Read KIMERU BIBLE PROTESTANT EDITION 1Ma 10 Bible Online

1Ma 10 - KIMERU BIBLE PROTESTANT EDITION bible

1Ma 10

¹Atîrî, Afilisti nî baaithûkîîre Aisraeli. Nabo Aisraeli baramatûka, bagûkinya kîrîmeene kîa Giliboa barooragwa babaingî mono.

²Saûlû na ataana baawe nî baamatûkîre na Afilisti bareengana nabo na barooraga Jonathani, na Abinadabu na Malikishua.

³Ndwaa nî yaang'eentere mono na Saûlû ararathwa na mîgwî nî anthû. Nawe areekîrwa ngûma.

⁴Rîu Saûlû areera mûkamati wa mathaga jaawe ja ndwaa akûûre rûchiû amûtumbûre nîkenda anthû ba Afilisti batîkamûgwate bamûnyamaaria. Îndî mûkamati wa mathaga jaawe ja ndwaa nî aaregere nîûntû bwa kûmûtîîa. Tontû bûû, Saûlû arajûkia rûchiû rwaawe araciaanda kîrî ru.

⁵Rîu mûkamati wa mathaga ja ndwaa wa Saûlû akwona Saûlû agûkua, arajûkia rûchiû araciaanda kîrî ru.

⁶Ûu nîu Saûlû amwe na ataana baawe bo bathatû na antû ba mûciî jwaawe baathirîrue.

⁷Rîrîa antû ba Israeli barîa baatûûraga mûgwanthîîne baigîrue atî njûûrî ya Israeli ikûmatûka na atî Saûlû amwe na ataana baawe bakûûragwa, nî baamatûkîre baratiga ntûûra ciaao. Rîu Afilisti bareeta gûtûûra ku.

⁸Rûûneene rîrîa Afilisti beetîre gûtaa birîa njûûrî ya Israeli yaarî nabio, nî beethîîre biimba bia Saûlû na ataana baawe kûu kîrîmeene kîa Giliboa.

⁹Barajûkia mathaga jarîa Saûlû aarî najo na baramûgiita mûtwe. Baratûmana kunthe nthîgûrûûne yaao ta Afilisti nîkenda antû bamenyithua ûrîa gwakarîka na bamenyithia mîrungu yaao ya mîng'uanano na antû baao.

¹⁰Bareeka mathaga ja Saûlû kîromberoone kîa mîrungu yaao na baraangîîra mûtwe jwa Saûlû kîromberoone kîa Dagoni mûrungu jwaao.

¹¹Îndî Rîrîa antû bonthe barîa baatûûraga Jabeshi-gileadi baaigîrue ûrîa Afilisti baathithîria Saûlû,

¹²arûme barîa ang'eentu nî beetîre barajûkia biimba bia Saûlû na ataana baawe, barabiikia Jabeshi. Rîu barabithika akuî na muuru jûrîa jwaarî kûu Jabeshi, na baraciata biakûrîa ntukû mûgwanja.

¹³ Tontû bûû, Saûlû arakua nîûntû bwa kûrega gwîtîkia MWATHANI na kûrega kwathîkîra maathana jaawe. Ningî nî eetaga gûcwaa nkuagaya na kîrîra kuuma kîrî roho cia antû barîa baakuîre.

¹⁴Saûlû atooragia nkuagaya kuuma kîrî MWATHANI. Tontû bûû, MWATHANI aramûûraga na aranenkanîra waathani kîrî Daudi mûtaana wa Jesii.