Read KIMERU BIBLE PROTESTANT EDITION 1Ma 29 Bible Online

1Ma 29 - KIMERU BIBLE PROTESTANT EDITION bible

1Ma 29

¹ Mûnene Daudi nî eerîre kîrîndî kîrîa kîothûreene au mbere yaawe atîrî, “Mûtaana waakwa Solomoni, ûrîa Mûrungu athuurîte nîkenda aa mûnene, nî ûmwîthî na atiijî mantû jamaingî jegiî waathani. Nayo ngûgî nî îndito ya gwaka kîûrû nîkwîthîrwa nî kîa MWATHANI Mûrungu îndî tî kîa antû.

²Tontû bûû, nî nthuranîrîte into bionthe bia waaki bwa kîûrû kûringana na ûrîa nkûûmba. Nî nthuranîrîte thaabu nîûntû bwa kûthithia into bia thaabu na ndathuranîra fetha nîûntû bwa kûthithia into bia fetha. Ningî nî nthuranîrîte îturutia nîûntû bwa kûthithia into bia îturutia, na ndaathuranîra chuuma nîûntû bwa kûthithia into bia chuuma na ndaathuranîra mbaaû nîûntû bwa kûthithia into bia mbaaû. Amwe na biu nî mbûthûranîtie maiga jamaingî ja goro nîûntû bwa kûgemia. Najo nî maiga jarîa jeetagwa onikisi, na maiga ja kûgemia na maiga jangî jamathongi. Ningî kûrî na maiga ja rangi mwanya mwanya na maiga ja goro ja mîthemba îmingî na nkoronyangwe.

³Amwe na biu bionthe, nkanenkanîra mûthithû jwaakwa jwa thaabu na fetha nîûntû bwa waaki bwa kîûrû.

⁴Nabio nî: Taani îgana rîmwe (100) cia thaabu îtheretue buru na taani magana jaîrî na mîrongo îna (240) cia fetha ya kwereeria nthingo cia kîûrû

⁵na into bionthe birîa atea bakaathithia. Nabo nî barîa bagatumîra thaabu kûthithia into bia thaabu na barîa bagatumîra fetha kûthithia into bia fetha. Nandî rî, nûû ûngî ûkwenda kûrita bieewa bia gûciendera na gûcieejana kîrî MWATHANI naarua?”

⁶Rîu atongeeria ba mîîrîga na ba mîciî yonthe nî baaritîre biewa biaao bia gûciendera. Ûu nou atongeeria ba njûûrî ya asikarî ngiri ngiri na ba asikarî îgana îgana baathithîrie. Ningî kinya arûngamîîri ba into bia mûnene nou baathithîrie.

⁷Nî baaritîre taani îgana rîa mîrongo mûgwanja (170) cia thaabu na bararita taani magana jathatû na mîrongo îna (340) cia fetha. Ningî nî baaritîre taani magana jatantatû na mîrongo îîrî (620) cia îturutia na taani ngiri ithatû na magana jana (3,400) cia chuuma. Biu bionthe biaarî bia gwaka kîûrû.

⁸Muntû ûrîa waarî na maiga ja goro nî aajanenkanagîra jeekwa kîrî mûthithû jwa kîûrû jûrîa jwaamenyagîîrwa nî Jehieli ûrîa waarî Mûlawi wa kuuma mwîrîgeene jwa Gerishoni.

⁹Antû nî baaritîre into biaao kîrî MWATHANI baciendereete. Ûntû bûu bûrabagwîria mono kinya mûnene Daudi arakenua nîbu.

¹⁰Tontû bûû, mûnene Daudi arakumia MWATHANI arî mbere ya kîrîndî kîonthe arauga atîrî, “Gwe baaba weetû, MWATHANI Mûrungu wa Israeli, ûrokumagua kenya na kenya.

¹¹ Gwe MWATHANI ûrî ûmûnene na ûrî inya na ûkumio na ûûmbani na mwago, nîkwîthîrwa bionthe birîa birî îgûrû na nthî nî biaaku. Ûnene nî bwaaku gwe MWATHANI na nî ûthûngûri, ûrî mûnene wa into bionthe.

¹²Ûtonga na gîtîîo biumaga kîrî gwe. Ningî nî gwe waathaga kunthe. Inya na ûûmbani nî biaaku. Nî gwe ûtûmaga antû batîîwa na bagîa inya.

¹³Nandî natuî nî tûgûgûcokeria nkaatho na tûgagûkaatha gwe Mûrungu weetû na tûgakumia riîtwa rîaaku rîrîa rîrî ûkumio.

