nîatîa tûkûthithia?”

¹⁶Elisha arauga, “Ûgákîra, nîûntû barîa barî rûteere rweetû nî babaingî nkûrûki ya bo.”

¹⁷Elisha araromba arauga atîrî, “Ndakwerenca, itû MWATHANI mincûria meetho ja nthûûmba îîjî nîkenda yoona.” MWATHANI aramîmincûria meetho. Nayo îroona mbarathi ciûjûri kîrîmeene amwe na ngaarî cia ndwaa igîûkaga mwanki ithiûrûkîrîte Elisha.

¹⁸Rîrîa njûûrî ya Sîria yaaithûkîîre Elisha, nî aarombere MWATHANI akiugaga atîrî, “Itû MWATHANI eethia antû baba atumuumu.” MWATHANI aracokia maromba ja Elisha, arabaeethia atumuumu.

¹⁹Elisha nawe arabeera atîrî, “Nî bûteete njîra, îîjî tîyo ntûûra îrîa bûgûcwaa. Nthingateeni mbwikie kîrî muntû ûrîa bûgûcwaa.” Nawe arabatongeeria arabaikia Samaria.

²⁰Nabo rîrîa baatonyere ntûûra ya Samaria Elisha nî aarombere arauga atîrî, “Itû MWATHANI, mincûria meetho ja antû baba nîkenda boona.” MWATHANI arabamincûria meetho jaao baroona. Bagîtega rî, bareethîra nî gatîgatî ga ntûûra ya Samaria barî.

²¹Mûnene wa Israeli nawe akûboona arooria Elisha atîrî, “Ntîgûkûûria aba, mboorage mbathirie buru?”

²²Elisha aramwîra “Arî, ûkábooraga. Ûkëeja kûgwata atae ndweene ka ûbooragaga? Barûmie biakûrîa na ûbakuundie bia kûnyua. Rîu ûbarekeerie bacoke kîrî mûnene waao.”

²³Tontû bûû, mûnene wa Israeli arabarugîra kîatho. Nabo bathiria kûrîa na kûnyua, arabarekeeria, baracoka kîrî mûnene waao. Kuuma rîu antû ba Sîria baratiga kwithûkîra nthîgûrû ya Israeli.

²⁴Nyumeene, Beni-hadadi mûnene wa Sîria nî aathuranîîre njûûrî yaawe yonthe areeta araithûkîra na aracîgîîria ntûûra ya Samaria.

²⁵Nayo ntûûra ya Samaria îragia mpara înene mono îgiita rîu yaacîgîîrîîtue. Tontû bûû, kîongo gîa ntigiri kîratua kûgûragwa fetha mîrongo înaana (80). Nayo ntaka ya kîjea ya lita îmwe yeendagua fetha ithaano (5).

²⁶Ntukû îmwe, mûnene wa Israeli eetanîtie na rûthingo rwa ntûûra, mûka ûmwe nî aamûkaîîre akiugaga atîrî, “Nteethia itû, mwathi waakwa mûnene!”

²⁷Mûnene aramûcokeria atîrî, “Këethîra MWATHANI atîgûgûteethia rî, nîkû nkaarita kîa gûgûteethia nakîo Nî îtîîriine kana nî kîmiiriine kîa nzabibû?”

²⁸Mûnene aramûûria atîrî, “Nî thîîna îrîkû ûrî nayo?” Nawe mûka ûu aramwîra, “Mûka ûûjû arambîîrîre atîrî, ‘Rita mwana waaku tûrîe naarua, naani nkaarita waakwa rûûjû tûmûrîe.’

²⁹ Tontû bûû, tûraruga mwana waakwa, tûramûrîa. Naani rûûneene ndamwîra atîrî, ‘Rita mwana waaku tûrîe.’ Îndî we nî aithîre mwana waawe.”

³⁰Rîrîa mûnene aaigîrue nteto cia mûka ûu, aratambûranga nguû ciaawe. Nabo antû barîa baamwonaga akûrûkîte eetanîtie na rûthingo baroona mûnene eekîrîte mathango ndeene ya nguû iu ingî.

³¹Nawe mûnene araciîtia arauga, “Mûrungu arombûraga, këethîra naarua gûgaatuka ntîgiitîte kîongo kîa Elisha mûtaana wa Shafati!”

³²Îgiita rîu, Elisha na akûrû bamwe, nî baakari nthî nyomba yaawe. Mbere ya muntû ûrîa waatûmi nî mûnene akinya, Elisha areera akûrû bau atîrî, “Mûûragani ûrîa agûtûma muntû eeja kûmbûraga. Atîrî, muntû ûu eeja bwiinge mwari buru atîgaatonye. No mwanka mûnene akeethîrwa amuumîte nyuma.”

³³Akîbaaragîria o ûu, mûnene arakinya. Mûnene areera Elisha atîrî, “Thîîna îîjî îreeti nî MWATHANI! Nîmbi îgaatûma mbîta na mbere kûmwîrîgîîra?”