Read KIMERU BIBLE PROTESTANT EDITION 1Ma 28 Bible Online

1Ma 28 - KIMERU BIBLE PROTESTANT EDITION bible

1Ma 28

¹Mûnene Daudi nî eetîre mûcemanio jwa atongeeria ba Israeli bonthe Jerusalemu. Nabo baarî atongeeria ba mîîrîga, ba ikundi birîa biatumîkagîra mûnene, atongeeria ba asikarî ngiri ngiri na îgana îgana: arûngamîîri ba ûtonga bunthe bwa mûnene. Ningî nî eetîre barîa baamenyagîîra ataana na ng'ombe cia mûnene, na barîa baamenyagîîra gîkaro kîa mûnene na antû barîa baarî îgweta o amwe na nchamba cia ndwaa.

² Mûnene Daudi nî aarûngamîre arauga atîrî, “Nthikîîreeni buî antû beetû. Nî ndîreendaga mono gwaka antû arîa Îthandûkû rîa kîrîkanîro kîa MWATHANI rîgaakaraga, na au nîo MWATHANI Mûrungu weetû agaakaraga. Ningî nî ndîraithuranîrîte gwaka antû au.

³Îndî MWATHANI nî aarambîrîre ntîmwakîra antû au nîûntû nî mbûragîte antû babaingî.

⁴MWATHANI Mûrungu wa Israeli nî anthuurîre nîkenda mpaa mûnene wa antû ba Israeli, na kuuma kîrî nchiarwa ciaakwa gûkaumaga mûnene wa kwathaga Israeli kenya na kenya.

⁵Kuuma kîrî ataana baakwa bonthe nîûntû MWATHANI nî ampeete ataana babaingî athuura Solomoni akarîra rûriga rwa ûnene bwa MWATHANI aathaga Israeli.

⁶MWATHANI nî ambîîrîre atî nî Solomoni mûtaana waakwa ûkaamwakîra nyomba yaawe na biarago biaawe, nîûntû nî amûthuurîte aa mûtaana waawe nawe aa îthe.

⁷Ningî MWATHANI nî aaugîre atî akarikia waathani bwaawe magiita jonthe, bunka akî eeta na mbere kûmenyeera bwega Maathana jaawe na Waatho bwaawe o ta ûrîa athithagia nandî.

⁸Nandî rî, buî antû beetû, menyagîîreeni na bûûjûragie maathana ja MWATHANI Mûrungu weetû nîkenda nthîgûrû îîjî nthongi yaa yeenu na bûmîtigîra nchiarwa cieenu irî kiigai kenya na kenya. Ndîbwîra ûu Mûrungu weenu akiigagua.

⁹“Naagwe mûtaana waakwa Solomoni, ndîkwîra atîrî, menya Mûrungu wa biûjûjû biaaku na ûmûtumîkagîre na inya yaaku yonthe na mathûgaanio jaaku. Nîkwîthîrwa MWATHANI nî amenyaga mathûgaanio na mîbango yonthe o amwe na mantû jaarîa ûkwenda. Wamûcwa ûkamwona. Îndî wamûtîjîra, agagûtiganîria kenya na kenya.

¹⁰Nandî îmenyere nîûntû MWATHANI nî akûthurîte ûmwakîra kîûrû. Gîîta inya na ûrite ngûgî îîu.”

¹¹Rîu mûnene Daudi aranenkera mûtaana waawe Solomoni mbicha ya ûrîa kîûrû gîgakwa na ya tûnyomba twa ndeene na ya tûnyomba twa gwîkaga mîthithû na ya tûnyomba twa ngoroba na ya tûyomba twaakio twa gîkuumbo na kanyomba ga gîtî gîa kîaao.

¹²Ningî aramûnenkera mbicha ya mantû jonthe jarîa aathûgaanagia jegiî biarago bia kîûrû kîa MWATHANI, na tûnyomba tûrîa tûgaakîthiûrûkîra, na ya tûnyomba twa gwîkaga mîthithû kûu kîûrûûne na tûnyomba tûngî twa gwîkaga biewa birîa biaathûrîri Mûrungu.

¹³Aramûnenkera mûtaratara jwa ûrîa aabangîrîte athînjîri-Mûrungu na Alawi ngûgî cia kûritaga kîûrûûne na aramûnenkera mûtaratara jwa into birîa bigatumîkaga kîûrûûne.

¹⁴Aramûmenyithia ûrito bwa thaabu îrîa yaarî o na bwa fetha îrîa yaarî o nîûntû bwa kûthithia into bia gûtumagîrwa kîûrûûne.

¹⁵Aramûmenyithia ûrito bwa thaabu na fetha ya itugî bîa kûrîkîîra taawa na taawa iu, irîa igaatumîkaga kîûrûûne.

¹⁶Aramûmenyithia ûrito bwa thaabu îrîa îgaatumîrwa kûthithia meetha ya kûrîîkagîîra mîgaate ya kîgongwana na ûrito bwa fetha îrîa îgaatumîrwa kûthithia meetha ingî.

¹⁷Ningî aramûmenyithia ûrito bwa thaabu îrîa ntheru buru îrîa îgaatumîrwa kûthithia nchibe na iraî na ikombe. Aramûmenyithia ûrito bwa mpakûri cia thaabu na cia fetha.

¹⁸Aramûmenyithia ûrito bwa thaabu îrîa ntherie buru îrîa îgaatumîrwa kûthithia kîritîro kîa igongwana bia kwîîthîria ubaani. Ningî aramûmenyithia ûrito bwa thaabu îrîa îgaatumîrwa kûthithia ngaarî cia kerubimu irîa ciaarî na mathagu jambaarîte irîa cigaakunîkagîra Îthandûkû rîa kîrîkanîro kîa MWATHANI.

¹⁹Mantû jau jonthe jegiî ngûgî irîa ikaaritwa cionthe jeeranîrwe nî Daudi bwega kûringana na ûrîa MWATHANI aaugîîte kwaandîkwe.

²⁰Daudi nî eerîre Solomoni mûtaana waawe atîrî, “Gîta înya na ûgie na ûchamba, ûrite ngûgî îîu. Ûgákîra kana ûmaka nîûntû MWATHANI Mûrungu waakwa, arî amwe naagwe. MWATHANI agagûteethia na atîkwîrûkîra, mwanka ûrite ngûgî yonthe ya gwaka kîûrû îthire.

²¹Ikundi bia athînjîri-Mûrungu na Alawi birî o nîûntû bwa kûritaga ngûgî kîûrûûne. Kinya antû barîa baijî kûrita ngûgî bwega nî bacieejeene nîkenda bagûteethereria ûtumîka ngûgîîne îîu. O na kinya atongeeria na antû bonthe bagakwaathîkagîra.”