Read KIMERU BIBLE PROTESTANT EDITION 2Ane 9 Bible Online

2Ane 9 - KIMERU BIBLE PROTESTANT EDITION bible

2Ane 9

¹Kîroria Elisha nî eetîre mûthaka ûmwe kîroria aramwîra, “Ithuranîre, ûjûkie gachuuba ka maguta ja nzeituni, wîte ntûûra ya Ramothi-gileadi.

²Waakinya nao ûcwee Jehu mûtaana wa Jehoshafati, Jehoshafati mûtaana wa Nimushi. Wakûrûka ûmwathûrane na bangî, ûmwikie kanyomba ka ndeene.

³Rîu ûjûkie gachuuba kau ka maguta ja nzeituni, ûmwîtûûrîrie mûtwe na uuge atîrî, ‘MWATHANI ariuga ûjû: Ngûkweethia mûnene wa Israeli.’ Ûcoke ûrugûre mwari, ûtîkûthaa uume ûmatûke buru.”

⁴Tontû bûû, mûthaka ûu kîroria areeta ntûûreene ya Ramothi-gileadi.

⁵Rîrîa aakinyîre nî eethîîre atongeeria ba njûûrî barî mûcemanioone. Nawe arauga atîrî, “Ndî na ntûmwa yaaku gwe mûtongeeria wa njûûrî.” Jehu aramûûria, “Ntûmwa nî yaaû kîrî tuî twinthe?” Nakîo kîroria kîramûcokîria atîrî, “Nî yaaku.”

⁶ Tontû bûû, Jehu arokîîra barakûrûka nyomba. Nawe mûthaka ûu kîroria aramwîtûûrîria maguta akiugaga: “MWATHANI Mûrungu wa Israeli ariuga ûjû: Ngûkweethia mûnene wa antû ba MWATHANI tabo antû ba Israeli.

⁷Naagwe ûkaathiria antû ba nja ya Ahabu mwathi waaku, nîkenda ndiirîîria tharike ya nthûûmba ciaakwa, na ya iroria îrîa yeetûûrîrwe nî Jezebeli, mûka wa Ahabu.

⁸Nîkwîthîrwa nkaathiria arûme ba nja ya Ahabu bonthe, amwe na nchiarwa ciaawe cia arûme; beethîrwa barî nkombo kana batî nkombo ndeene ya Israeli.

⁹Nkaathithîria nja ya mûnene Ahabu o ta ûrîa ndaathithîîrie nja ya mûnene Jeroboamu mûtaana wa Nebati, na ndîrathithîria nja ya mûnene Baasha mûtaana wa Ahija.

¹⁰ Jezebeli agaakua, îndî atîthikwa. Kiimba kîaawe gîkaarîîrwa nî kurû kûu Jezereeli.” Athiria kuuga ûu, mûthaka ûu kîroria ararugûra mwari na arauma na aramatûka.

¹¹Rîrîa Jehu aaumagarîre areeta kîrî atongeeria bau bangî ba njûûrî, nî baamûûrîrie atîrî, “Mantû nî jameega? Nîmbi muntû ûu wa nthû akwendaga kîrî gwe?” Nawe arabeera, “Nî bûmwijî na nî bwijî jarîa augaga.”

¹²Nabo baramwîra, “Ûu tî u, twîre ûûma.” Jehu arabeera, “Ambîîrîre MWATHANI ariuga ûjû, ‘Ngûgwîtûûrîria maguta ndakweethia mûnene wa Israeli.’”

¹³O ntûti atongeeria barîa ba njûûrî bonthe bararita nguû ciaao cia îgûrû, baramwîkîra cio au tûkinyoone nîkenda eetîîra îgûrû rîaacio. Baracoka baratûmîîria bakîringaga tarumbeta bakiugaga, “Jehu nî mûnene!”

¹⁴Jehu mûtaana wa Jehoshafati, Jehoshafati mûtaana wa Nimushi nî aabangîre kûûraga Joramu. Joramu nî aakabîte na njûûrî yonthe ya Israeli ntûûreene ya Ramothi-gileadi nîkenda îtîkaithûkîrwe nî Hazaeli mûnene wa Sîria.

¹⁵Îndî mûnene Joramu nî aarî agûcoka ntûûreene ya Jezereeli kworia ngûma irîa eekîîri ndweene akîrûjaga na Hazaeli mûnene wa Sîria. Jehu nawe arauga atîrî, “Këethîra nîbûkûngwata mbaru, gûkaagîta noo ûmwe uumagara ntûûreene na witho eeta kweejana nteto ntûûreene Jezereeli.”

¹⁶Jehu araitia ngaarîîne yaawe ya ndwaa areeta ntûûreene Jezereeli kûrîa mûnene Joramu aarî ajîtue. Ahazia, mûnene wa Juda nî aarî agwîta Jezereeli kûmûraitha.

¹⁷Nawe mûkaria ûrîa waakarîtie ntûûra ya Jezereeli arî mûnaareene nî oonere asikarî barîa Jehu aarûngamagîîra beejîte, arauga atîrî, “Nî nkwona gîkundi gîa antû kîîjîte.” Joramu aramwîra, “Tûma muntû ûmwe arî na mbarathi atirimane nabo aboorie atîrî, ‘Bwîjîte na thîîrî?’”

¹⁸Tontû bûû, muntû ûmwe areeta arî mbarathine, areera Jehu atîrî, “Mûnene arîûria ûjû: ‘Wîîjîte na thîîrî?’” Jehu aramwîra atîrî, “Nî ya mbi thîîrî ûkwenda? Garûka wîîje ûrî nyuma yaakwa.” Nawe mûkaria wa ntûûra ûrîa waarî kîrîngoone arauga atîrî, “Muntû ûrîa ûgûtûmi aagûkinya kîrî bo îndî atîracoka.”

