Read KIMERU BIBLE PROTESTANT EDITION 1Ma 22 Bible Online

1Ma 22 - KIMERU BIBLE PROTESTANT EDITION bible

1Ma 22

¹Rîu Daudi arauga atîrî, “Aja îtîîriine rîrî nîo kîûrû kîa MWATHANI Mûrungu gîgaakwa na kîritîroone gîkî nîo antû ba Israeli bakaaritagîra igongwana biaao bia gwakîîria.”

²Daudi nî aaugîre antû ba kuuma nthîgûrû ingî barîa batûûranagîra na antû ba Israeli boothûranue bonthe. Bamwe baao arabaa ngûgî ya kwaaja maiga ja gwaka kîûrû.

³Ningî Daudi nî aaeejanîre chuuma inyiingî cia kûthithia mîchumaarî na marenci ja gwîkîra mîrangoone ya mpingîro. Ningî araeejana îturutia rîriingî rîtîûmba kûthimîka.

⁴Ningî araeejana mîgogo îmiingî ya mîtarakwa îrîa antû ba Sidoni na ba Tiro baarî bakûmûretera.

⁵Daudi aaciîraga atî kîûrû kîrîa kîbuîri gwakwa, kîbuîri kwîthîrwa kîrî gîkîthongi mono na kîrî na mwago na nkuma nthîgûrûûne yonthe. Îndî Solomoni mûtaana waawe aarî ûmwanake na ataijî mantû jamaingî. Tontû bûû, Daudi aroothûrania into bibingî mono bia gwaka kîûrû mbere ya akua.

⁶Rîu Daudi areeta mûtaana waawe Solomoni aramwîra ûrîa kîûrû kîa MWATHANI Mûrungu wa Israeli gîgaakwa.

⁷ Daudi aramwîra atîrî, “Mûtaana waakwa, nî ndîraarî na mworoto jwa gwaakîra MWATHANI Mûrungu waakwa kîûrû.

⁸Îndî MWATHANI arambîîra atîrî, ‘Gwe ûtîmbakîra kîûrû tontû nî ûraganîte mono na warwaa ndwaa inyiingî.

⁹Atîrî, ûgaciarîrwa kaîjî, nawe akeethîrwa arî muntû wa thîîrî. Naanî ngatûma bagwatanîre na anthû baawe nteere cionthe. Riîtwa rîaawe rîkeethîrwa rîrî Solomoni.[7] Naani ngatûma nthîgûrû ya Israeli îthîrwe îrî na thîîrî na ûboreri magiita jonthe ja waathani bwaawe.

¹⁰Ûu nîwe ûkambakîra kîûrû. Wee akaa mûtaana waakwa, naani nkaa îthe. Naani nkarikithia waathani bwaawe ndeene ya Israeli magiita jonthe.’

¹¹“Nandî rî mûtaana waakwa, MWATHANI arokaraga naagwe, nîkenda ûûmba gwaka kîûrû kîa MWATHANI Mûrungu waaku, kûringana na ûrîa aarîrie mantû jakwegiî.

¹²Bunka akî, MWATHANI arokwaa ûûme na ûciûku, nîkenda rîrîa agakwethia mûtongeeria wa Israeli, ûkoombaga kûûjûria waatho bwa MWATHANI Mûrungu waaku.

¹³ Rîu naagwe ûkathinyaara bunka akî wamenyeera mawîthîre na mawaatho jarîa MWATHANI aanenkeere Musa nîûntû bwa antû ba Israeli. Ûgákîra kana ûmaka. Gîta inya na ûgîe ûchamba.

¹⁴Atîrî, ni ningwa nî nciûmîtie, ndoothûrania taani ngiri ithatû cia magana jana (3,400) cia thaabu, na ndoothûrania taani ngiri mîrongo îthatû na inya (34,000) cia fetha. Ningî nî mbûthûranîtie îturutia na chuuma îtîûmba kûthimîka; ndoothûrania mîtî na maiga. Îndî gwe noo kwongeera ûkoongeera.

¹⁵Naagwe ûrî na ariti ngûgî babaingî ta: aaji ba maiga, aaki na maiga aaki na atea ba mbaaû, na atea babaingî ba mîthemba yonthe,

¹⁶barîa baijî gûtumîra thaabu, na fetha, na îturutia, na chuuma. Tontû bûû, ithuranîre wambîîrie gwaka. MWATHANI arokaraga naagwe!”

¹⁷Ningî Daudi nî eerîre atongeeria bonthe ba Israeli bateethererie mûtaana waawe Solomoni.

¹⁸Arabeera atîrî, “Nî mma, MWATHANI Mûrungu weenu arî amwe naabuî. Nî abweete thîîrî kunthe nthîgûrûûne yeenu. Nîkwîthîrwa nî atûmîte bwoomba antû barîa baatûûraga gûkû mbere yeenu. Rîu nî baabuî baathîkagîra na bakaathîkîra MWATHANI.

¹⁹Nandî, athîkagîreeni MWATHANI Mûrungu weenu buru. Ithuranîreni bwambîîrie gwaka kîûrû nîkenda Îthandûkû rîa kîrîkanîro na into birîa bitheru birîa bitumagîrwa rîrîa antû bakûthaathayia MWATHANI biikua kîûrûûne kîu.”