Read KIMERU BIBLE PROTESTANT EDITION 2Ane 8 Bible Online

2Ane 8 - KIMERU BIBLE PROTESTANT EDITION bible

2Ane 8

¹ Rîu Elisha nî aarî akwîra mûka ûrîa aariûkîrîîtie kaîjî atîrî, “Ithuranîre wîte na antû ba nja yaaku ûgatûûre kûrîa ûkoona kûrî gûkwega. Nîkwîthîrwa MWATHANI agatûma kwîthîrwe kûrî na mpara înene mîaka mûgwanja.”

²Nawe mûka ûu arookîîra araithuranîra areeta amwe na antû ba nja yaawe, areeta aratûûra nthîgûrûûne ya Afilisti mîaka mûgwanja, o ta ûrîa muntû wa Mûrungu aamwîrîte.

³Nyuma ya mîaka mûgwanja mûka ûu nî aacokere Israeli. Nawe areeta kîrî mûnene wa Israeli nîkenda acokerua nyomba yaawe na muunda jwaawe.

⁴Mûka ûu nî eethîîre mûnene akîaragia na Gehazi, nthûûmba ya Elisha akîmwîraga atîrî, “Mbîîra mantû jamanene jonthe jarîa Elisha aathithia.”

⁵Rîrîa Gehazi eeraga mûnene ûrîa Elisha aarîûkîtie kaîjî gagakuû, mûka ûrîa kaîjî kaawe kaarîûkîtue areeja gûciarîrîîria kîrî mûnene nîûntû bwa nyomba yaawe na muunda jwaawe. Gehazi nawe areera mûnene atîrî, “Mwathi waakwa mûnene, ûûjû nîwe mûka ûrîa kaîjî kaawe kaariûkîîtue nî kîroria Elisha na kaîjî kau nîko gaka.”

⁶Nawe mûnene arooria mûka ûu mantû jau. Mûka aramwîra o ûrîa Gehazi aaugîîte. Tontû bûû, mûnene arathuura mûtongeeria ûmwe aramwîra, “Mûcokerie into birîa biaarî biaawe bionthe, amwe na maciara jonthe ja miuunda yaawe ja kuuma ntukû îrîa aumîre gûntû gûkû mwanka nandî.”

⁷Elisha nî eetîre Damaski. Îgiita rîu Beni-hadadi mûnene wa Sîria aajîtue. Nî eerîrwe atî Elisha, Muntû wa Mûrungu arî kûu.

⁸Mûnene areera Hazaeli atîrî, “Jûkia kîewa wîte nakîo kîrî muntû wa Mûrungu ûmwîre akûûrîrie kîrî MWATHANI këethîra nkoora mûrimo jûjû.”

⁹Hazaeli araîkia nkamîîra mîrongo îna into bia mîthemba îmiingî birîa bithongi bia Damaski birî kîewa, araikîria Elisha. Aakinya kîrî Elisha aramwîra atîrî, “Nthûûmba yaaku Beni-hadadi mûnene wa Sîria nîwe ûntûmîte nkûûria këethîra akoora mûrimo jûu jûmwajîîtie.”

¹⁰Elisha aramwîra atîrî, “Îta ûmwîre ûjû: ‘Nî mma ûkoora’ Îndî MWATHANI ambonetie atî no mwanka akue.”

¹¹Elisha aracoka aratega Hazaeli kûnûû mwanka Hazaeli araigua nthoni. Elisha Muntû wa Mûrungu araambîrîîria kûrîra.

¹²Hazaeli aramûûria atîrî, “Nîmbi yaatûma mwathi waakwa ûrîra?” Elisha aramûcokeria ûjû, “Tontû nînkûmenya ûthûûku bûrîa ûkaathithîria antû ba Israeli. Ûkaaîthia ntûûra ciaao irîa ciirigîri na nthingo na ûûrage nthaka ciaao na ûkanyanie nkeenke ciaao nthî, na ûkothorange mau ja aka.”

¹³ Îndî Hazaeli aramûûria, “Ka ûûni nthûûmba yaaku ndî mbi? Anga ûûni ntî gîntû kîa ûtheri o ta kurû? Nîatîa mpûûmba kûthithia mantû jamanene ûu?” Elisha aramwîra atîrî, “MWATHANI nî ambonetie atî ûkaa mûnene wa Sîria.”

