Read KIMERU BIBLE PROTESTANT EDITION 1Ma 17 Bible Online

1Ma 17 - KIMERU BIBLE PROTESTANT EDITION bible

1Ma 17

¹Naku kûrakara atîrî, rîrîa Daudi aarî gîkaroone kîaawe kîa ûnene nî aatûmanîîre kîroria Nathani aramwîra atîrî, “Ni ntûûraga nyomba yaaki na mîtarakwa, îndî Îthandûkû rîa kîrîkanîro rîa MWATHANI rîkaraga îemeene.”

²Nathani nawe areera Daudi atîrî, “Thithia jarîa jonthe ûkwenda tontû MWATHANI arî amwe naagwe.”

³Îndî ûgoro bwa o ntukû îîu yongwa MWATHANI areera Nathani atîrî,

⁴“Îta wîîre nthûûmba yaakwa Daudi atî ni MWATHANI ndiuga atîrî: Ûtîmbakîra nyomba ntûûra ku.

⁵Nîkwîthîrwa ntatûûra nyomba kuuma rîrîa ndaatongeererie antû ba Israeli mwanka naarua tûrî. Îndî ni ntwîre kûthaamathaama kuuma îema rîmwe gwîta rîngî, na kuuma gîkaro kîmwe gwîta kîngî.

⁶Gûntû kunthe kûrîa mbîtanîtie na antû bonthe ba Israeli, gûtî rîo ndeera agambi ba Israeli barîa ndaathanîte bamenyagîîre antû baakwa, atî, ‘Nîkî tontû bûtaambakîra nyomba ya mîtarakwa?’

⁷Nandî îîra nthûûmba yaakwa Daudi ûjû, ‘MWATHANI Mûrungu Mweneinya ariuga atîrî: Ndaakûritîre naarîa waarîîthagia, ng’ondu, ndakweethia mûtongeeria wa antû ba Israeli.

⁸Ningî nî ndîraagûteethagia kunthe kûrîa ûreetagîîra na ndeenga anthû baaku bonthe. Naani ngakweethia muntû ûrî na îgweta, ta antû barîa barî îgweta rîrînene nthîgûrûûne.

⁹Naani nkathuura antû arîa ngeeka antû baakwa ba Israeli batûûrage o kwee kwaao. Bo batîcoka kûthaangîkua kana bainyîîrua nî antû ta ûrîa gwakari mbereene,

¹⁰ta rîrîa ndaathuurîte agambi batongagîîria antû baakwa Israeli. Ngaakûûmbanîra kîrî anthû baaku bonthe. Amwe na jau ni MWATHANI ngatûma wîthîrwe ûrî na nchiarwa mûciîîne jwaaku.

¹¹“Rîrîa ûgaakua na ûthikwe arîa biûjûjû bieenu bithiki, nkaeethia ûmwe wa ataana baaku mûnene na ntûme waathani bwaawe bwîthîrwe bûrî na inya.

¹²Ûu nîwe ûkambakîra nyomba, naani nkaarikithia waathani bwaawe mwanka kenya na kenya.

¹³ Nkaa îthe waawe nawe akaa mûtaana waakwa. Kîaao gîaakwa kîrîa gîtîthiraga gîtîmwîrûkîra ta ûrîa kîeerûkîîre ûrîa waarî mbere yaaku.

¹⁴Îndî ni nkamûrikithia aathage antû baakwa na ûnene bwaakwa magiita jonthe. Ûnene bwaawe bûtîkorothira mwanka kenya na kenya.”

¹⁵Mantû jau jonthe nîjo Mûrungu aguûrîre Nathani nîkenda eera Daudi.

¹⁶Mûnene Daudi nî aakûrûkîre îemeene rîa gûtirimanîra, arakara nthî araromba akiugaga atîrî, “Itû MWATHANI Mûrungu, ûûni ndî û nîkenda ûnthithîria mantû jaja jonthe o amwe na mûciî jwaakwa?

¹⁷Ûu ûthithîtie nî ûntû bûnini kîrî gwe itû MWATHANI Mûrungu. Nîkwîthîrwa nî uugîîte atî nchiarwa cia nthûûmba yaaku ikaagîa îgweta ntukû ikeeja. Ningî wambonia mantû jegiî rûrîîjo rwaakwa rwa nyumeene.

¹⁸Nî bûrîkû bûngî nkwîra bûmbîgiî ni Daudi nîkwîthîrwa gwe nî ûtûmîte ndagîa îgweta. Gwe nî ûmbijî ni nthûûmba yaaku.

¹⁹Tontû bwa nthûûmba yaaku, na kûringana na wendi bwaaku, ûkûnthithîria mantû jaja, wamenyithania mantû jamanene jarîa jakeeja nyumeene.

²⁰Kûringana na mantû jarîa jonthe twaigua, gûtî we ûng'uanithanua naagwe MWATHANI. Gwe nîgwe gwenka Mûrungu.

²¹Gûtî mûgongo jûngî nthîgûrûûne jûkari ta mûgongo jwa antû ba Israeli. Gwe Mûrungu nîgwe waaboonokerie nîkenda baa antû baaku. Ûracionera îgweta nîûntû bwa mantû jamanene na jakûrigaria jarîa wathithîrie. Nîgwe waatuunyûkîrie antû baaku ba Israeli kuuma Misri na ûreenga antû ba mîgongo îngî kûrîa beetagîîra.

²²Gwe nî weethetie antû ba Israeli baa baaku. Gwe MWATHANI waa Mûrungu waao.

²³“Nandî itû gwe MWATHANI, tûma mantû jarîa jambegiî ni nthûûmba yaaku na nchiarwa ciaakwa joojûrage magiita jonthe.

²⁴Riîtwa rîaaku narîo rîrotûûra na rîgakumagua magiita jonthe. Antû bakaugaga atîrî, ‘MWATHANI Mweneinya nîwe Mûrungu wa Israeli.’ Naru rûrîîjo rwaakwa ni nthûûmba yaaku ûrûrikithie magiita jonthe.

²⁵Nîkwîthîrwa gwe, Mûrungu waakwa, nî ûnguûrîrîte ni nthûûmba yaaku atî gwe ûgaaka mûciî jwaakwa. Kîu nîkîo gîatûma ni nthûûmba yaaku ndî na ûchamba bwa kûromba ndî mbere yaaku.

²⁶Nandî, gwe MWATHANI, nîgwe Mûrungu na nîgwe ûmbîrîte atî ûkathithîria ni nthûûmba yaaku ûntû bûbwega.

²⁷Tontû bûû, îtîkîra kûtharima mûciî jwaakwa ni nthûûmba yaaku, nîkenda jwîtaga na mbere gûkûthaathayia magiita jonthe nîkwîthîrwa kîrîa gwe MWATHANI ûtharimîte, nî gîkîtharime magiita jonthe.”