Read KIMERU BIBLE PROTESTANT EDITION 1Ma 3 Bible Online

1Ma 3 - KIMERU BIBLE PROTESTANT EDITION bible

1Ma 3

¹Baba nîbo aana ba Daudi barîa aagîîre rîrîa aarî ntûûreene ya Heburoni. Nabo nî Amoni mûtaana waawe wa kîranga. Ng'ina wa Amoni eetagwa Ahinoamu wa kuuma Jezereeli. Danieli aarî mwana wa baîrî wa Daudi, na ng'ina aarî Abigaili wa kuuma Karimeli.

²Abusalomu nîwe waarî mûtaana wa bathatû wa Daudi. Ng'ina aarî Maaka mwarî wa Talimai. Talimai nîwe waarî mûnene wa Geshuri. Adonija aarî mwana wa bana wa Daudi, na ng'ina aarî Hagithi.

³Shefatia nîwe waarî mûtaana wa bataano wa Daudi, na ng'ina aarî Abitali. Ithireamu aarî wa batantatû, nawe ng'ina aarî Egila.

⁴ Bau bo batantatû nîbo aana barîa Daudi agîîre nabo îgiita rîa mîaka mûgwanja na nusu rîrîa akarîre akîathanaga arî ntûûreene ya Heburoni. Ningî Daudi nî aathanîre arî Jerusalemu mîaka mîrongo îthatû na îthatû.

⁵ Daudi arî Jerusalemu nî aagûrîre mûka weetagwa Bathisheba. Îthe wa mwarî ûu eetagwa Amieli. Mûka ûu aramûciarîra aana baba: Shimea na Shobabu na Nathani na Solomoni.

⁶Daudi nî aarî na aana bangî kenda. Nabo nî Ibihari na Elishua na Elifeleti,

⁷na Noga na Nefegi na Jafia.

⁸Ningî nî aarî na Elishama na Eliada na Elifeleti.

⁹Amwe na bau, aka ba gwîka ba Daudi nî baamûciarîrîte ataana bangî. Ningî nî aarî na mwarî weetagwa Tamari.

¹⁰Rûrîîjo rwa mûnene Solomoni nîru rûrû: Solomoni aarî îthe wa Rehoboamu, Rehoboamu aarî îthe wa Abija, Abija aarî îthe wa Asa, Asa aarî îthe wa Jehoshafati,

¹¹Jehoshafati aarî îthe wa Jehoramu. Jehoramu aarî îthe wa Ahazia, Ahazia aarî îthe wa Joashi.

¹²Joashi aarî îthe wa Amazia na Amazia aarî îthe wa Uzia, Uzia aarî îthe wa Jothamu.

¹³Jothamu aarî îthe wa Ahazi, na Ahazi aarî îthe wa Hezekia, Hezekia aarî îthe wa Manase.

¹⁴Manase aarî îthe wa Amoni, na Amoni aarî îthe wa Josia.

¹⁵Josia aarî na ataana bana: wa mbere eetagwa Johanani, na wa baîrî eetagwa Jehoiakimu, na wa bathatû eetagwa Zedekia na wa bana eetagwa Shalumu.

¹⁶Jehoiakimu aarî na ataana baîrî, nabo nî Jehoiakini na Zedekia.

¹⁷Jehoiakini ûrîa waataîtwe nî Ababiloni nî aarî na ataana mûgwanja, nabo nî Shealitieli,

¹⁸na Malikiramu, na Pedaia, na Shenazari, na Jekamia, na Hoshama na Nedabia.

¹⁹Ataana ba Pedaia baarî Zerubabeli na Shimei. Nabo ataana ba Zerubabeli baarî Meshulamu na Hanania. Zerubabeli nî aarî na mwarî weetagwa Shelomithi.

²⁰Zerubabeli nî aarî na ataana bangî bataano. Nabo nî Hashuba, na Oheli na Berekia na Hasadia na Jushabu-hesedi.

²¹Hanania aarî na ataana baîrî: Nabo nî Pelatia na Jeshaia. Jeshaia nîwe waarî îthe wa Refaia, Refaia aarî îthe wa Arinani, Arinani aarî îthe wa Obadia, Obadia aarî îthe wa Shekania.

²²Shekania aarî îthe wa Shemaia. Nawe Shemaia aarî na ataana bataano. Nabo nî Hatushi na Igali na Baria na Nearia na Shafati.

²³Nearia aarî na ataana bathatû: Elioenai na Hizikia na Azirikamu.

²⁴Elioenai aarî na ataana mûgwanja. Nabo nî Hodavia na Eliashibu na Pelaia na Akubu na Johanani na Delaia na Anani.