¹⁴Hazaeli aratiga Elisha aracoka kîrî mwathi waawe Beni-hadadi, mûnene aramûûria atîrî, “Nîatîa Elisha akwîra?” Nawe aramûcokeria atîrî, “Ambîîra atî gûtî nkaanja ûkoora mûrimo.”

¹⁵Îndî rûûnene Hazaeli arajûkia nguû îrîa yaaragwa ûrûrî îgûrû, aramîtombeka rûûjîîne, aracoka arakunîkîra mûnene Beni-hadadi ûthiû nayo mwanka arakua. Hazaeli araa mûnene wa Sîria.

¹⁶Mwakeene jwa îtaano jwa waathani bwa Joramu mûtaana wa Ahabu, nthîgûrûûne ya Israeli, nîrîo Jehoramu mûtaana wa Jehoshafati, mûnene wa Juda, aambîrîîrie kwaathana.

¹⁷Jehoramu aarî na ûkûrû bwa mîaka mîrongo îthatû na îîrî rîrîa aaere mûnene. Nawe aathanîre mîaka înaana arî Jerusalemu.

¹⁸Ningî nî aathingatîre mîîtîre ya anene ba Israeli o ta ûrîa nja ya Ahabu yaathithagia, nîûntû aagûrîte mwarî wa Ahabu. Jehoramu nî aathithîrie mantû jamathûûku mbere ya MWATHANI.

¹⁹ Îndî MWATHANI ararega kûthiria Juda nîûntû bwa wîrane bwaawe kîrî nthûûmba yaawe Daudi, atî nchiarwa ciaawe ikaathanaga kenya na kenya.

²⁰ Rîrîa Jehoramu aathanaga, nîrîo antû ba Edomu baaciathûrîre bararegana na waathani bwa Juda, na baraithuurîra mûnene waao.

²¹Mûnene Jehoramu nî aajûkîrie ngaarî ciaawe cionthe cia ndwaa areeta Zairi. Arî au aracîgîîrua nî njûûrî ya Edomu. Îndî kûgûtuka, we amwe na atongeeria ba njûûrî yaawe baramatûka, nabo asikarî baramatûka baraana nja ciaao.

²²Ûu nîu Edomu yaareganîre na waathani bwa Juda mwanka naarua tûrî. Kinya ntûûra ya Libuna nî yaareganîre na waathani bwa Juda îgiiteene rîu.

²³Najo mantû jangî jarîa Jehoramu aathithîrie nî jaandîki yukuune rîa Mantû ja Karaaja jegiî Anene ba Juda.

²⁴Jehoramu nî aakuîre, arathikwa mbîrîreene cia beethe, ntûûreene ya Daudi. Ahazia mûtaana waawe arajûkia waathani.

²⁵Mwakeene jwa îkûmi na îîrî jwa waathani bwa Joramu mûtaana wa Ahabu, ndeene ya Israeli, nîrîo Ahazia mûtaana wa Jehoramu aambîrîîrie kwaathana Juda.

²⁶Ahazia aarî na ûkûrû bwa mîaka mîrongo îîrî na îîrî rîrîa aambîrîîrie kwaathana. Nawe aathanîre arî Jerusalemu mwaka jûmwe. Ng'ina eetagwa Athalia na aarî mwarî wa mûtaana wa Omuri ûrîa waarî mûnene wa Israeli.

²⁷Kinya Ahazia nî aathithîrie mantû jamathûûku o ta jarîa jaathithagua nî Ahabu, mûthoni waawe. Tontû bûû, Ahazia nî aathithîrie meeyia mbere ya MWATHANI.

²⁸Mûnene Ahazia nî eetanîrie ndweene na Joramu mûtaana wa Ahabu nîkenda baithûkîra Hazaeli mûnene wa Sîria, kûu Ramothi-gileadi. Joramu nî eekîîrwe ngûma ndweene.

²⁹Mûnene Joramu nî aacokere ntûûreene ya Jezereeli kworeria ngûma ciaawe ku, irîa aarî agwîkîrwa nî Sîria ntûûreene ya Ramothi bakîrûjaga na mûnene Hazaeli wa Sîria. Mûnene Ahazia mûtaana wa Jehoramu nî eetîre ntûûreene ya Jezereeli kûraitha Joramu mûtaana wa Ahabu nîûntû nî aajîtue.