Read KIMERU BIBLE PROTESTANT EDITION 1Ma 23 Bible Online

1Ma 23 - KIMERU BIBLE PROTESTANT EDITION bible

1Ma 23

¹ Daudi agûkûra mono, nî aaeetherie mûtaana waawe Solomoni mûnene wa Israeli.

²Nyumeene Daudi nî eetanîre mûcemanio jwa atongeeria na athînjîri-Mûrungu na Alawi bonthe ba nthîgûrû ya Israeli.

³Nî aaugîre Alawi batarwe kuuma ba mîaka mîrongo îthatû na nkûrûki. Nabo bareethîrwa barî antû ngiri mîrongo îthatû na inyaanya (38,000).

⁴Daudi nî aaugîre antû ngiri mîrongo îîrî na inya (24,000) cia bau nîbo bakamenyagîîra ngûgî cia kîûrû, na bangî ngiri ithanthatû (6,000) bae arûngamîîri ba kîûrû na bangî bae agambi.

⁵Bangî ngiri inya (4,000) bae akaria ba mpingîro ya kîûrû na bangî ngiri inya (4,000) bae ainîri MWATHANI kîûrûûne bagîtumagîra into birîa Daudi aathithîtie bia kwina.

⁶Daudi nî agaanîrie Alawi kûringana na ndîîjo ithatû cia ataana ba Lawi. Nacio nî Gerishoni, na Kohathi, na Merari.

⁷Ataana ba Gerishoni baarî: Ladani na Shimei.

⁸Ladani nawe aarî na ataana bathatû: wa mbere aarî Jehieli, arathingatwa nî Zethamu na wa mûthia aarî Joeli.

⁹Ataana ba Shimei baarî bathatû. Nabo baarî Shelomothi, na Hazieli na Harani. Bau nîbo baarî atongeeria ba mîciî ya nchiarwa cia Ladani.

¹⁰Shimei nî aarî na aana bangî bana. Nabo baarî Jahathi, na Zina, na Jeushi na Beria.

¹¹Jahathi nîwe waarî mûkûrû arathingatwa nî Zizaha. Jeushi na Beria bataarî na aana babaingî, tontû bûu baratarwa barî mwîrîga jûmwe.

¹²Ataana ba Kohathi baarî bana. Nabo nî Amuramu na Izihari na Heburoni na Uzieli.

¹³ Nabo ataana ba Amuramu baarî Aaroni na Musa. Aaroni nî aathuurîrwe nîkenda aathûraga into birîa bitheru buru. Ningî we amwe na nchiarwa ciaawe nî baaeei ngûgî ya kwîîthagîîria ubaani rîrîa antû bakûthaathayia MWATHANI. Nîbo baatumîkagîra MWATHANI na bakatharima antû bagîtumagîra riîtwa rîaawe.

¹⁴Îndî ataana ba Musa muntû wa Mûrungu baatarîrwe mwîrîgeene jwa Lawi.

¹⁵Ataana ba Musa baarî baîrî, nabo nî Gerishomu na Eliezeri.

¹⁶Mûtaana wa Gerishomu ûrîa mûkûrû aarî Shebueli.

¹⁷Eliezeri aarî na mûtaana ûmwe wenka ûrîa weetagwa Rehabia. Îndî Rehabia aarî na aana babaingî mono.

¹⁸Izihari aarî na mûtaana ûmwe akî, nawe eetagwa Shelomithi.

¹⁹Heburoni aarî na ataana baba: wa mbere aarî Jeria, na wa baîrî aarî Amaria, na wa bathatû aarî Jahazieli, na wa bana aarî Jekameamu.

²⁰Uzieli aarî na ataana baîrî. Wa mbere eetagwa Mika na wa baîrî eetagwa Ishia.

²¹Ataana ba Merari baarî Mahili na Mushi. Nabo ataana ba Mahili baarî Eleazari na Kishi.

²²Eleazari aakuîre atî na mûtaana noo ûmwe tiga aarî akî. Aarî bau baagûrîrwe nî antû ba ndûgû ciaao, tabo nchiarwa cia Kishi.

²³Mushi aarî na ataana bathatû: wa mbere aarî Mahili, na wa baîrî aarî Ederi na wa bathatû aarî Jeremothi.

²⁴Bau nîbo nchiarwa cia Lawi, kûringana na mîîrîga na mîciî yaao. Antû bau nîbo baatarîrwe barîa baarî na ûkûrû bwa mîaka mîrongo îîrî na nkûrûki. Nabo nîbo baaerwe ngûgî ya gûtumîka kîûrûûne kîa MWATHANI.

²⁵Daudi aathithîrie ûu nîûntû aaugaga atî MWATHANI Mûrungu wa Israeli aejanîte thîîrî kîrî antû baawe, nawe nî akwenda gûtûûra Jerusalemu magiita jonthe.

²⁶ Ningî gûtî na gîtûmi kîa Alawi gûkamataga Îema rîa gûtirimanîra kaîrî, kana gîntû kîngî noo kîrîkû kîa into birîa bitumîkaga rîrîa antû bakûthaathayia Mûrungu.

²⁷Kûringana na nteto cia Daudi cia mûthia Alawi barîa baandîkithagua baarî ba kuuma ûkûrû bwa mîaka mîrongo îîrî na nkûrûki.

²⁸ Ngûgî ciaao ciaarî gûteethagîîria nchiarwa cia Aaroni, barîa baaritaga ngûgî kîûrûûne. Ningî noo bo baamenyagîîra biarago na tûnyomba, na kûthambia into birîa itheru bionthe, na ngûgî ingî cia nyomba ya MWATHANI.

²⁹Nîbo babuîrîte kûmenyeera mîgaate îrîa yaritagwa îrî kîgongwana kîrî Mûrungu, na mûtu jûrîa jwaaritagwa jûrî kîgongwana kîa irio na bakamenyeera tûmîgaate tûtûceke tûrîa twaathithagua tûtîîkîri mûtheega jwa kwimbithia na mîgaate ya gûkaanda îrîa yaaritagwa îrî kîgongwana. Ningî nî baamenyagîîra kîgongwana kîrîa kîeethagîrwa kiungeenue na maguta, na into bionthe birîa biathimagwa birîa biaaritagwa birî kîgongwana kîûrûûne.

³⁰Ningî nî beethagîrwa bagîkumia MWATHANI rûkîîrî na ûgoro.

³¹Ningî îgiita rîonthe rîrîa igongwana bia gwakîîria biaaritagwa ntukû ya sabatû, na bia mweri jûkîguûka na ntukû cia mambura jangî nî babuîri gûkumia MWATHANI kîûrûûne. Baatumîkagîra MWATHANI magiita jonthe kûringana na ûrîa gwatui.

³²Iu nîcio ciaarî ngûgî ciaao kûu îemeene rîa gûtirimanîra na kîûrûûne. Ningî nî baateethagîîria nchiarwa cia Aaroni na ndûgû ciaao rîrîa bagûtumîka kîûrûûne kîa MWATHANI.