Read KIMERU BIBLE PROTESTANT EDITION 1Ma 11 Bible Online

1Ma 11 - KIMERU BIBLE PROTESTANT EDITION bible

1Ma 11

¹Kûrakara atîrî, atongeeria bonthe ba Israeli nî boothûranîre kîrî Daudi kûu ntûûreene ya Heburoni, baramwîra atîrî, “Tuî tûrî ba rûrîîjo rûmwe naagwe.

²Îgiita rîrîraaja rîkûrûkîte, o rîrîa Saûlû aarî mûnene, nîgwe waatongagîîria njûûrî ya Israeli ûkamiikia ndweene. MWATHANI Mûrungu waaku nî aakwîrîre atî nîgwe ûkaa mûtongeeria wa antû baawe Israeli.”

³Tontû bûû, atongeeria ba Israeli bareeta kûu ntûûreene ya Heburoni kîrî mûnene Daudi na bareeka kîrîkanîro nawe na baramûtûûrîria maguta araa mûnene o ta ûrîa MWATHANI eerîte Samueli.

⁴ Rîu Daudi amwe na atongeeria ba Israeli bonthe bareeta ntûûreene ya Jerusalemu tayo Jebusi kûrîa Ajebusi batûûraga.

⁵Ajebusi nî beerîre Daudi atîrî, “Bûtîûmba gûkûrûka gûkû.” Îndî amwe na bûu, Daudi nî baakûrûkîre na barataa giitîîro kîa Zaiuni, na bareeta ntûûra îîu, Ntûûra ya Daudi.

⁶Daudi areera atongeeria atîrî, “Ûrîa ûkaa wa mbere kûûraga Mûjebusi nîwe ûkaa mûtongeeria wa njûûrî.” Tontû bûû, Joabu ûrîa ng'ina aarî Zeruia araa wa mbere kwithûka, nawe araa mûtongeeria wa njûûrî.

⁷Daudi aratûûra giitiiroone kîu. Tontû bûû, kûreetwa “Ntûûra ya Daudi.”

⁸Mûnene Daudi araakîthia rûthingo rwa ntûûra îîu gûkurukana kwaambîrîria arîa gweetagwa Milo.[1] Nawe Joabu araaka kûngî kunthe kûrîa gwatigeere.

⁹Mûnene Daudi nî aagîîre nkuma na îgweta nîûntû MWATHANI Mweneinya nî aarî amwe nawe.

¹⁰Iji nîcio nchamba cia ndwaa cia mûnene Daudi irîa ciaatûmîre aa mûnene na iramûteetheeria waathaniine. Kinya antû ba Israeli bonthe nî baamûteethereerie o ta ûrîa MWATHANI aaugîîte.

¹¹Wa mbere aarî Jashobeamu wa kuuma mwîrîgeene jwa Hakimoni. Aarî mûtongeeria wa “Barîa bathatû.”[2] Nîwe wooragîre anthû magana jathatû na îtumo.

¹²Ûngî kîrî bau bathatû aarî Eleazari mûtaana wa Dodo kuuma mwîrîgeene jwa Ahohi.

¹³Nîwe baarî na Daudi antû gweetagwa Pasi-damimu rîrîa Afilisti baabaithûkîîre. Daudi na Eleazari baarî muundeene jwaarî na mûnyaki îgiiteene rîu. Nayo njûûrî ya Israeli îramatûka njûûrî ya Afilisti.

¹⁴Daudi na Eleazari nî baarwîrîîre na Afilisti kûu muundeene jwa mûnyaki na MWATHANI arabateethia baroomba Afilisti ndweene îîu.

¹⁵Nchamba ithatû irîa ciaarî atongeeria ba asikarî mîrongo îthatû nî beetîre kîrî Daudi arîa aakaraga gîkurunguune kîa Adulamu. Îgiiteene o rîu, Afilisti nî baambîte kambî yaao kîguuruune kîa Refaimu.

¹⁶Îgiita rîu Daudi aarî giitiiroone kîu. Kambî îrîa nene ya Afilisti yaarî ntûûreene ya Bethlehemu.

¹⁷Daudi arairîrîîria akiugaga atîrî, “Wûi këethîra kûrî we woonora wa gûnkuundia rûûjî kuuma kîthimeene kîa Bethlehemu kîrîa kîrî akuî na mpingîro ya ntûûra!”

¹⁸Nchamba irîa ithatû nacio irookîîra na irakûrûkîîra kambîîne ya Afilisti na barataa rûûjî kîthimeene kîrîa kîaarî akuî na mpingîro ya ntûûra ya Bethlehemu. Bararetera Daudi. Îndî Daudi ararega kûrûnyua ararwîtûûra nthîgûrû ta kîgongwana kîrî MWATHANI,

¹⁹akiugaga atîrî, “Ndîciîtia kîrî MWATHANI nkauga-ntîrûnyua nîûntû kûnyua rûûjî rûrû nî ta kûnyua tharike ya antû baba baciîkîîre ûgwatiine nîkenda beeta kûrûtaa.” Nîu ararega kûrûnyua. Mantû jau nîjo nchamba iu cia ndwaa ciaathithîrie.

