Read KIMERU BIBLE PROTESTANT EDITION 1Ma 12 Bible Online

1Ma 12 - KIMERU BIBLE PROTESTANT EDITION bible

1Ma 12

¹Asikarî baba nîbo baagwete Daudi mbaru rîrîa aarî Zikilagi amatûkîte kuuma kîrî mûnene Saûlû. Nabo baarî nchamba cia ndwaa irîa ciamwigîkîte mono îgiita rîa ndwaa.

²Nchamba iu ciaarî cia mwîrîga jwa Benjamini o ta Saûlû. Baatumagîra njara ya ûmotho o ta ya ûrîo rîrîa baarathaga mîgwî kana bakîgera maiga na gîkûtha.

³Barîa batongeeretie nî Ahiezeri na Joashi bo baîrî baarî ataana ba Shemaa kuuma Gibea. Asikarî bangî ba gîkundi kîu baarî: Jezieli na Peleti ataana ba Azimavethi. Ningî nî kwaarî na Beraka na Jehu wa kuuma Anathothi,

⁴Ishimaia kuuma Gibeoni ûrîa waarî ûmwe wa nchamba irîa mîrongo îthatû na aarî mûtongeeria waacio, na Jeremia na Jahazieli na Johanani na Jozabadi wa kuuma Gedera

⁵na Eluzai na Jerimothi na Bealia na Shemaria na Shefatia wa kuuma Harifu.

⁶Bangî baarî Elikana na Ishia na Azareli na Joezeri na Jashobeamu wa kuuma mwîrîgeene jwa Kora,

⁷na Joela na Zebadia barîa baarî ataana ba Jerohamu wa kuuma Gedori.

⁸Kuuma mwîrîgeene jwa Gadi nî kwaarî na nchamba cia ndwaa irîa ciaang'eenti mono na ciaaijî kûrwaa îgîtumagîra rong'o na matumo. Moothiû jaao joonanagia barî na ûchamba ta bwa ngatûnyi na baarî rwîro mono ta nkûrûngû. Bo nî beetîre kîrî Daudi kûrîa aarî giitiiroone rwanda.

⁹Mûtongeeria waao aarî Ezeri na wa baîrî aarî Obadia. Wa bathatû aarî Eliabu,

¹⁰na wa bana aarî Mishimana. Wa bataano aarî Jeremia,

¹¹na wa bataantatû aarî Atai, na wa mûgwanja aarî Elieli,

¹²na wa banaana aarî Johanani na wa kenda aarî Elizabadi.

¹³Nawe wa îkûmi aarî Jeremia, na wa îkûmi na ûmwe aarî Makibanai.

¹⁴Bamwe ba nchamba iu cia kuuma mwîrîgeene jwa Gadi nî baaere atongeeria ba asikarî ûû îgana na bangî baraa atongeeria ba asikarî ûû ngiri îmwe.

¹⁵Kûrî mweriine jwa mbere, Asikarî bau nî baunîre mûuro jwa Jorodani rîrîa jwaimbîte mono jwaunîkara. Baratûma antû barîa baatûûraga mûgwanthîîne jûu bamatûka bwa gaiti na bwa rûgûrû.

¹⁶Asikarî bamwe ba mwîrîga jwa Benjamini na jwa Juda beetîre kîrî Daudi kûrîa aiciithîte giitiiroone.

¹⁷Daudi areeta kûbathagana arabooria atîrî, “Bûkëethîrwa bwîjîte kîrî ni ta acoore nîkenda bûnteetheeria, ngaatuma ûcoore naabuî. Îndî bûkëeja kwîthîrwa bwîjîte nîkenda bûnkunyanîra kîrî anthû baakwa na gûtî u ni nthithîtie bûbûûî, Mûrungu wa biûjûjû bieetû akamenya mantû jau na abûkanûkie.”

¹⁸Roho wa Mûrungu aratonya kîrî Amasai ûrîa waarî mûtongeeria wa asikarî mîrongo îthatû. Nawe Amasai arauga atîrî, “Itû Daudi, tûrî baaku, tûrî kîmwe naagwe gwe mûtaana wa Jesii. Thîîrî, thîîrî îrokara naagwe ûkiri bûkare na barîa bagûteethagia nîkwîthîrwa Mûrungu waaku nîwe ûgûgûteethia.” Tontû buû Daudi arabetîkîria na arabaeethia atongeeria ba njûûrî yaawe.

¹⁹Asikarî bamwe kuuma mwîrîgeene jwa Manase nî beetîre kîrî Daudi îgiiteene rîrîa Afilisti baamûgweete mbaru nîkenda arwaa na Saûlû. (Daudi ataateethereria Afilisti, nîûntû atongeeria baao nî baarî bakuuga atî Daudi oomba kûbakunyanîra kîrî mûnene Saûlû. Tontû bûû, Afilisti bareera Daudi acoke Zikilagi.)

²⁰Daudi eetîte Zikilagi nî aagwatîrwe mbaru nî asikarî ba mwîrîga jwa Manase na bareetania na Daudi Zikilagi. Nabo nî Adinaha na Jozabadi na Jediaeli na Mikaeli na Jozabadi na Elihu na Zilethai. Bau baarî atongeeria ba Asikarî ngiri inyingî kûu mwîrîgeene jwa Manase.