¹⁹Mûnene aratûma muntû ûngî arî mbarathine. Nawe muntû ûu waatûmi arauga atîrî, “Mûnene arîûria ûjû: ‘Wîîjîte na thîîrî?’” Jehu aramwîra atîrî, “Nî ya mbi thîîrî ûkwenda? Garûka wîîje ûrî nyuma yaakwa.”

²⁰Nawe mûkaria wa ntûûra arî kîrîngoone arauga kaîrî atîrî, “Muntû ûrîa ûgûtûmi agûkinya kîrî bo îndî atîracoka. Mwîtithîrie jwa ngaarî ya ndwaa jûrîoneka jûkari ta jwa Jehu, mûtaana wa Nimushi, nîûntû nîwe wîtithagia ngaarî ta muntû ûrî na nthû.”

²¹Mûnene Joramu arauga atîrî, “Thuranangîreeni ngaarî yaakwa.” Nayo îrathuranîrwa. Joramu mûnene wa Israeli na Ahazia mûnene wa Juda baraumagara, o muntû na ngaarî yaawe, bareeta gûtirimana na Jehu. Baratirimana nawe agûkinya muundeene jwa Nabothi ûrîa Mûjezireeli.

²²Rîrîa Joramu oonere Jehu aramûûria atîrî, “Wîîjîte na thîîrî Jehu?” Jehu aramûcokeria atîrî, “Thîîrî nîkû yûmba kuuma, kûrî na moorogi na mîrungu ya mîng'uanano îmiingî îrîa nyakwe Jezebeli aareetere?”

²³Joramu aragarûra mbarathi aramatûka akîîraga Ahazia, “Îî nî nkunyanîri Ahazia!”

²⁴Jehu arakuucia ûta bwaawe na inya yonthe, araratha Joramu gatîgatî ga ituro, naju mûgwî jûramûratha nkoro, aragwa ngaarîîne yaawe ya ndwaa.

²⁵Jehu areera Bidikari ûrîa waamûteethagîîria atîrî, “Mûjûkie ûmûte muundeene jwa Nabothi ûrîa Mûjezireeli, nîûntû nî ûkûririkana rîrîa ûûni naagwe tweejanîtie tûthuutîte mbarathi tûrî nyuma ya îthe Ahabu, ûrîa kîroria kîeri nî MWATHANI kiuge atîrî,

²⁶ ‘Nî ndîroonere ûrîa Nabothi na ataana baawe barooragîrwe îgoro. Naani ndeeka wîrane atî ngaakanûkîria Ahabu muundeene jûjû.’ Tontû bûû, nandî mûjûkie ûmûte muundeene jûu o ta ûrîa MWATHANI augîîte.”

²⁷Rîrîa Ahazia mûnene wa Juda oonere ûrîa gwakara, nî aamatûkîre arî ngaarîîne yaawe ya ndwaa eerekerete ntûûra ya Bethihagani. Jehu areengana nawe akiugaga atîrî, “Mûratheeni kinya we.” Nabo baramûrathîra ngaarîîne yaawe ya ndwaa mwitioone jwa Guri, jûrîa jûrî akuî na ntûûra ya Ibileamu. Nawe aramatûka mwanka ntûûra ya Megido kûrîa aakuîrîîre.

²⁸Nthûûmba cia Ahazia irakamata mwîrî jwaawe na ngaarî ya ndwaa mwanka Jerusalemu, irajûthika mbîrîreene cia anene ntûûreene îîu ya Daudi.

²⁹Ahazia nawe aaere mûnene wa Juda mwakeene jwa îkûmi na jûmwe jwa waathani bwa Joramu mûtaana wa Ahabu, kûu Israeli.

³⁰Jehu nî aakinyîre ntûûreene ya Jezereeli, na Jezebeli areerwa Jehu agûkinya. Jezebeli araigemia meetho, na aracanûra mûtuundu, areeta gûtegeera ndiricheene.

³¹Jehu agîkûrûka mpingîro Jezebeli aramûûria, “Wîjîte na thîîrî Zimuri gwe ûûragîte mwathi waaku?”

³²Jehu araciukia meetho bwa îgûrû aratega ndiricheene. Nawe arooria “Nûû weenu ûkûngwata mbaru? Kûrî we?” Nabo aakûre batîkûûra baîrî kana bathatû barîa baakaragia mûnene baramûtegeera barî ndiricheene.

³³Arabeera, “Mwarûkieeni.” Nabo baramwarûkia. Tharike yaawe îraminyûkîra rûthingo, na mbarathi. Jehu nawe areetithîîria ngaarî yaawe ya ndwaa îgûrû rîa mwîrî jwa Jezebeli.

³⁴Jehu nawe arakûrûka nyomba ararîa na aranyua, aracoka arauga, “Nandî menyeni bwa mûka ûûjû ûûmûrume, bûmûthike nîûntû nî mwarî wa mûnene.”

³⁵Îndî rîrîa beetîre kûmûjûkia bamûthika, bareethîra kîrûitû gîa kîongo gîonka, na marûitû ja magûrû, na ja njara ciaawe.

³⁶ Rîrîa Jehu aamenyithîrue ûrîa gwakara arauga atîrî, “Bûu nîbu ûntû bûrîa MWATHANI eerîre kîroria Elija, auge ûjû: ‘Mwîrî jwa Jezebeli jûkarîîrwa nî kurû nthîgûrûûne ya Jezereeli.

³⁷Ningî mwîrî jwa Jezebeli, jûkanyagua jûûjûre kunthe ta ntaka kûû Jezereeli na gûtî we ûkaajûmenya.’”