Read KIMERU BIBLE PROTESTANT EDITION 1Ma 13 Bible Online

1Ma 13 - KIMERU BIBLE PROTESTANT EDITION bible

1Ma 13

¹Kûrakara atîrî, Daudi aacwîre kîrîra kuuma kîrî atongeeria barîa batongagîîrîa asikarî ngiri o ngiri, na kinya barîa baatongagîîria asikarî îgana o îgana na kuuma kîrî atongeeria bangî bonthe ba Israeli.

²Rîu Daudi areera antû bau boothûranîte ba Israeli atîrî, “Këethîra nî bûkwona kwagîrîte na kwëethîrwa nî wendi bwa MWATHANI Mûrungu weetû, nî tûtûmane kîrî antû bangî ba Israeli, na athînjîri-Mûrungu na Alawi barîa batûûraga ntûûreene na kinya bûûrîîne, beeje kîrî tuî.

³Rîu tûrî amwe twîte tûgîîre Îthandûkû rîa kîrîkanîro kîa Mûrungu weetû, nîkwîthîrwa nî tûkarîte tûgîtîîjîrîte rîrîa Saûlû aathanaga.”

⁴Antû bau bonthe ba Israeli barîa boothûranîte, bareetîkîîria kûthithia ûntû bûu nîûntû nî baaigîrue bûrî bûbwega.

⁵ Tontû bûû, Daudi aroothûrania antû ba Israeli bonthe kuuma mwankeene jwa Misri mwanka mûcîcîbîroone jwa Hamathi jûrîa jûrî bwa ûmotho. Aaboothûranîrie nîkenda bagîîra Îthandûkû rîa kîrîkanîro kuuma Kiriathi-jearimu.

⁶ Daudi amwe na antû ba Israeli bonthe bareeta ntûûreene ya Baala, (tayo ntûûra ya Kiriathi-jearimu) îrîa yaarî nthîgûrûûne ya Juda, nîkenda bagîîra Îthandûkû rîa kîrîkanîro kîa Mûrungu ku. Îthandûkû rîu nîrîo rîagwetanagîrua na riîtwa rîa MWATHANI ûrîa ûkaragîra rûriga rwa Ûnene arî îgûrû rîa akerubimu.

⁷Bareeta barajûkia Îthandûkû rîa kîrîkanîro kuuma nyomba ya Abinadabu na bararîrîkîîra ngaarîîne înjerû ya ng'ombe. Nabo Uzza na Ahio baratongeeria ngaarî îîu.

⁸Daudi amwe na antû ba Israeli bonthe bareeta bagîkûngûagîra Mûrungu na inya yaao yonthe. Bareeta bakîringaga wandîîndî na inanda bia ndigi inyingî na tamburini, na thaani cia kûringithania, na tarumbeta.

⁹Bagûkinya îtîîriine rîa Kidoni, ndeegwa iragiitara nawe Uzza aragwatîîra Îthandûkû rîa kîrîkanîro.

¹⁰MWATHANI arathûûra mono nîûntû bwa Uzza kûgwatîîra Îthandûkû rîa kîrîkanîro. MWATHANI aramûûragîra o au.

¹¹Antû au Uzza aakuîrîîre kûreetwa Perezi-uza [3] na nou gwîtagwa mwanka naarua tûrî. Daudi arathûûra mono akwona ûrîa MWATHANI akanûkia Uzza.

¹²Rîu Daudi arakîra Mûrungu mono, arooria atîrî, “Nîatîa mpûûmba gwikia Îthandûkû rîa kîrîkanîro gwaakwa?”

¹³Tontû bûû, Daudi ataanîre na Îthandûkû rîa kîrîkanîro Jerusalemu, îndî aarîtigîre mûciî jwa Obediedomu ûrîa waarî wa kuuma ntûûreene ya Gathi.

¹⁴ Narîo Îthandûkû rîa kîrîkanîro rîrakara mûciî jwa Obediedomu mîeri îthatû. MWATHANI aratharima mûciî jûu amwe na bionthe birîa biaarî ku.