Read KIMERU BIBLE PROTESTANT EDITION 2Ma 1 Bible Online

2Ma 1 - KIMERU BIBLE PROTESTANT EDITION bible

2Ma 1

¹Solomoni, mûtaana wa Daudi, nî airikîîrie ûneneene bwaawe nîûntû MWATHANI Mûrungu waawe nî aarî amwe nawe na nî aamweete inya înene mono.

²Solomoni nî eekîre mûcemanio jwa Israeli yonthe. Nî eetîre atongeeria ba njûûrî ya antû ngiri ngiri na ba antû îgana îgana, na agambi na atongeeria bonthe ba Israeli amwe na atongeeria ba mîîrîga.

³Rîu Solomoni na antû bau bonthe bareeta antû arîa Mûrungu athaathagîrua kûu Gibeoni. Beetîre gûntû kûu nîûntû nî nao îema rîa gûtirimanîra rîrîa Musa nthûûmba ya MWATHANI, aathithîrîtie rwanda rîaarî.

⁴ Îndî Îthandûkû rîa kîrîkanîro rîaarî Jerusalemu îemeene rîrîa mûnene Daudi aarîthithîrîtie rîrîa aarîgîrîre kuuma Kiriathi-jearimu.

⁵ Kinya kîritîro kîa igongwana kîrîa kîathithîtue na îturutia nî Bezaleli, nî kîaarî mbere ya îema rîu rîa gûtirimanîra. Bezaleli aarî mûtaana wa Uri, nawe Uri aarî mûtaana wa Huri. Solomoni na antû bau bonthe boothûranîte au barooria nkuagaya kûûma kîrî MWATHANI.

⁶Solomoni areeta arîa kîritîro kîa igongwana kîa îturutia kîaarî mbere ya îema rîa gûtirimanîra na araritîra MWATHANI igongwana bia gwakîîria ngiri îmwe (1,000).

⁷Ûtukû bûu Mûrungu araumîîra Solomoni aramwîra atîrî, “Mbîîra kîrîa ûkwenda nkwaa?”

⁸Solomoni areera Mûrungu atîrî, “Gwe nî ûtwîre wendeete baaba Daudi na wendo bûbûnene, na nî ûmpeethetie mûnene nyuma yaawe.

⁹ Nandî-rî, MWATHANI Mûrungu, wîrane bwaaku kîrî baaba Daudi nî bûûjûrue, nîûntû nî ûmpeethetie mûnene wa antû babaingî mono mono.

¹⁰Nandî mpa ûûme na ûmenyo menye ûrîa ngatongeeria antû baba baaku nîûntû gûtî we ûûmba gûtongeeria na bwaawe kîrîndî gîkî gîaaku ûrîa kwagîrîte.”

¹¹Mûrungu areera Solomoni atîrî, “Nîkwîthîrwa ûntû bûu nîbu bûraarî nkoroone yaaku, na ûtîraromba into kana ûtonga kana ûkumio kana gîkuû kîa barîa bakûthwîre, na ningî ûtîraromba ûtûûro bûbûraaja îndî waaromba ûûme na ûmenyo nîkenda ûûmba gûtongeeria antû baakwa barîa nkweethetie mûnene waao,

¹²ngûkwaa ûûme na ûmenyo. Ningî ngakwaa kinya ûtonga na into bibingî na ûkumio. Gûtî mûnene noo ûrîkû wagîa na into ta biu mbere yaaku na gûtî mûnene kinya ûmwe ûkorogîa nabio.”

¹³Solomoni arauma nau aarî Gibeoni îemeene rîa gûtirimanîra aracoka Jerusalemu, na araathana Israeli.

¹⁴ Solomoni aroothûrania njûûrî yaawe. Aarî na ngaarî cia ndwaa ngiri îmwe na magana jana (1,400) na mbarathi ngiri îkûmi na ijîîrî (12,000). Areeka asikarî bamwe Jerusalemu kûrîa mûnene atûûraga, na bangî ntûûreene ingî.

¹⁵Îgiita rîa waathani bwa Solomoni, fetha na thaabu ciaingîi Jerusalemu o ja maiga. Mîtarakwa yaaingîi ku ta matî.

¹⁶ Mbarathi cia mûnene Solomoni ciagûragwa kuuma Misri na Cilicia nî aringi biashara baawe.

¹⁷Baagûraga mbarathi na ngaarî cia ndwaa kuuma Misri, na bakeenderia anene ba Ahiti na ba Sîria. Baabendagîria ngaarî îmwe ya ndwaa shekeli magana jatantatû cia fetha (600), na mbarathi îmwe shekeli îgana na mîrongo îtaano (150).