Read KIMERU BIBLE PROTESTANT EDITION 1Ma 16 Bible Online

1Ma 16 - KIMERU BIBLE PROTESTANT EDITION bible

1Ma 16

¹Nabo baaraikia Îthandûkû rîa kîrîkanîro kîa Mûrungu bararîîka ndeene ya îema rîrîa Daudi aathuranîrîte nîûntû bwaarîo. Ningî bararita igongwana bia gwakîîria na bia gûcwaa thîîrî na Mûrungu.

²Daudi akûthiria kûrîta igongwana biu, aratharima antû ba Israeli riîtweene rîa MWATHANI.

³Ningî aragaîra antû bonthe ba Israeli biakûrîa. O muntû ëethîrwa aarî mûka kana ntomûrûme, anenkagîrwa mûgaate na kînuku kîa nyama imbakie na keki ya nzabibû injûmo.

⁴Daudi arathuura Alawi bamwe ba gûtongagîîria antû rîrîa bakûthaathayia Mûrungu akuî na îema rîrîa rîaarî na Îthandûkû. Ngûgî yaao yaarî ya kwina na gûkaatha MWATHANI Mûrungu wa Israeli.

⁵Asafu nîwe watongeeretie Alawi bau ba kwina, athingatwa nî: Zekaria mûnini wa Asafu, na Jeieli, na Shemiramothi, na Jehieli, na Matithia, na Eliabu, na Benaia, na Obediedomu, na Jeieli. Bau nîbo baariingaga inanda bia ndigi inyingî na wandîndî. Asafu nawe akaringa thaani cia kûringithania.

⁶Benaia na Jahazieli baarî athînjîri-Mûrungu barîa baaringaga tarumbeta magiita jonthe barî mbere ya Îthandûkû rîa kîrîkanîro.

⁷Ntukû îîu nîyo Daudi aeere Asafu na Alawi bangî ngûgî ya kwina ndwîmbo cia gûcokeria Mûrungu nkaatho.

⁸Kaathageeni MWATHANI bûrombage riîtweene rîaawe bûmenyithanagie ûrîa athithîtie kîrî antû bonthe.

⁹Mwinagîreeni na bûmûkumagie bwîranage mantû ja kûrigaria jarîa athithîtie.

¹⁰Kumagieni riîtwa rîaawe rîrîtheru buî bwinthe barîa bûthaathagia MWATHANI.

¹¹Îrîgagîîreeni MWATHANI bwîrîgagîîre inya yaawe bûmûthaathagie magiita jonthe.

¹²Ririkanageeni mantû ja kûrigaria jarîa athithîtie bûririkanage biama birîa aathithia na ûrîa aagiitanagîra îgamba ûrîa kwagîrîte.

¹³Buî bûrî ba rûrîîjo rwa Abrahamu ûrîa nthûûmba ya MWATHANI, buî nchiarwa cia Jakubu ûrîa aathuurîte.

¹⁴Nawe nîwe MWATHANI Mûrungu weetû nayo nthîgûrû yonthe nî iijî ûrîa agiitîte.

¹⁵Magiita jonthe nî aririkanaga kîrîkanîro kîrîa eekîte, na akaririkana wîrane bwaawe kinya nyuma ya nthukî ngiri.

¹⁶ Nakîo nî kîrîkanîro kîrîa eekanîîre na Abrahamu, na wîrane bûrîa eerîte Isaaka.

¹⁷ MWATHANI nî aarikithîrie kîrîkanîro kîu kîrî Jakubu ararikithîria antû ba Israeli kîrîkanîro kîrîa gîtîkorothira.

¹⁸Aramwîra atîrî, “Ngaakwaa nthîgûrû ya Kanaani yee kiigai gîaaku.”

¹⁹Îgiita rîu Aisraeli baarî babakai na baarî ageni nthîgûrûûne ya Kanaani.

²⁰Bagîîtaga kuuma nthîgûrû îmwe gwîta îngî bageeta kuuma waathaniine bûmwe mwanka bûngî.

²¹ Îndî Mûrungu ateetîkîîria muntû no ûrîkû abainyîîria; na nî aakaanagia anene batîkabathithîrie bûbûûî.

²²Akauga atîrî, “Bûkáthithîria antû baakwa barîa nthuurîte bûbûûî kana bûringithia iroria biaakwa.”