²¹Nîbo baatethereerie Daudi amwe na gîkundi kîaawe tontû bo baarî nchamba cia bata cia ndwaa. Ningî nyumeene nî baaere atongeeria ba njûûrî ya Israeli.

²²O ntukû o ntukû antû nî beetaga kîrî Daudi kûmûteethia. Tontû bûû, njûûrî yaawe îraneenea mono.

²³Iji nîcio ntari cia ikundi bia asikarî birîa bieetîre kîrî Daudi kûu Heburoni nîkenda bamûteetheeria aa mûnene antûûne a Saûlû o ta ûrîa MWATHANI aaugîîte.

²⁴Kuuma mwîrîgeene jwa Juda, asikarî barîa baarûjaga barî na matumo na rong'o baarî ngiri ithanthatû cia magana janaana (6,800).

²⁵Kuuma mwîrîgeene jwa Simioni nî kwaarî na nchamba cia ndwaa cia îgweta ngiri mûgwanja cia îgana rîmwe (7,100).

²⁶Mwîrîgeene jwa Alawi kwaarî na asikarî ngiri inya cia magana jatantatû (4,600).

²⁷Jehoiada mûtongeeria wa nchiarwa cia Aaroni aarî na asikarî ngiri ithatû cia magana mûgwanja (3,700)

²⁸Zadoki aarî muntû ûmwîthî na nchamba ya ndwaa. Nawe eetîre kîrî Daudi arî na atongeeria ba njûûrî mîrongo îîrî na baîrî (22) kuuma mwîrîgeene jwaao.

²⁹Kuuma mwîrîgeene jwa Benjamini, jûrîa Saûlû aamîte, asikarî ngiri ithatû bareeta kîrî Daudi (3,000). Babaingî ba antû ba mwîrîga jwa Benjamini baagwatîte mûciî jwa Saûlû mbaru.

³⁰Kuuma mwîrîgeene jwa Efuraimu nchamba cia ndwaa irîa ciaarî na îgweta mîciîne yaao nî beetîre kîrî Daudi asikarî ngiri mîrongo îîrî cia magana janaana (20,800).

³¹Kuuma kîrî nusu ya mwîrîga jwa Manase nî kwathuuri asikarî ngiri îkûmi na inyaanya (18,000) ba gwîta kweethia Daudi mûnene.

³²Kuuma mwîrîgeene jwa Isakari atongeeria magana jaîrî (200) barîa baijî mantû ja nthîgûrû ya Israeli. Antû bau amwe na asikarî bonthe barîa batongagîîria nî beetîre kîrî Daudi.

³³Kuuma mwîrîgeene jwa Zebuloni asikarî ngiri mîrongo îtaano (50,000) barîa baarî nchamba cia ndwaa irîa ciaaijî kûrwaa mono bagîtumagîra mathaga jonthe ja ndwaa nî beetîre kîrî Daudi kûmûteethia.

³⁴Kuuma mwîrîgeene jwa Nafutali atongeeria ba njûûrî ngiri îmwe (1,000) barîa baatongeeretie asikarî ngiri mîrongo îthatû na mûgwanja (37,000) barîa baatumagîra rong'o na matumo, nî beetîre kîrî Daudi.

³⁵Kuuma mwîrîgeene jwa Dani, asikarî ngiri mîrongo îîrî na inaana na magana jatantatû (28,600) barîa baithuranîrîte nîûntû bwa ndwaa nî beetîre kîrî Daudi.

³⁶Kuuma mwîrîgeene jwa Asheri, asikarî ngiri mîrongo îna (40,000) barîa baithuranîrîte nîûntû bwa ndwaa nî beetîre kîrî Daudi.

³⁷Kuuma mwîrîgeene jwa Rubeni na jwa Gadi na nusu ya mwîrîga jwa Manase barîa baatûûraga bwa gaiti ya mûuro jwa Jorodani nî kwaumîre asikarî ngiri îgana na mîrongo îîrî (120,000) barîa baarî na mathaga jonthe ja ndwaa nî beetîre kîrî Daudi.

³⁸Asikarî bau bonthe baibangîte ta ûrîa baibangaga beetîte ndweene nî beetîre kîrî Daudi kûu Heburoni barî na yerekeeria rîa kûmweethia mûnene wa Israeli yonthe. Kinya antû bangî ba Israeli nî baagwatanîrîte na yeerekeeria rîu.

³⁹Barakara na Daudi mîthenya îthatû bakîrîîjaga na kûnyua birîa biaathuranîri nî Aisraeli bangî barîa baakaraga Heburoni amwe na Daudi.

⁴⁰Antû bangî ba Israeli baaumîte mîîrîgeene ya kûraaja, tayo Isakari na Zebuloni na Nafutali, nî beetîre kîrî Daudi bamwikîrîîtie irio, biaakamati nî mbarathi na nkamîîra na nyûmbû na ndeegwa. Irio biu biaarî bia mîthemba îmiingî. Nabio biaarî mûtu, mîgaate, îthithîtue na nchiara cia nkûû, na imaanja bia nzabibû injûmo na ndibei na maguta na ndeegwa na ntûrûme. Baathithîrie ûu nîkwîthîrwa Aisraeli nî baagwîrîîtue mono.