Read KIMERU BIBLE PROTESTANT EDITION 1Ma 21 Bible Online

1Ma 21 - KIMERU BIBLE PROTESTANT EDITION bible

1Ma 21

¹Nkoma nî yeendere gûtûma Israeli îtonya thîîneene. Nayo îratûma Daudi atarithia antû ba Israeli.

²Rîu Daudi areera Joabu na atongeeria ba njûûrî atîrî, “Îteeni bûtare antû ba Israeli kuuma Beerisheba mwanka Dani. Rîu bwîje bûmbîîre ûrîa bang'ana.”

³Joabu aramwîra atîrî, “MWATHANI arotûma antû ba Israeli baingîa maita jamaingî nkûrûki ya ûrîa bang'ana nandî! Mwathi waakwa mûnene, anga bonthe tî nthûûmba ciaaku? Nîkî îndî Mwathi waakwa ûkwenda ûtari bûthithua? Ûntû bûu bûkaretera Israeli thîîna?”

⁴Îndî Joabu araathîkîra ûrîa mûnene augîîte, araumagara arathiûrûkania na Israeli yonthe, agîtarithagia antû. Rîu aracoka Jerusalemu.

⁵Joabu nî eerîre Daudi ntari ya antû ba Israeli. Nayo yaarî arûme milioni îmwe na ngiri îgana rîmwe (1,100,000) barîa barîngîûmba gwîta ndweene. Kuuma nthîgûrûûne ya Juda, kwaarî na antû ngiri magana jana na mîrongo mûgwanja (470,000) barîngîûmba gwîta ndweene.

⁶Joabu ataatarîre antû ba mwîrîga jwa Lawi na jwa Benjamini nîûntû ataagwatanagîra na ûrîa mûnene aaugîîte.

⁷Mûrungu nî aathûûrîrue nî ûntû bûu bwaathithîrue, nawe arakanûkia Israeli.

⁸Daudi araromba Mûrungu arauga atîrî, “Nî mbîîtie kîrî gwe mono nîûntû bwa kûthithia ûntû bûû. Itû nandî ndakûromba eeberia nthûûmba yaaku ûthûûku bwaayo, nîkwîthîrwa nî nthithîtie ûntû bwa waa mono.”

⁹Rîu MWATHANI araarîria Gadi, ûrîa waarî kîroria kîa mûnene Daudi aramwîra atîrî,

¹⁰“Îta wîîre Daudi, ni ndiuga ûjû: Ndîmwîrîra mantû jathatû, nawe athuure bûmwe bwaajo, naani nkamûthithîria bu.”

¹¹Tontû bûû, Gadi areeta kîrî Daudi aramwîra “Ûjû nîu MWATHANI auga; thuura bûmwe bwa jaja:

¹²Ûthuure mîaka îthatû bwîthîrwe bûrî na mpara, kana mîeri îthatû bwîthîrwe bûkiithûkîrwa nî anthû babûnyamaarie, kana ntukû ithatû cia gûkanûkua nî MWATHANI ûrîa ûgatûma mûraîka waawe abûreetere mîrimo nthîgûrûûne yeenu yonthe.”

¹³Nîu Daudi areera Gadi atîrî, “Ni ndî mîthangîkoone îmiingî mono. Nî kaaba ngakanûkua nî MWATHANI nîûntû we arî kîaao gîkiingî, antû a nkanûkua nî muntû.”

¹⁴Tontû bûû, MWATHANI aratûma mûrimo jûmûthûûku, naju jûrooraga antû ba Israeli ngiri mîrongo mûgwanja (70,000).

¹⁵Ningî MWATHANI aratûma mûraîka nîkenda athiria Jerusalemu. Îndî o rîrîa aarî akuî kûmîthiria, MWATHANI araigwata, areera mûraîka akaathithia noo atîa. Mûraîka aarûngami au îtîîrine rîa Orinani Mûjebusi.

¹⁶Daudi araciûkia meetho aroona mûraîka wa MWATHANI arûngami îgûrû agwete rûchiû na arwerekeretie Jerusalemu. Rîu Daudi amwe na atongeeria bareekîra mathango, na baraturia maru bareenamîîria mwanka nthîgûrû.

¹⁷Daudi araromba akiugaga atîrî, “Itû MWATHANI Mûrungu waakwa, nî ni mbîîtie ndathithia ûthûûku ndauga antû batarwe. Îndî antû baba ntongagîîria gûtî u bo bathithîtie. Tontû bûû, nkanûkia na ûkanûkie mûciî jwaakwa. Îndî ûkaareka mîrimo îthiria antû baba.”

¹⁸Mûraîka wa MWATHANI areera Kîroria Gadi kîîre Daudi aakîre MWATHANI kîritîro kîa igongwana au îtîîrine rîa Orinani Mûjebusi.

¹⁹Tontû bûû, Daudi araathîkîra ûrîa MWATHANI eerîte kîroria Gadi kîmwîre.

²⁰Orinani barî na ataana baawe bana nî baaûûraga nkano îtîîriine rîu. Rîrîa baaciûgûrîre baroona mûraîka, baraiciitha.

²¹Rîrîa Daudi aakinyîre akuî na Orinani, Orinani nî aamwonere, arauma au îtîîrine areeta kîrî Daudi, areenamîîria akîonania gîtîîo.

²²Daudi areera Orinani atîrî, “Mpenderia îtîîrî rîaaku nîkenda mbakîra MWATHANI kîritîro kîa igongwana ku, nîkenda mûrimo jûu jûtiga kûthiria antû.”

²³Orinani areera Daudi atîrî, “Rîjûkie, mwathi waakwa mûnene nî ûthithie narîo ûrîa MWATHANI akwenda. Ningî kinya ndeegwa cia kûrita kîgongwana gîa gwakîîria, ngakûnenkera. Jûkia mîûûro yee nkû cia gwakîîria kîgongwana kîu, na ûjûkie nkano cia kûrita irî kîgongwana kîa irio. Bionthe nkûbieejana.”

²⁴Îndî Daudi areera Orinani atîrî, “Arî! Nî kûgûra nkagûra ûgûri bûrîa bwagîrîte. Ntînenkera MWATHANI birîa birî biaaku, kana mûritîra îgongwana bia gwakîîria birîa ntîgûrîte.”

²⁵Tontû bûû, Daudi ararîa Orinani mbeecha cia thaabu magana jatantatû (600) irî îrîi rîa îtîîri rîu.

²⁶Daudi nî aakîîre MWATHANI kîritîro kîa igongwana na ararita igongwana bia gwakîîria, na bia gûcwaa thîîrî o. Ningî araromba MWATHANI na MWATHANI aramûcokeria maromba. Aratûma mwanki kuuma îgûrû naju jûraîîthia igongwana biu.

²⁷Rîu MWATHANI areera mûraîka acokie rûchiû rwaawe kîûeene, nawe aracokia.

²⁸Îgiiteene rîu Daudi akwona atî MWATHANI akûmûcokeria maromba arî îtîîrine rîa Orinani Mûjebusi, nî aaritîîre MWATHANI igongwana bingî o au.

²⁹Îgiita rîu, îema rîa MWATHANI rîa gûtirimanîra rîrîa Musa aathithîtie rîrîa baarî rwanda, na kîritîro kîa igongwana bia gwakîîria, biaarî gîtûmbîîne kûu Gibeoni.

³⁰Îndî Daudi atîngîûmba gwîta Gibeoni kûthaathayia Mûrungu nîûntû nî aakîraga ooragwa nî mûraîka wa MWATHANI.