Read KIMERU BIBLE PROTESTANT EDITION 1Ma 20 Bible Online

1Ma 20 - KIMERU BIBLE PROTESTANT EDITION bible

1Ma 20

¹ Îgiita rîa mûnyaaro rîrîa anene beetaga kwithûka, Joabu nî aatongeererie njûûrî areeta kwithûkîra nthîgûrû ya Amoni. Aracîgîîria ntûûra ya Raba, aramiithûkîra aramîtaa. Îndî mûnene Daudi aarî Jerusalemu.

²Nyumeene Daudi nî eetîre ntûûreene ya Raba arajûkia thirû ya mûrungu jwaao jwa mûng'uanano jûrîa jweetagwa Moleki. Thirû îîu yaarî ya thaabu na yaarî na ûrito bwa kilo mîrongo îthatû na inya (34). Ningî nî yaarî na iiga rîa goro. Iiga rîu nî rîeekîîrwe kîrî thirû ya Daudi. Nawe Daudi nî aataîre into bibingî mono kuuma ntûûreene îîu.

³Nî aajûkîrie antû ba ntûûra îîu arabaritithia ngûgî cia gwatûra na mîchumeno, na kûrîma na machembe na gûtumîra mathoka. Ûu nîu Daudi aathithîîrie antû ba ntûûra ingî cionthe irîa aataîte cia Amoni. Daudi amwe na njûûrî yaawe baracoka Jerusalemu.

⁴Nyumeene njûûrî ya Israeli nî yeetîre kwithûkîra njûûrî ya Afilisti kûu ntûûreene ya Gezeri. Nîrio Sibekai wa kuuma Husha ooragîre kîmuntû gîkînene gîetagwa Sipai. Nabo Afilisti baroombwa ndweene.

⁵Nabo Aisraeli nî baithûkîîre Afilisti kaîrî. Elihanani mûtaana wa Jairi nî ooragîre Lahimi mûtaana wa ng'ina wa Goliathû ûrîa waumîte ntûûreene ya Gathi, ûrîa mûgwati jwa îtumo rîaawe jwaamati ta gîkingi.

⁶Ningî nî kwaagîîre na ndwaa îngî kûu ntûûreene ya Gathi. Ntûûreene îîu nî kwaarî kîmuntû gîkînene mono, nakîo kîaarî na biara bitaantatû o njara na bitaantatû o kûgûrû. Biara bionthe biaarî mîrongo îîrî na bina. Kinya kîo kîaarî kîmwe kîa nchiarwa cia Refaimu.

⁷Rîrîa kîmuntû kîu kîaambîrîrie kûmaria njûûrî ya Israeli, Jonathani mûtaana wa Shama ûrîa waarî mûtaana wa ng'ina wa Daudi nî aakîûûragîre.

⁸Antû bau bo bathatû baarî ba rûrîîjo rwa Refaimu.[6] Nabo baatûûraga Gathi. Nîbo Daudi na asikarî baawe booragîre.