Read KIMERU BIBLE PROTESTANT EDITION 1Ma 14 Bible Online

1Ma 14 - KIMERU BIBLE PROTESTANT EDITION bible

1Ma 14

¹Hiramu mûnene wa Tiro nî aatûmîre antû kîrî Daudi kûu Jerusalemu. Aabatûmîre baikîria Daudi mîtarakwa amwe na abundi ba maiga na atea ba mbaaû nîkenda bamwakîra gîkaro kîa mûnene.

²Nîrîo Daudi aamenyere atî MWATHANI nî amûrikithîtie waathaniine bwa Israeli yonthe na atî MWATHANI nî amûthûûngûûrîte nîûntû bwa antû baawe ba Israeli.

³Daudi arî Jerusalemu nî aagûrîre aka bangî babaingî. Nabo baramûciarîra aana babaingî, nthaka na aarî.

⁴Nabo baba nîbo aana barîa Daudi aagîîre nabo arî Jerusalemu: Shamua na Shobabu na Nathani na Solomoni

⁵na Ibihari na Elishua na Elipeleti na

⁶Noga na Nefegi na Jafia.

⁷Bangî baarî Elishama na Beeliada na Elifeleti.

⁸Rîrîa Afilisti baigîrue atî Daudi akweethua mûnene wa Israeli yonthe, njûûrî ciaao nî cieetîre kûmwithûkîra imûgwata. Îndî Daudi akûmenya ûntû bûu araumagara nîkenda eeta kûbaithûkîra.

⁹Nabo Afilisti bagûkinya kîguuruune kîa Refaimu, nî baambîrîîrie kwithûkîra na gûtaa tûtûûra tûrîa twaarî ku.

¹⁰Daudi araromba kîrîra kuuma kîrî Mûrungu, aramûûria atîrî, “Mbîte nkaithûkîre Afilisti? Ûgatûma mboombe ndweene?” MWATHANI areera Daudi atîrî, “Ita ûkabaithûkîre na ngatûma ûboombe.”

¹¹Rîu Daudi na njûûrî yaawe bareeta Baali-perazimu baraithûkîra njûûrî ya Afilisti na baraboomba ndweene. Daudi arauga atîrî, “Mûrungu agûntumîra ndakondoria anthû baakwa o ta ûrîa rûûjî rwa îkondoria rûthithagia.” Tontû bûû, antû au kûreetwa Baali-perazimu.

¹²Rîrîa njûûrî ya Afilisti yaamatûkîre nî yaatigîre mîrungu yaao. Nawe Daudi arauga mîrungu îîu îîthîîrue.

¹³Nabo Afilisti nî bacokere o kaîrî kwithûkîra antû barîa baatûûraga kîguuruune kîa Refaimu.

¹⁴O kaîrî Daudi araromba kîrîra kuuma kîrî Mûrungu. Mûrungu aramwîra atîrî, “Ûkábaithûkîra bwerekanîte nabo îndî îteeni bûbaume na bwa nyuma rûteere rûrîa rûngî rûrî akuî na mîtî ya balisamu.

¹⁵“Naagwe rîrîa ûkaigua gîtuma ta kîa makinya jagûkinyanga îgûrû rîa mîtî ya balisamu, rîu wîîte ûbaithûkîre naani ngeeta mbere yaaku na ntûme ûûmbe njûûrî ya Afilisti ndweene.”

¹⁶Daudi arathithia o ûrîa Mûrungu amwîrîte nacio njûûrî cia Israeli irooraga asikarî ba Afilisti kuuma Gibeoni mwanka Gezeri.

¹⁷Daudi aragîa nkuma nayo îramenyeka nthîgûrûûne cionthe. MWATHANI aratûma Daudi akîrwa mono nî antû ba mîgongo yonthe.