Read KIMERU BIBLE PROTESTANT EDITION 1Ma 27 Bible Online

1Ma 27 - KIMERU BIBLE PROTESTANT EDITION bible

1Ma 27

¹Baba nîbo atongeeria ba antû ba Israeli barîa baarî atongeeria ba antû ba mîîrîga ya Israeli na atongeeria ba asikarî ngiri ngiri na îgana îgana. Ningî nîbo baarî atongeeria ba antû barîa baatumîkagîra mûnene mantûûne jonthe jegiî waathani o mweri o mweri gîkundi kîa asikarî ngiri mîrongo îîrî na inya (24,000) nî baakaragia nthîgûrû.

²Gîkundi kîa asikarî ngiri mîrongo îîrî na inya (24,000) gîaakarîrie nthîgûrû mweri jwa mbere gîtongeeretue nî Jashobeamu mûtaana wa Zabidieli.

³Jashobeamu aarî wa nchiarwa cia Perezi na nîwe waarî mûrûngamîîri wa atongeeria bonthe ba njûûrî mweri jûu jwa mbere.

⁴Mûtongeeria wa gîkundi kîa biîrî, mweriine jwa îîrî aarî Dodai wa kuuma mwîrîgeene jwa Ahohi. Gîkundi kîaawe kîaarî na asikarî ngiri mîrongo îîrî na inya (24,000).

⁵Mûtongeeria wa gîkundi kîa bithatû, mweriine jwa îthatû aarî Benaia mûtaana wa Jehoiada ûrîa waarî mûthînjîri-Mûrungu. Gîkundi kîaawe kîaarî na asikarî ngiri mîrongo îîrî na inya (24,000).

⁶Benaia ûu nîwe waarî nchamba na mûtongeeria wa Asikarî mîrongo îthatû (30). Mûtaana waawe Amizabadi nîwe waarî mûtongeeria wa gîkundi kîu kîa asikarî ngiri mîrongo îîrî na inya (24,000).

⁷Asaheli aarî mûtaana wa ng'ina wa Joabu, na îthe wa Zebadia. Nîwe waatongeeretie gîkundi kîrîa gîaakarîtie nthîgûrû mweriine jwa îna. Asaheli agûkua, Zebadia araa mûtongeeria. Gîkundi kîaawe kîaarî na asikarî ngiri mîrongo îîrî na inya (24,000).

⁸Mûtongeeria wa bataano ûrîa waakarîtie nthîgûrû mweriine jwa îtaano aarî Shamuhuthi wa kuuma Izira. Gîkundi kîaawe kîaarî na asikarî ngiri mîrongo îîrî na inya (24,000).

⁹Mûtongeeria wa gîkundi kîrîa gîaakarîtie nthîgûrû mweriine jwa îtaantatû aarî Ira mûtaana wa Ikeshi wa kuuma Tekoa. Gîkundi kîaawe kîaarî na asikarî ngiri mîrongo îîrî na inya (24,000).

¹⁰Mûtongeeria wa gîkundi kîrîa gîaakarîtie nthîgûrû mweriine jwa mûgwanja aarî Helezi wa kuuma Peloni. Aarî wa kuuma kîrî nchiarwa cia mwîrîga jwa Efuraimu. Gîkundi kîaawe kîaarî na asikarî ngiri mîrongo îîrî na inya (24,000).

¹¹Mûtongeeria wa banaana aarî Sibekai wa kuuma Husha. Nawe aarî wa mwîrîga jwa Zera. Gîkundi kîaawe kîaarî na asikarî ngiri mîrongo îîrî na inya (24,000).

¹²Mûtongeeria wa kenda ûrîa waakarîtie nthîgûrû mweriine jwa kenda aarî Abiezeri wa kuuma Anathothi. Nawe aarî wa nchiarwa cia mwîrîga jwa Benjamini. Gîkundi kîaawe kîaarî na asikarî ngiri mîrongo îîrî na inya (24,000).

¹³Mûtongeeria wa îkûmi ûrîa waakarîtie nthîgûrû mweriine jwa îkûmi aarî Maharai wa kuuma Netofa. Nawe aarî wa nchiarwa cia Zera. Gîkundi kîaawe kîaarî kîa asikarî ngiri mîrongo îîrî na inya (24,000).

¹⁴Mweriine jwa îkûmi na jûmwe, mûtongeeria aarî Benaia wa kuuma Pirathoni. Nawe aarî wa nchiarwa cia Efuraimu. Gîkundi kîaawe kîaarî na asikarî ngiri mîrongo îîrî na inya (24,000).

¹⁵Mweriine jwa îkûmi na îîrî, mûtongeeria aarî Helidai, wa kuuma Netofa. Nawe aarî wa nchiarwa cia Othinieli. Gîkundi kîaawe kîaarî na asikarî ngiri mîrongo îîrî na inya (24,000).

