Read KIMERU BIBLE PROTESTANT EDITION 1Ma 18 Bible Online

1Ma 18 - KIMERU BIBLE PROTESTANT EDITION bible

1Ma 18

¹Nyumeene, Daudi nî aaithûkîîre Afilisti araboomba ndweene. Arataa ntûûra ya Gathi na tûtûûra tûrîa twamîthiûrûkîrîte.

²Ningî nî aaithûkîîre Amoabu, araboomba ndweene na arabaethia nthûûmba ciaawe, baratûa kûmûritagîra ûgoti.

³Daudi aracoka araithûkîra mûnene Hadadezeri wa nthîgûrû ya Zoba. Zoba yaarî akuî na nthîgûrû ya Hamathi. Hadadezeri nîka eendaga kwaramia mîanka ya nthîgûrû yaawe bwa rûgûrû ya rûûjî rwa Eufurate.

⁴Daudi akwithûka nî aataîre ngaarî cia ndwaa ngiri îmwe (1,000) na asikarî ba mbarathi ngiri mûgwanja (7,000), na asikarî barîa beetaga na magûrû ngiri mîrongo îîrî (20,000) na arataa mbarathi inyingî irîa irîngîûmba gûkuuchîa ngaarî cia ndwaa îgana. Mbarathi iu ingî araciunanga magûrû.

⁵Ningî rîrîa njûûrî ya Sîria kuuma Damaski yeetîre gûteetheeria mûnene Hadadezeri, Daudi nî ooragîre asikarî ngiri mîrongo îîrî na ijîîrî (22,000) ba njûûrî ya Sîria.

⁶Daudi araaka kambî ya asikarî kûu Damaski nthîgûrûûne ya Sîria. Antû ba Sîria baraa nthûûmba ciaawe na baratua kûmûritagîra ûgoti. MWATHANI araa Daudi ûûmbani kunthe kûrîa eetaga kwithûka.

⁷Rîu Daudi arataa rong'o cia thaabu irîa ciaakamatagwa nî asikarî ba Hadadezeri araciikia Jerusalemu.

⁸ Ningî Daudi nî aataîre îturutia rîriingî kuuma ntûûreene ya Tibihathi na ya Kuni irîa ciathagwa nî Hadadezeri. Îturutia rîu nîrîo nyumeene Solomoni aatumîîre kûthithia gîtangi kîa rûûjî na îtugî, na into bia gûtumîra kîûrûûne.

⁹Tou mûnene wa Hamathi, nî aaigîrue atî Daudi aakûrwaa na njûûrî ya Hadadezeri mûnene wa Zoba na amîûmba.

¹⁰Tontû bûû, Tou nî aatûmîre mûtaana waawe Hadoramu kîrî mûnene Daudi nîkenda amwikîria nkeethi na amûkaathîrîria nîûntû bwa kûrwaa na kûûmba mûnene Hadadezeri ndweene. Hadadezeri aarî mûnthû wa Tou. Hadoramu araikîria Daudi biewa bithithîtue na thaabu, na bia fetha na bia îturutia.

¹¹Mûnene Daudi nî aathûrîîre MWATHANI into biu amwe na thaabu, na fetha, na îturutia, birîa aataîte kuuma kîrî mîgongo îrîa aaithûkîrîte aramîûmba ndweene. Nayo nî Edomu, na Moabu, na Amoni, na Filisti na Ameleki.

¹² Abishai ûrîa ng'ina aarî Zeruia, nî aaithûkîîre antû ba Edomu kûu Kîguuruune gîa Chumbî; arooraga antû ngiri îkûmi na inyanya (18,000).

¹³Nawe araaka kambî cia asikarî kûu Edomu. Nabo antû ba Edomu baratua kwathagwa nî Daudi. MWATHANI araa Daudi ûûmbani kunthe kûrîa eetaga kwithûka.

¹⁴Tontû bûû, Daudi nî aathanîre nthîgûrûûne ya Israeli yonthe. Arabaatha na ûûma na îota.

¹⁵Joabu mûtaana wa ng'ina wa Abishai nîwe waarî mûtongeeria wa njûûrî. Jehoshafati mûtaana wa Ahiludi, nîwe waandîkaga mantû jarîa jaathithîkaga.

¹⁶Zadoki mûtaana wa Ahitubu na Ahimeleki mûtaana wa Abiathari nîbo baarî athînjîri-Mûrungu. Shavasha nîwe waandîkaga mantû jarîa jaathithîkaga.

¹⁷Benaia mûtaana wa Jehoiada nîwe waarî mûrûngamîîri wa Akelethi na Apelethi barîa baarî akaria ba mûnene Daudi. Ataana ba Daudi baarî atongeeria babanene waathaniine bwa îthe.