²⁰Nchamba îngî yaarî Abishai mûtaana wa ng'ina wa Joabu. Aarî mûtongeeria wa asikarî mîrongo îthatû (300). Nîwe waarwîre arooraga anthû magana jathatû na îtumo. Ûu nîu acioneere îgweta o ûmwe na barîa bathatû.

²¹Nîwe waarî na îgweta nkûrûki ya bau bangî mîrongo îthatû na kinya araa mûtongeeria waao. Îndî ataarî na îgweta nkûrûki ya nchamba irîa ithatû.

²²Benaia mûtaana wa Jehoiada aarî nchamba kuuma Kabuzeeli. Nî aathithîtie mantû jamanene. Bûmwe bwaajo nî kûûraga nchamba ijîîrî cia ndwaa cia njûûrî ya Moabu. Ntukû kwaarî na nkamia, nî eenamîre îriinyeene na arooraga ngatûnyi.

²³Ningî nî ooragîre muntû ûmûnene kuuma Misri ûrîa waarî na ûraaja bwa mita ijîîrî na nusu (2.5m). Mûmisri ûu aarî na îtumo rîrînene. Benaia nawe aarî na nchûgûma. Benaia aramwithûkîra aramûtuunya îtumo rîu aramûûraga narîo.

²⁴Jau nîjo mantû jamanene jarîa Benaia mûtaana wa Jehoiada aathithîrie. Najo jaratûma aragîa îgweta o ta nchamba irîa ithatû.

²⁵Tontû bûû, aragîa îgweta mono kîrî asikarî barîa mîrongo îthatû, îndî rîtakinya rîa asikarî barîa bathatû. Daudi aramweethia muntû wa kûmûkaragia.

²⁶Nchamba îngî cia ndwaa cia njûûrî ya Israeli nî iji: Asaheli mûtaana wa ng'ina wa Joabu, ûngî nî Elihanani mûtaana wa Dodo wa kuuma ntûûreene ya Bethlehemu,

²⁷na Shamothi wa kuuma Harodi, na Helezi wa kuuma Peloni.

²⁸Ûngî aarî Ira mûtaana wa Ikeshi wa kuuma Tekoa, na Abiezeri wa kuuma Anathothi,

²⁹na Sibekai wa kuuma Husha, na Ilai wa kuuma Ahohi.

³⁰Ningî nî kwaarî na Maharai na Heledi mûtaana wa Baanaha wa kuuma Netofa.

³¹Ithai mûtaana wa Ribai wa kuuma Gibea ya Benjamini, na Benaia wa kuuma Pirathoni.

³²Bangî baarî Hurai wa kuuma akuî na ndûûjî cia Gaashi na Abieli wa kuuma Arabati,

³³na Azimavethi wa kuuma Baharumu, na Eliaba wa kuuma Shaaliboni,

³⁴na Hashemu wa kuuma Gizoni na Jonathani wa mûtaana wa Shagee wa kuuma Harari.

³⁵Ningî nî kwaarî na Ahiamu mûtaana wa Sakari wa kuuma Harari na Elifali mûtaana wa Uru,

³⁶na Heferi wa kuuma Mekera na Ahija wa kuuma Peloni,

³⁷na Heziro wa kuuma Karimeli na Naarai mûtaana wa Ezibai.

³⁸Bangî baarî Joeli mûtaana wa ng'ina wa Nathani. Mibihari mûtaana wa Hagiri,

³⁹na Zeleki wa kuuma Amoni, na Naharai wa kuuma Beerothi ûrîa waarî mûkamati wa mathaga ja ndwaa ja Joabu mûtaana wa Zeruia.

⁴⁰Ningî nî kwaarî na Ira na Garebu ba kuuma Ithiri,

⁴¹na Uria wa kuuma Hiti, na Zabadi mûtaana wa Ahilai,

⁴²na Adina mûtaana wa Shiza wa kuuma mwîrîgeene jwa Rubeni. Adina nîwe waarî mûtongeeria wa asikarî mîrongo îthatû kuuma mwîrîgeene jûu.

⁴³Nchamba ingî ciaarî Hanani mûtaana wa Maaka na Joshafati wa kuuma Mithini,

⁴⁴na Uzzia wa kuuma Ashiterathi, na Shama na Jeieli baarî ataana ba Hothamu ba kuuma Aroeri,

⁴⁵Jediaeli na mûtaana wa ng'ina Joha barîa îthe aarî Shimuri baarî ba kuuma Tizi.

⁴⁶Ningî nî kwaarî na Elieli wa kuuma Mahavi, na Jeribai na Joshavia barîa baarî ataana ba Elinaamu, na Ithima wa kuuma Moabu.

⁴⁷Nchamba ingî ciaarî Elieli na Obedi na Jaasieli ba kuuma Mezoba.