¹⁶Atongeeria ba mîîrîga ya Israeli baarî baba: mwîrîga jwa Rubeni jwaatongeeretue nî Eliezeri mûtaana wa Zikiri, na mwîrîga jwa Simioni jwaatongeeretue nî Shefatia mûtaana wa Maaka.

¹⁷Mwîrîga jwa Lawi jwaatongeeretue nî Hashabia mûtaana wa Kemueli, na mwîrîga jwa Aaroni jwaatongeeretue nî Zadoki.

¹⁸Mwîrîga jwa Juda jwaatongeeretue nî Elihu ûmwe wa ataana ba ng'ina ba Daudi, na mwîrîga jwa Isakari jwaatongeeretue nî Omuri mûtaana wa Mikaeli.

¹⁹Mwîrîga jwa Zebuloni jwaatongeeretue nî Ishimaia mûtaana wa Obadia, na mwîrîga jwa Nafutali jwaatongeeretue nî Jerimothi mûtaana wa Azirieli.

²⁰Mwîrîga jwa Efuraimu jwaatongeeretue nî Hoshea mûtaana wa Azazia, na nusu ya mwîrîga jwa Manase jwaatongeeretue nî Joeli Mûtaana wa Pedaia.

²¹Nusu ya mwîrîga jwa Manase ya Gileadi jwaatongeeretue nî Ido mûtaana wa Zekaria, na mwîrîga jwa Benjamini jwaatongeeretue nî Jaasieli mûtaana wa Abuneri.

²²Mwîrîga jwa Dani jwaatongeeretue nî Azareli mûtaana wa Jerohamu. Bau nîbo baarî atongeeria ba mîîrîga ya Israeli.

²³ Daudi ataugîre antû barîa baarî ba ûkûrû bwa nthî ya mîaka mîrongo îîrî batarwe nîûntû MWATHANI nî eekîte wîrane atî agaatûma antû ba Israeli bathegee baingîe ta njota.

²⁴ Joabu ûrîa ng'ina aarî Zeruia nî aambîrîîrie gûtarana, îndî ataathirîrie gûtarana. MWATHANI arakanûkia Israeli nîûntû bwa gûtarana kûu. Ntari îîu îtaandîkîrwe Yukuune rîa Mantû ja Karaaja jegiî mûnene Daudi.

²⁵Mûrûngamîîri wa mûthithû jwa mûnene aarî Azimavethi mûtaana wa Adieli. Mûrûngamîîri wa mîthithû îrîa yaarî ntûûreene na tutûûrene na mînaareene na nthîgûrûûne ya Israeli yonthe aarî Jonathani mûtaana wa Uzia.

²⁶Mûrûngamîîri wa barîa baritaga ngûgî ya kûrîma miuundeene aarî Eziri mûtaana wa Kelubu.

²⁷Mûrûngamîîri wa miuunda ya mîzabibû aarî Shimei wa kuuma Rama. Mûrûngamîîri wa antû barîa baakaragia maketha ja nzabibû na kûrîa ndibei yeekagwa aarî Zabidi wa kuuma Shefamu.

²⁸Mûrûngamîîri wa miuunda ya mîzeituni na mîkûû îrîa yaarî Shefela aarî Baalihanani wa kuuma Gederi. Joashi aarî mûrûngamîîri wa tûnyomba tûrîa tweekagwa maguta ja nzeituni.

²⁹Mûrûngamîîri wa ng'ombe irîa ciarîthagua Sharoni aarî Shitirai wa kuuma Sharoni. Mûrûngamîîri wa ng'ombe irîa ciarîthagua iguuruune aarî Shafati mûtaana wa Adilai.

³⁰Mûrûngamîîri wa nkamîîra aarî Obili wa kuuma rûrîîjoone rwa Ishimaeli. Jehideia wa kuuma Meronothi arûngamîrîte ntigiri. Mûrûngamîîri wa mbûri na ng'ondu aarî Jazizi wa kuuma Hagiri.

³¹Bau bonthe baarî arûngamîîri ba ûtonga bwa mûnene.

³²Jonathani mûtaana wa ng'ina wa îthe wa Daudi aarî mweejani kîrîra, na aarî mwandîki na muntû wamenyaga mantû mono. We na Jehieli mûtaana wa Hakimoni nîbo bamenyagîîra ataana ba mûnene.

³³Ahithofeli nîwe waaeejaga mûnene nkuagaya. Hushai wa kuuma Ariki aarî mûcoore wa mûnene.

³⁴Ahithofeli agûkua, Jehoiada mûtaana wa Benaia barî na Abiathari nîbo baaeejaga mûnene nkuagaya. Joabu nîwe waarî mûtongeeria wa njûûrî ya mûnene.