Read KIMERU BIBLE PROTESTANT EDITION 2Ma 11 Bible Online

2Ma 11 - KIMERU BIBLE PROTESTANT EDITION bible

2Ma 11

¹Rîrîa Rehoboamu aakinyîre Jerusalemu, nî oothûranîrie nchamba cia ndwaa ngiri îgana rîa mîrongo înaana (180,000) kuuma mîîrîgeene ya Benjamini na Juda nîkenda eeta nabo kûrwaa na mîîrîga ya Israeli îrîa yaaregeete waathani bwaawe.

²Îndî MWATHANI araarîria Shemaia, muntû wa Mûrungu, aramwîra atîrî,

³“Arîria Rehoboamu mûtaana wa Solomoni, mûnene wa Juda na Aisraeli ba Juda na Benjamini ûbeere

⁴MWATHANI ariuga ûjû: ‘Bûgeeteeni kûrwaa na antû bangî ba Israeli. Cokeeni o muntû nja yaawe, nîûntû nî ni mpendeete ûntû bûbû bûkarîka.’” Nabo baraathîkîra mûgambo jwa MWATHANI baraciaanîra bararega gwîta kûrwaa na Jeroboamu.

⁵Rehoboamu areeta na mbere gûtûûra Jerusalemu, nawe araakithia nthingo cia ntûûra cia Juda na Benjamini arairikia buru. Nacio nî:

⁶Bethlehemu na Etamu na Tekoa,

⁷na Bethizuri na Soko na Adulamu,

⁸na Gathi na Maresha na Zifu,

⁹na Adoraimu na Lakishi na Azeka,

¹⁰na Zora na Aijaloni na Heburoni.

¹¹Araarikia ntûûra iu buru na areeka athani ku, o na irio na maguta na Ndibei,

¹²na rong'o na matumo. Tontû bûû, nthîgûrû ya Juda na Benjamini irakara irî ciaawe.

¹³Nabo athînjîri-Mûrungu na Alawi nî baaumîre kûrîa kunthe baarî ndeene ya Israeli bareeta kîrî Rehoboamu.

¹⁴Alawi beerûkîîre biigai biaao na into biaao bareeta Juda na Jerusalemu nîûntû Jeroboamu na ataana baawe nî baabagirîrie gûtumîkaga ja athînjîri-Mûrungu ba MWATHANI.

¹⁵ Jeroboamu nî aathuurîre athînjîri-Mûrungu baawe ba gûtumîkaga kûrîa kwarombagîrwa, na ba gûtumîkagîra mîrungu ya mîng'uanano îrîa aathithîtie ya mbûri na njaû.

¹⁶Nabo barîa bonthe beetîkîtie MWATHANI Mûrungu wa Israeli nî baathingatîre athînjîri-Mûrungu na Alawi kuuma mîîrîgeene ya Israeli yonthe bareeta Jerusalemu nîkenda baritagîra MWATHANI, Mûrungu wa biujûjû biaao igongwana.

¹⁷Bararikia ûnene bwa Juda, na baraigîka Rehoboamu îgiita rîa mîaka îthatû. Mîakeene îîu yo îthatû baathingataga makinya ja Daudi na Solomoni.

¹⁸Rehoboamu nî aagûrîre Mahalathi, mwarî wa Jerimothi, ûrîa waarî mûtaana wa Daudi. Ng'ina wa Mahalathi aarî Abihaili, ûrîa waarî mwarî wa Eliabu. Eliabu aarî mûtaana wa Jesii.

¹⁹Nawe aramûciarîra ataana bathatû: Jeushi na Shemaria na Zahamu.

²⁰Nyumeene aragûra Maaka, ûrîa waarî mwarî wa Abusalomu. Nawe aramûciarîra ataana bana: Abija na Atai na Ziza na Shelomithi.

²¹Aka bonthe ba Rehoboamu baarî îkûmi na banaana na bangî barîa eekîte mîrongo îtaantatû. Aragia na ataana mîrongo îîrî na banaana na aarî mîrongo îtaantatû. Mûka ûrîa eendeete nkûrûki ya bangî bonthe nî Maaka,

²²na areenda mûtaana wa mûka ûu, Abija, nkûrûki ya aana bau bangî baawe, aramûthuura nîkenda akaathana nyuma yaawe.

²³Rehoboamu nî aathithîrie ûntû bwa ûûme; aragaania ataana baawe na arabeeka ntûûreene indikie cionthe cia Juda na Benjamini. Ningî nî aabaeejaga birîa bionthe beendaga, na arabacwîra aka babaingî.