Read KIMERU BIBLE PROTESTANT EDITION 1Ma 15 Bible Online

1Ma 15 - KIMERU BIBLE PROTESTANT EDITION bible

1Ma 15

¹Daudi nî aakîre nyomba ciaawe kûu ntûûreene ya Jerusalemu na arathithia antû arîa Îthandûkû rîa kîrîkanîro rîgeekagwa na araamba îema o.

² Rîu Daudi areera antû atîrî, “Gûtî bangî babuîrîte gûkamata Îthandûkû rîa kîrîkanîro tiga Alawi bonka, tontû nîbo Mûrungu aathuurîre barîkamataga na bamûtumîkagîra magiita jonthe.”

³Tontû bûu Daudi arauga antû ba Israeli bonthe boothûrane kûu Jerusalemu nîkenda Îthandûkû rîa kîrîkanîro rîgîîrwa na riikwa antû arîa aathuranîrîte.

⁴Daudi arauga ataana ba Aaroni na Alawi boothûrane.

⁵Kuuma mwîrîgeene jwa Lawi, nî kwaumîre Urieli wa rûrîîjo rwa Kohathi. Urieli nîwe waarî mûtongeeria wa antû îgana rîa mîrongo îîrî (120) ba ndûgû yaao.

⁶Kuuma kîrî rûrîîjo rwa Merari, nî kwaumîre Asaia, ûrîa watongeererie antû magana jaîrî ja mîrongo îîrî (220) ba ndûgû ciaao.

⁷Kuuma kîrî rûrîîjo rwa Gerishoni nî kwaumîre Joeli ûrîa watongeeretie antû îgana rîa mîrongo îthatû (130) ba ndûgû ciaao.

⁸Kuuma kîrî rûrîîjo rwa Elizafani nî kwaumîre Shemaia ûrîa waatongeeretie antû magana jaîrî (200) ba ndûgû ciaao.

⁹Kuuma kîrî rûrîîjo rwa Heburoni nî kwaumîre Elieli ûrîa waatongeeretie antû mîrongo înaana (80) ba ndûgû ciaao.

¹⁰Kuuma kîrî rûrîîjo rwa Uzieli nî kwaaumîre Aminadabu ûrîa waatongeeretie antû îgana na îkûmi na baîrî (112) ba ndûgû ciaao.

¹¹Rîu Daudi nî aaugîre eetîrwe athînjîri-Mûrungu baîrî tabo Zadoki na Abiathari. Ningî arauga eetîrwe Alawi bataantatû: tabo Urieli, na Asaia, na Joeli, na Shemaia, na Elieli na Aminadabu.

¹²Rîu arabeera atîrî, “Buî nî buî atongeeria ba mîciî yeenu. Itherieni amwe na antû ba ndûgû cieenu nîkenda bwîta kûgîîra Îthandûkû rîa kîrîkanîro kîa MWATHANI Mûrungu wa Israeli na bûriikie antû arîa athuranîri nîûntû bwaarîo.

¹³Rîrîa rîngî twarîgîîrîte, tûtaathithîrie ûrîa kwaagîîrîte. Tontû bûû, MWATHANI Mûrungu weetû nî aatûkanûkîrie nîûntû bwa kûrega kûmûthaathayia ûrîa kwagîrîte.”

¹⁴Tontû bûû, athînjîri-Mûrungu na Alawi baraitheria nîkenda beeta kûgîîra Îthandûkû rîa kîrîkanîro kîa MWATHANI Mûrungu waao.

¹⁵ Nîu Alawi bareekîra Îthandûkû rîa kîrîkanîro mîarîro îîrî bararîkamata nayo kûringana na ûrîa MWATHANI eerîte Musa, rîkamatagwe.

¹⁶Daudi aracoka areera atongeeria ba Alawi bathuure kuuma kîrî antû ba ndûgû ciaao antû barîa bageeta bakiinaga na bakîriingaga wandîîndî na inanda bia ndigi inyingî na thaani cia kûringithania.

¹⁷Alawi barathuura antû baba: Hemani mûtaana wa Joeli, na Asafu muntû wa ndûgû ciaao. Asafu aarî mûtaana wa Berekia. Ningî barathuura Ethani mûtaana wa Kushaia ûmwe wa mûciî jwa Merari.

¹⁸Ningî kuuma kîrî ndûgû o iu ciaao barathuura aini, tabo Zekaria, na Jaazieli, na Shemiramothi, na Jehieli, na Uni, na Eliabu, na Benaia, na Maaseia, na Matithia, na Elifelehu, na Mikineia, o amwe na akaria ba mpingîro tabo Obediedomu na Jeieli.

¹⁹Kîrî aini bau, baba nîbo baarî ba kûringithania thaani cia îturutia rîrîa bakwiina: Hemani, na Asafu, na Ethani.

²⁰Nabo barîa baaringaga kînanda kîa ndigi rîrîa rwîmbo rwa Alamothi [4] rwainagwa, baarî Zekaria, na Azieli, na Shemiramothi, na Jehieli, na Uni, na Eliabu, na Maaseia, na Benaia.

²¹Antû barîa baaringaga wandîîndî rîrîa rwîmbo rwa Sheminithi [5] rwainagwa baarî Matithia, na Elifelehu, na Mikineia, na Obediedomu, na Jeieli na Azazia.

²²Kenania arathuurwa gûtongeeria aini bau ba Alawi nîûntû aarî kîtharia kîa ndwîmbo.

²³Berekia na Elikana baarî akaria mpingîro cia kûu Îthandûkû rîa kîrîkanîro rîakaraga.

²⁴Athînjîri-Mûrungu baba nîbo baaringaga tarumbeta barî au mbere ya Îthandûkû rîa kîrîkanîro. Nabo nî Shebania, na Joshafati, na Nethaneli, na Amasai, na Zekaria, na Benaia na Eliezeri. Nabo Obediedomu na Jehia baarî akaria mpingîro cia kûu Îthandûkû rîa kîrîkanîro rîaarî.

²⁵Tontû bûû, mûnene Daudi amwe na atongeeria ba Israeli, na atongeeria ba asikarî barîa batongagîîria asikarî ngiri na ngiri, nî beetîre bagwîrîtue kûgîîra Îthandûkû rîa kîrîkanîro kîa MWATHANI kuuma nyomba ya Obediedomu.

²⁶Nabo bararita igongwana bia ndeegwa mûgwanja na ntûrûme mûgwanja nîûntû MWATHANI nî ateetheeretie Alawi barîa bakamatîte Îthandûkû rîa kîrîkanîro.

²⁷Daudi na aini na Alawi barîa baakamatîte Îthandûkû rîa kîrîkanîro na Kenania ûrîa waarî mûtongeeria wa Aini bau, nî beekîrîte rwambambio rwaatumi na ndigi cia bamba. Ningî Daudi nî eekîrîte kaguû geetagwa efodi gaatumi na ndigi cia bamba.

²⁸Nîu antû ba Israeli bonthe baragîîra Îthandûkû rîa kîrîkanîro kîa MWATHANI bagîkûngûagîra na kwina bagîtumagîra ngoji, na tarumbeta, na thaani cia kûringithania. Ningî nî baainaga na inanda bia ndigi inyingî na wandîîndî.

²⁹Rîrîa Îthandûkû rîa kîrîkanîro rîatonyagua ntûûreene îîu ya Daudi, Mikali mwarî wa Saûlû arategeera ndiriceene aroona Daudi akiina akîthûngûthaga agwîrîîtue. Mikali arameena Daudi mono nîûntû bwa ûntû bûu.