Read KIMERU BIBLE PROTESTANT EDITION 2Ane 7 Bible Online

2Ane 7 - KIMERU BIBLE PROTESTANT EDITION bible

2Ane 7

¹Îndî Elisha aramûcokeria aramwîra, “Thikîîra ûrîa MWATHANI akuuga, ‘Rûûjû thaa ta îîjî kilo ithatû cia mûtu jwa nkano ikaagûrwa na fetha îmwe. Nacio kilo ithanthatû cia mûnyaki ikaagûragwa o ûu mpingîroone ya Samaria.’”

²Mûtongeeria wa njûûrî ûrîa mûnene aathuurîte amûmenyagîîra arooria muntû wa Mûrungu atîrî, “Kinya MWATHANI wengwa akarugûra ndiricha cia îgûrû, kûrî ûntû ta bûu bûkarîka?” Îndî Elisha aramwîra atîrî, “Ûkaabiona na meetho, îndî ûtîbirûma.”

³Naku nî kwaarî na antû bana baarî na mûrimo jwa mûtigiri baakaraga oome ya mpingîro ya ntûûra ya Samaria. Bareerana atîrî, “Ga tûgaakara aja mwanka tûkue?

⁴Twauga tûkûrûke ntûûreene, kûu kûrî na mpara, tuî noo ka tûgaakuîra ku. Twakara aja, kinya rîo tûkue. Nandî ûkîîreeni twîte kambîîne ya antû ba Sîria. Baarega gûtûûraga tûtûûre mwoyo; na kînya baatûûraga batûûrage u.”

⁵Tontû bûû, barookîîra kwagîa marwîrwî bareeta kambîîne ya njûûrî ya Sîria. Nabo baakinya akuî na kambî îîu, baratega baroona gûtî muntû noo ûmwe kambîîne.

⁶MWATHANI nî aarî agûtûma njûûrî ya Sîria iigua gîtuma ta kîa njûûrî înene îrî na mbarathi na ngaarî cia ndwaa. Nabo asikarî bareerana atîrî, “Mûnene wa Israeli agûtwîtîra njûûrî ya mûnene wa Ahiti na ya Misri ciîja gûtûthiria.”

⁷Tontû bûû, Asîria baaramatûka kûrî na marwîrwî, baratiga maema jaao, na mbarathi ciaao, na ntigiri ciaao, na kambî îkari o ûrîa yaambi, baramatûka nîkenda batîûragwa.

⁸Rîrîa antû bau ba mûtigiri baakinyîre kambîîne nî baatonyere îemeene rîmwe, bararîa na baranyua, na barajûkia fetha na thaabu na nguû, bareeta baraitha into biu. Baracoka barakûrûka îemeene rîngî barajûkia into ku bareeta barabiitha.

⁹Rîu bareerana atîrî, “Tûtîkûthithia mantû jameega. Îîjî nî ntukû ya kûgwîrua tûkëeja kûraara tûtîîrîte muntû noo ûrîkû nteto iji, ga tûkanûkua. Tontû bûû, twîteeni nandî tûkeere antû ba mûnene.”

¹⁰Nabo bareeta ntûûreene bareeta akaria ba mpingîro barabeera atîrî, “Tuumîte kambîîne ya antû ba Sîria na gûtî muntû noo ûmwe tûroona kana twigua mûgambo jwa muntû, tiga mbarathi na ntigiri itheeki na maema jakari o ûrîa jaraambi.”

¹¹Nabo akaria ba mpingîro, baramenyithania nteto iu kîrî mûnene.

¹²Naku kûrî o ûtukû, mûnene arookîîra areera atongeeria baawe ba njûûrî atîrî, “Ka mbwîre mîbango îrîa antû ba Sîria batûbangîrîte. Tontû nî baijî tûrî na mpara, gîkî nîkîo gîtûmi beerûkîrîte kambî beeta gwiciitha kîthakeene bakiugaga twaumîra ntûûreene, bagatûgwata tûrî mwoyo bacoke batae ntûûra yeetû.”

¹³Mûtongeeria ûmwe arauga atîrî, “Tontû antû ba Israeli barîa batigeere bagaakua o ta ûrîa bangî bakuîte, nî kaaba tûtûme antû bataano, bajûkie mbarathi irîa itigeere beete bakoone ûrîa gûkari.”

¹⁴Tontû bûu barajûkia ngaarî ijîîrî cia ndwaa, nawe mûnene arabatûma beeta gûtuîria ûrîa kûrî.

¹⁵Nabo barathingatia njûûrî ya Sîria mwanka mûuroone jwa Jorodani. Nabo beethagîra nguû na into bibingî binyaganîte njîreene kunthe nîûntû bwa ûrîa njûûrî ya Sîria yeetîte îkîbigwîthagia îmatûkîte. Antû bau baatûmi baracoka bareera mûnene ûrîa boona.

¹⁶Nabo antû ba ntûûra ya Samaria baraumagaranga na mpwîî bareeta gûtaa kambî ya Sîria. Tontû bûû, kilo ithatû cia mûtu jwa nkano iratua kûgûragwa na fetha îmwe, na cio kilo ithanthatû cia mûnyaki iratua kûgûragwa na mbeecha o ta iu, o ta ûrîa MWATHANI augîîte.

¹⁷Rîu mûnene nî aarî akweethia asikarî ûrîa waamûmenyagîîra mûrûngamîîri wa mpingîro. Nabo bakiumagaranga nî baamûkinyangîîre nthî mwanka arakua, o ta ûrîa Elisha aaugîte rîrîa mûnene arî agwîta kîrî we.

¹⁸Nîkwîthîrwa Elisha nî aarî akwîra mûnene atîrî, “Kilo ithanthatû cia mûnyaki ikaagûrwa na fetha îmwe, nacio kilo ithatû cia mûtu jwa nkano kinya cio ikaagûrwa na fetha îmwe îgiiteene ta rîrî rûûjû mpingîroone ya Samaria,”

¹⁹Mûtongeeria ûu wa njûûrî waamenyagîîra mûnene nî aarî agûcokeria muntû wa Mûrungu atîrî, “Kinya MWATHANI wengwa akarugûra ndiricha cia îgûrû, kûrî ûntû ta bûu bûkarîka?” Elisha aramwîra atîrî, “Ûkaabiona na meetho îndî ûtîbirûma.”

²⁰Ûu nîu gwakarîkîre nîûntû nî aakinyangîîrwe nthî mpingîroone nî antû mwanka arakua.