¹⁴Ûûni na antû baakwa gûtîkîo tûûmba gûkûnenkera. Nîkwîthîrwa nî gwe ûtwete into bionthe natuî twakûrîtîra bimwe bia bio.

¹⁵Tuî tûrî mpinga na ageni mbere yaaku o ta ûrîa biûjûjû bieetû biaarî. Ntukû cieetû aja nthîgûrû ithiraga ntûti o ta ûrîa kîrundu kîthiraga, naatuî tûgakua.

¹⁶MWATHANI Mûrungu weetû, into bibi bionthe tûnenkanîrîte bibingî nîûntû bwa gûgwaakîra kîûrû na gûkumia riîtwa rîaaku rîrîtheru biumîte kîrî gwe na bionthe nî biaaku.

¹⁷Mûrungu waakwa, nî mbijî nîgwe ûgeragia nkoro, naagwe ûgwîragîrua mîîtîre îmîega. Tontû bwa mîîtîre îîu mîega, nî mpeejanîte into bibi bionthe nciendereete ningwa. Rîu nkwona antû baaku barîa barî aja bakîeejana into baciendereete bongwa na bagwîrîtue.

¹⁸Gwe MWATHANI Mûrungu wa biûjûjû bieetû tabio Abrahamu na Isaaka na Jakubu, tûmaga antû baba baaku beendage kûthithagia mantû jaja magiita jonthe baciendereete, na ûtûme bakwaathîkagîre.

¹⁹Tûma mûtaana waakwa Solomoni aathîkagîre maathana jaaku na mawaatho jaaku, na athithagie ûrîa wendaga. Ningî aake kîûrû kîrîa nthuranîrîte into bia gûgîaaka.”

²⁰Rîu mûnene areera antû bau bonthe boothûranîte au atîrî, “Kumieeni MWATHANI Mûrungu weetû.” Nabo antû bonthe barakumia MWATHANI Mûrungu wa biûjûjû biaao baraturia maru, bareenamîîria mwanka nthîgûrû barathaathayia MWATHANI. Ningî baroonania gîtîîo kîrî mûnene waao.

²¹Rûûneene, antû ba Israeli nî baaritîîre MWATHANI igongwana bia gwakîîria. Nabio biaarî ndeegwa ngiri îmwe (1,000) na ntûrûme ngiri îmwe (1,000) na tûtûrûme ngiri îmwe (1,000). Ningî bararita igongwana bia gwîtûûrîria bibingî o amwe na ndibei.

²²Nabo bararîa na baranyua bagwîrîtue barî au mbere ya MWATHANI. Nabo baraeethia Solomoni mûtaana wa Daudi mûnene. Baramwîtûûrîria maguta kwonania nîwe ûkajûkia ûnene nyuma ya Daudi. Ningî baraeethia Zadoki mûthînjîri-Mûrungu.

²³ Solomoni araa mûnene antûûne a îthe Daudi, ûnene bûrîa MWATHANI ambîîrîtie. Nawe aroombana mantûûne jonthe na antû ba Israeli bonthe baramwathîkîra.

²⁴Atongeeria na nchamba cia ndwaa, na ataana ba mûnene Daudi bonthe, bareetîkîîria kwathîkîra mûnene Solomoni.

²⁵MWATHANI nî aatûmîre Solomoni agîta îgweta kîrî antû ba Israeli bonthe, na aratûma agîa nkuma îînene Israeli yonthe, ûrîa gûtî mûnene ûngî wa Israeli wagîa tayo.

²⁶Daudi mûtaana wa Jesii aathanaga Israeli yonthe.

²⁷ Aathîre Israeli mîaka mîrongo îna. Aamîathîre mîaka mûgwanja arî Heburoni, na mîaka mîrongo îthatû na îthatu arî Jerusalemu.

²⁸Rîu mûnene Daudi arakua arî ntindiri, aarî na ûkûrû bwa mîaka îmingî, arî gîtonga na muntû waaeei gîtîîo mono. Solomoni mûtaana waawe araathana antû aawe.

²⁹Najo mantû jarîa mûnene Daudi aathithîrie kuuma akwaa mûnene mwanka gûkua kwaawe, nî jaandîki yukuune rîa ngono cia kîroria Samueli na Kîroria Nathani na kîroria Gadi.

³⁰Ngono ciaandîki mantû jegiî ûrîa aathanaga na ûrîa aarî na inya na mantû jarîa jaamwîjagîîra rîrîa aathanaga. Ningî nî ciaandîki mantû jarîa jeejagîîra nthîgûrû ya Israeli na jarîa jeejagîîra nthîgûrû ingî.