Read KIMERU BIBLE PROTESTANT EDITION 2Ma 10 Bible Online

2Ma 10 - KIMERU BIBLE PROTESTANT EDITION bible

2Ma 10

¹Rehoboamu nî eetîre Shekemu, nîûntû nîku antû ba Israeli bonthe boothûreene nîkenda bamûeethia mûnene.

²Jeroboamu, mûtaana wa Nebati rîrîa aaigîrue mantû jau arî Misri kûrîa eetîte amatûkîte mûnene Solomoni, arauma nao, aracoka Israeli.

³Nabo Aisraeli nî baamûtûmanîre na bareetania kîrî Rehoboamu baramwîra atîrî,

⁴“Abaagu nî aratûûmîrîtie Waatho mono. Nandî nyianyiyia ngûgî irîa tûraritaga indito, na ûregaregerie waatho bûrîa aatweere, naatuî tûgakwathîkîra.”

⁵Rehoboamu arabeera atîrî, “Cokeeni kîrî ni nyuma ya ntukû îthatû.” Nakîo kîrîndî kîraciîtîra.

⁶Mûnene Rehoboamu araromba kîrîra kîrî akûrû barîa baatumîkagîra îthe Solomoni rîrîa aarî mwoyo, arabooria, “Nî atîa bûkwona mbwîrîte gûcokeria kîrîndî gîkî?”

⁷Nabo baramûcokeria atîrî, “Ûkäigîîrua antû baba kîaao, na ûkabagwîria, na kûbaarîria bwega, no bakwaathîkîre îgiita rîonthe.”

⁸Îndî Rehoboamu araregana na kîrîra kîu gîa akûrû, areeta kîrî nthaka cia nthukî yaawe irîa aarî akweethia ba kûmweejaga kîrîra.

⁹Arabooria, “Nîatîa bûkwenda ncokeria antû baba bakûmbîîra atî ndegaregerie waatho bûrîa baaba aabaeere?”

¹⁰Nacio nthaka iu cia nthukî yaao iramwîra, “Îra antû bau ûjû: ‘Kîaraira gîaakwa nî gîkîariî nkûrûki ya kauna ka baaba.

¹¹Baaba nî aabûmîrîtie waatho, îndî ni nkaabûmîria nkûrûki. Arabûûraga na ibooko, naani nkabûûraga na mûcarica!’”

¹²Nyuma ya ntukû ithatû, Jeroboamu na kîrîndî kîonthe baracoka kîrî mûnene Rehoboamu ja ûrîa aabeerîte.

¹³Mûnene Rehoboamu araregana na kîrîra gîa akûrû, araarîria antû aithûûkîtie mono.

¹⁴Arathingata ûrîa nthaka ciamwathîte arauga, “Baaba nî arabûûmîrîtie waatho, îndî ni naani nkabûûmîria nkûrûki; arabûûraga na ibooko, naani nkabûûraga na mûcarica!”

¹⁵Tontû bûû, mûnene ararega kûthikîîra kîrîndî, nîûntû nî MWATHANI Mûrungu waatûmîte mantû jau jakarîka nîkenda oojûria wîrane bwaawe kîrî Jeroboamu mûtaana wa Nebati, bûrîa augîîte agîtumagîra kîroria Ahija ûrîa wa kuuma Shilo.

¹⁶ Rîrîa antû ba Israeli bonthe boonîre atî mûnene akûrega kûbathikîîra baramûcokeria barauga, “Nîmbi tûkwenda kîrî nja ya Daudi? Ga kûrî rûgai tûgûcwaa kuuma kîrî mûtaana wa Jesii? Twaaneeni o muntû nja yaawe antû ba Israeli; nja ya Daudi nî îtigwe nandî iikarie!” Nabo Aisraeli bonthe baraciaanîra nja ciaao.

¹⁷Rehoboamu nî eetîre na mbere kwatha antû ba Israeli barîa baatûûraga nthîgûrû ya Juda.

¹⁸Mûnene Rehoboamu nî aatûmîre Hadoramu ûrîa waarî mûrûngamîîri wa antû barîa baaritithagua ngûgî na inya, îndî antû ba Israeli baramûûra na maiga arakua. Mûnene Rehoboamu aroomba kwithara arathuuta ngaarî yaawe ya ndwaa aracoka Jerusalemu na rwîro.

¹⁹Tontû bûû, antû ba Israeli baatwîre baregeete waathani bwa mûciî jwa Daudi mwanka naarua.