Read KIMERU BIBLE PROTESTANT EDITION 1Ma 7 Bible Online

1Ma 7 - KIMERU BIBLE PROTESTANT EDITION bible

1Ma 7

¹Isakari aarî na ataana bana. Nabo nî Tola na Pua na Jashubu na Shimuroni.

²Tola aarî na ataana batantatû. Nabo nî Uzzi na Refaia na Jerieli na Jahimai na Ibisamu na Shemueli. Bau nîbo baarî atongeeria ba mwîrîga jwa Tola na baarî nchamba cia ndwaa. Rîrîa Daudi aathanaga, baarî antû ngiri mîrongo îîrî na ijîîrî na magana jatantatû (22,600).

³Uzzi aarî na mûtaana ûmwe weetagwa Izirahia. Nawe Izirahia aarî na ataana baba: Mikaeli na Obadia na Joeli na Ishia. Bau baarî atongeeria ba mîciî yaao.

⁴Nabo nî baagûrîte aka babaingî mwanka barathegea mono. Tontû bûû, bareethîrwa barî na njûûrî ya ndwaa ya antû ngiri mîrongo îthatû na ithanthatû (36,000).

⁵Nchiarwa cionthe cia mwîrîga jwa Isakari ciaarî na antû barîa barîngîîta ndweene ngiri mîrongo înaana na mûgwanja (87,000) kûringana na ûrîa rûrîîjo rwaandîkagwa.

⁶Ataana ba Benjamini baarî bathatû. Nabo nî Bela na Bekeri na Jadieli.

⁷Bela aarî na ataana bataano. Nabo nî Eziboni na Uzzi na Uzieli na Jerimothi na Iri. Bau nîbo baarî atongeeria ba mîciî yaao na baarî nchamba cia ndwaa. Kûringana na ûrîa kwaandîki maukuune ja ndûrîîjo baarî antû ngiri mîrongo îîrî na ijîîrî na mîrongo îthatû na bana (22,034) barîa barîngî gwîta ndweene.

⁸Bekeri aarî na ataana kenda. Nabo nî Zemira na Joashi na Eliezeri na Elioenai na Omuri na Jeremothi na Abija na Anathothi na Alemethi.

⁹Kûringana na ûrîa kwaandîki maukuune ja ndûrîîjo, antû barîa barîngî gwîta ndweene baarî antû ngiri mîrongo îîrî na magana jaîrî (20,200).

¹⁰Jediaeli aarî na mûtaana ûmwe weetagwa Bilihani. Bilihani aarî na ataana mûgwanja. Nabo nî Jeushi na Benjamini na Ehudi na Kenaana na Zethani na Tarishishi na Aishahari.

¹¹Bau bonthe nîbo baarî ataana ba Jadieli. Baarî atongeeria ba mîciî yaao na baarî na nchamba cia ndwaa ngiri îkûmi na mûgwanja na magana jaîrî (17,200).

¹²Shupimu na Hupimu baarî ataana ba Iri. Nawe Hushimu aarî mûtaana wa Aheri.

¹³Nafutali aarî na ataana bana. Nabo nî Jahizieli na Guni na Jezeri na Shalumu. Bau bo bana baaciari nî Biliha.

¹⁴Mûka wa gwîka wa Manase ûrîa aumîre nawe Aramu, nî aaciarîre ataana baîrî. Nabo nî Asirieli na Makiri. Makiri nîwe waarî îthe wa Gileadi.

¹⁵Makiri nî aagûranîre Hupimu na Shupimu. Mwarî wa ng'ina wa Makiri eetagwa Maaka. Mûtaana wa Makiri ûngî eetagwa Zelofehadi. Nawe Zelofehadi aarî na aarî akî.

¹⁶Makiri nî aagûrîre mûka weetagwa Maaka. Nawe aramûciarîra ataana baîrî. Nabo nî Pereshi na Shereshi. Pereshi nawe aarî na ataana baîrî: Ulamu na Rekemu.

¹⁷Ulamu aarî na mûtaana weetagwa Bedani. Bau nîbo baarî nchiarwa cia Gileadi mûtaana wa Makiri. Makiri ûrîa waarî mûtaana wa Manase.

¹⁸Mwarî wa ng'ina wa Gileadi ûrîa weetagwa Hamolekethi aarî na ataana bathatû. Nabo nî Ishodi na Abiezeri na Mahala.