²³Inîreni MWATHANI buî antû ba nthîgûrû yonthe bwîranage mantû ja wonokio bwaawe ntukû cionthe.

²⁴Îîranageeni mantû ja ûkumio bwaawe mîgongoone yonthe bwîrage antû bonthe mantû jarîa athithîtie ja kûrigaria.

²⁵Nîkwîthîrwa MWATHANI nî ûmûnene na nî abuîrîte gûkumagua. Abuîrîte gûkîragwa nkûrûki ya mîrungu yonthe.

²⁶Mîrungu yonthe ya mîgongo îngî nî mîrungu ya mîng'uanano. Îndî MWATHANI nîwe woombîre îgûrû. Ûkumio na mwago nî kîrî MWATHANI, na kîûrûûne kîaawe nî gîkîthongi na kîrî inya.

²⁷Antû ba mîgongo nî baugage atî MWATHANI arî mwago na inya.

²⁸Kaathagîîrieni riîtwa rîa MWATHANI, bûkauga rîrî mwago, mûritagîreeni igongwana bûgîîta kîûrûûne kîaawe.

²⁹Kumagieni MWATHANI ûrîa kwagîrîte bûgeetaga kîûrûûne kîaawe kûmûritîra kîgongwana, na bûkathaathayia ûkumio bwa MWATHANI bwoneka.

³⁰Bûteeteme bûrî mbere yaawe buî antû ba nthîgûrû yonthe. Îî, nthîgûrû nî îrikîîtue na îtîûmba kwebaebua!

³¹Îgûrû na nthî nî biîre mîgongo atîrî, “MWATHANI nîwe waathanaga.”

³²Îria nî rîruurume na bionthe birîa bikaraga ku, ithaka nî bigwîrue o na bionthe birîa bikaraga ku!

³³Mîtî ya kîthaka nî iine îgwîrîîtue iinîre MWATHANI nîûntû akagiitîra nthîgûrû îgamba.

³⁴ Kaatheeni MWATHANI tontû nî ûmwega, nîkwîthîrwa kîaao kîaawe gîtîthiraga kinya rî.

³⁵Ningî bûmwîre atîrî, “Twonokie, itû Mûrungu mwonokia weetû, tûûthûranie na ûtwonokie tuume mîgongoone îngî îrîa tûrî, nîkenda tûûmba gûgûkaatha na gûkumia riîtwa rîaaku rîrîtheru.”

³⁶Kumieni MWATHANI Mûrungu wa Israeli, mûkumagie nandî na mwanka kenya na kenya! Antû bonthe barauga, “Amen! MWATHANI arokumua!”

³⁷Daudi nî aathuurîre Asafu amwe na Alawi bangî nîkenda batumîkaga au mbere ya Îthandûkû rîa kîrîkanîro kûringana na ûrîa kwaabangî o ntukû o ntukû.

³⁸Obediedomu na antû mîrongo îtaantatû na banaana (68) ba ndûgû ciaao nîbo baabateethagia ngûgîîne iu. Obediedomu na Hosa baarî akaria ba mpingîro. Obediedomu aarî mûtaana wa Jeduthuni.

³⁹Zadoki na athînjîri-Mûrungu bangî nîbo Daudi aathuurîre baamenyagîîra îema rîa MWATHANI rîa gûtirimanîra rîrîa rîaarî kûu Gibeoni.

⁴⁰Bau nîbo baathuuri nîkenda baritaga igongwana bia gwakîîrua kîritîroone kîa igongwana ntukû cionthe, rûkîîrî na ûgoro, o ta ûrîa kwaandîki waathoone bûrîa MWATHANI aanenkerete Israeli.

⁴¹Bangî barîa baathuuri nîkenda bateethagîîria baarî Hemani na Jeduthuni amwe na bangî barîa baaeei ngûgî ya gûkumagia MWATHANI nîûntû kîaao kîaawe nî gîa kenya na kenya.

⁴²Hemani na Jeduthuni nabo nî baamenyagîîra tarumbeta, na thaani cia kûringithanua rîrîa gûkwinwa na inaanda bingî. Nabo ataana ba Jeduthuni nîbo baathuuri bakaragia mpingîro.

⁴³ Rîu antû bonthe baraana kwaao. Nawe Daudi araana gûkarania na antû ba mûciî jwaawe.