Read KIMERU BIBLE PROTESTANT EDITION 1Ma 19 Bible Online

1Ma 19 - KIMERU BIBLE PROTESTANT EDITION bible

1Ma 19

¹Nyumeene, Nahashi mûnene wa Amoni nî aakuîre, nawe Hanuni mûtaana waawe araa mûnene.

²Nawe Daudi arauga “Nkathithîria Hanuni mûtaana wa Nahashi mantû jameega nîûntû kinya îthe nî anthithagîria mantû jameega.” Daudi nî aatûmanîre kîrî Hanuni nîkenda aborerua nîûntû bwa gîkuû kîa îthe. Tontû bûû, atûmwa bareeta kîrî Hanuni kûu nthîgûrûûne ya Amoni nîkenda bamûboreria.

³Nabo atongeeria ba Amoni barooria Hanuni atîrî, “Ûrîthûgaania Daudi atûmîte antû baba bakûboreria nîûntû bwa ûrîa eekîîrîte abaagu? Ûga tîka nthûûmba ciaawe ciîjîte gûcûnkûûna nthîgûrû nîkenda ûtunyua ûnene?”

⁴Tontû bûû, Hanuni arauga antû bau baatûmi nî Daudi bagwatwe na beenjwe ireru, na nguû ciaao igiitîîrwe kauna. Rîu barekeerue beete.

⁵ Atûmwa bau bararemwa kwaana Jerusalemu nîûntû nî baarî na nthao inyingî. Daudi akûmenyithua mantû jau, aratûmana beerwa bakare ntûûreene ya Jeriko mwanka rîrîa ireru biaao bigaakûra, rîu bacoke Jerusalemu.

⁶Mûnene Hanuni amwe na antû ba Amoni bakûmenya atî bakûgîa ûthû na mûnene Daudi, nî baaritîre kilo ngiri mîrongo ithatû na inya (34,000) cia fetha nîkenda bakoombora ngaarî cia ndwaa na eetithia baacio kuuma nthîgûrû ya Mesopotamia na kuuma nthîgûrû irîa Sîria yaathaga tacio Aramu-maaka na Zoba.

⁷Barakoombora ngaarî cia ndwaa ngiri mîrongo îthatû na ijîîrî (32,000). Mûnene wa Maaka areeta na njûûrî yaawe na baraamba kambî akuî Medeba. Nabo antû ba Amoni nî baaumîre ntûûreene ciaao cionthe baraithuranîra nîkenda beeta ndweene.

⁸Rîrîa Daudi aamenyithîrue mantû jau, aratûma Joabu na njûûrî yonthe ya nchamba cia ndwaa.

⁹Nabo antû ba Amoni nî baaumagarîre baraibanga akuî na mpingîro ya ntûûra nîkenda baithûka. Nabo anene barîa beetîte kûbateethia, baraibanga kûu bûûrîîne.

¹⁰Rîrîa Joabu oonere atî njûûrî ya anthû îrî mbere yaawe na îngî îrî nyuma yaawe, nî aathuurîre nchamba cia ndwaa cia njûûrî ya Israeli araibanga nîkenda ciithûkîra njûûrî ya Sîria.

¹¹Njûûrî îrîa îngî yaatigeere aramîthuurîra Abishai ûrîa waarî mûtaana wa ng'ina nîkenda amîtongeeria kwithûkîra njûûrî ya Amoni.

¹²Joabu areera Abishai atîrî, “Woona nkîûmbwa nî njûûrî ya Sîria, wîje ûnteethie. Naani ndeeja kwona ûkîûmbwa nî njûûrî ya Amoni, nkeeja gûgûteethia.

¹³Ciûmieni bûrwee na ûchamba, tûrwîrîîre antû beetû na ntûûra cia Mûrungu weetû. MWATHANI arothithia wendi bwaawe.”

¹⁴Joabu na njûûrî yaawe nî baithûkîîre njûûrî ya Sîria nayo njûûrî îîu ya Sîria îramatûka.

¹⁵Rîrîa njûûrî ya Amoni yoonere atî njûûrî ya Sîria îkûmatûka, kinya bo baramatûka kuuma kîrî njûûrî îrîa Abishai atongeeretie baratonya ntûûreene yaao. Rîu Joabu baracoka Jerusalemu.

¹⁶Rîrîa njûûrî ya Sîria yoonere atî îkûûmbwa ndweene nî njûûrî ya Israeli, nî baatûmîre antû beeta gwîta njûûrî yaao îrîa yaarî rwongo rwa mûuro jwa Eufurate. Nayo îreeja îtongeeretue nî Shofaki ûrîa waatongagîîria njûûrî ya mûnene Hadadezeri.

¹⁷Rîrîa Daudi aamenyithîrue mantû jau nî oothuranîrie njûûrî ya Israeli yonthe, barauna mûuro jwa Jorodani. Bagûkinya akuî nabo baraibanga nîkenda baithûkîra anthû. Ndwaa îraambîrîîria.

¹⁸Njûûrî ya Sîria îramatûka njûûrî ya Israeli. Daudi na njûûrî yaawe barooraga asikarî ngiri mûgwanja (7,000) barîa beetithagia ngaarî cia ndwaa na asikarî ngiri mîrongo îna (40,000) barîa beetaga na magûrû. Ningî nî booragîre Shofaki ûrîa waarî mûtongeeria wa njûûrî ya Sîria.

¹⁹Rîrîa atongeeria barîa baarî waathoone bwa Hadadezeri boonere bakûûmbwa ndweene nî Israeli, baratuma thîîrî na Daudi baratua kwaathagwa nîwe. Ningî kuuma rîu Sîria îteenda gûteethereria antû ba Amoni kaîrî.