¹⁹Nawe Shemida aarî na ataana bana. Nabo nî Ahiani na Shekemu na Liki na Aniamu.

²⁰Baba nîbo baarî nchiarwa cia Efuraimu. Efuraimu aarî îthe wa Shuthela. Shuthela aarî îthe wa Beredi. Nawe Beredi aarî îthe wa Tahathi. Tahathi aarî îthe wa Eleada. Eleada aarî îthe wa Tahathi.

²¹Tahathi aarî îthe wa Zabadi. Zabadi aarî îthe wa Shuthela. Efuraimu nî aarî na ataana bangî baîrî. Nabo nî Ezeri na Eleadi barîa booragîrwe bagwîta kwiyîa ng'ombe cia antû ba Gathi.

²²Îthe waao Efuraimu, ararîra nîûntû bwaao îgiita rîrîraaja. Nabo ataana ba ng'ina bareeta kûmûboreria.

²³Efuraimu arathengeera mûka waawe, aragîa îu araciara mwana, aramwîta Beria tontû mûciî jwaao nî jwaarî jûkwona thîîna.

²⁴Mwarî wa Efuraimu eetagwa Sheera nawe nîwe waakithîrie ntûûra ya Bethihoroni îrîa îrî bwa rûgûrû na îrîa îrî bwa gaiti. Ningî nî aakîre ntûûra ya Uzeni-sheera.

²⁵Efuraimu nî aarî na mûtaana ûngî weetagwa Refa. Refa aarî îthe wa Reshefu. Reshefu aarî îthe wa Tela. Nawe Tela aarî îthe wa Tahani.

²⁶Tahani aarî îthe wa Ladani. Ladani aarî îthe wa Amihudi. Nawe Amihudi aarî îthe wa Elishama.

²⁷Elishama aarî îthe wa Nuni. Nawe Nuni aarî îthe wa Joshua.

²⁸Nchiarwa iu cia Efuraimu ciatûûraga Betheli na ntûûra irîa ciaarî akuî nayo. Ningî bwa gaiti bakinya Naarani na bwa rûgûrû bakinya Gezeri; na ntûûra irîa ciaarî akuî nayo. Nî baatûûraga kinya ntûûreene cia Shekemu na Aya, na ntûûra irîa ciaarî akuî nacio.

²⁹Ningî nchiarwa cia Efuraimu ciatûûraga bankeene na mwîrîga jwa Manase kûu Bethisheani na Taanaki na Megido na Dori na ntûûra irîa ciaarî akuî nacio. Kûu nîku nchiarwa cia Josefu mûtaana wa Jakubu ciaatûûraga.

³⁰Asheri aarî na ataana bana. Nabo nî Imina na Ishiva na Ishivi na Beria. Ningî nî aarî na mwarî weetagwa Sera.

³¹Beria aarî na ataana baîrî. Nabo nî Heberi na Malikieli. Melikieli nîwe waarî îthe wa Birizaithi.

³²Heberi nawe aarî îthe wa Jafileti na Shomeri na Hothamu. Ningî nî aarî na mwarî weetagwa Shua.

³³Jafileti nawe aarî na ataana bathatû. Nabo nî Pasaki na Bimuhali na Ashivathi.

³⁴Mûtaana wa ng'ina wa Jafileti ûrîa weetagwa Shemeri aarî na ataana bathatû. Nabo nî Rohiga na Huba na Aramu.

³⁵Mûtaana wa ng'ina wa Shemeri ûrîa weetagwa Helemu nawe aarî na ataana bana. Nabo nî Zofa na Imuna na Sheleshi na Amali.

³⁶Ataana ba Zofa baarî Sua na Harinefa na Shuali na Beri na Imura

³⁷na Bezeri na Hodi na Shama na Shilisha na Ithirani na Beera.

³⁸Ataana ba Jetheri baarî Jefune na Pisipa na Ara.

³⁹Nabo ataana ba Ula baarî Ara na Hanieli na Rizia.

⁴⁰Bau bonthe nîbo baarî nchiarwa cia Asheri. Nabo baarî atongeeria ba mîciî yaao na nchamba cia ndwaa. Ningî nîbo baarî anene ba bangî. Kûringana na maandîko ja ndûrîîjo, kwaarî na antû ngiri mîrongo îrî na ithanthatû (26,000) barîa barîngî gwîta ndweene.