Read KIMERU BIBLE PROTESTANT EDITION 2Ma 12 Bible Online

2Ma 12 - KIMERU BIBLE PROTESTANT EDITION bible

2Ma 12

¹Rîrîa waathani bwa Rehoboamu bwaarikîre na ûnene bwaawe bûragia na inya, we amwe na antû ba Israeli nî baatigîre kûthingata mawaatho ja MWATHANI.

²Tontû bwa îrema rîaao kîrî MWATHANI, Shishaki, mûnene wa Misri nî aithûkîîre Juda mwakeene jwa îtaano jwa waathani bwa Rehoboamu.

³Aarî na ngaarî cia ndwaa ngiri îmwe na magana jaîrî (1,200) na mbarathi ngiri mîrongo îtaantatû (60,000). Nabo antû barîa eetîte nabo kuuma Misri na Lîbia na Sukimu na Ethiopia bataatarîkaga.

⁴Arataa ntûûra irîa ciaarî indikie cionthe cia Juda mwanka arakinya Jerusalemu.

⁵Rîu kîroria Shemaia areeta kîrî Rehoboamu na athani ba Juda barîa baatirimeene Jerusalemu nîûntû bwa Shishaki arabeera, “MWATHANI ariuga ûjû: ‘O ta ûrîa bûntiganîrîtie, nou naani nkûbûtiganîria bûmbwe nî Shishaki.’”

⁶Nabo athani bau amwe na mûnene barainyiyia barauga atîrî, “MWATHANI nîwe mwagîru.”

⁷Rîrîa MWATHANI oonîre atî bakwinyiiyia, araarîria Shemaia aramwîra, “Tontû bakwinyiiyia ntîbathiria buru, nkabateethia. Ntîtumîra Shishaki gûkanûkia Jerusalemu.

⁸Îndî bakathagwa nî Shishaki nîkenda bamenya nkûûrani ya kûmbathîkîra na kwathîkîra anene ba nthîgûrû.”

⁹ Shishaki araithûkîra Jerusalemu; arajûkia mûthithû jûrîa jweeki kîûrûûne kîa MWATHANI na jwa gîkaro kîa mûnene, areeta naju junthe. Ningî arajûkia rong'o cia thaabu irîa ciathithîtue nî Solomoni.

¹⁰Mûnene Rehoboamu arathithia rong'o ingî cia îturutia. Nacio ciamenyagîîrwa nî akaria ba gîkaro kîa mûnene.

¹¹Rîrîa rîonthe mûnene eetîte kîûrûûne, akaria bau nî beetanagia nawe bakamatîte rong'o iu, na nyumeene bagaicokia nyomba ya akaria.

¹²Tontû bwa ûrîa Rehoboamu aînyiîrie, MWATHANI nî aigwatîre ararega kûmûthiria buru, nayo nthîgûrû ya Juda îrakara na thîîrî.

¹³Rehoboamu nî arikîrie waathani bwaawe buru Jerusalemu. Aarî na ûkûrû bwa mîaka mîrongo îna na jûmwe rîrîa aambîrîîrie kwaathana. Nawe araathana mîaka îkûmi na mûgwanja arî Jerusalemu, ntûûra irîa MWATHANI aathuurîte gatîgatî ka mîîrîga yonthe ya Israeli nîûntû bwa Riîtwa rîaawe. Ng'ina wa Rehoboamu eetagwa Naama, wa kuuma Amoni.

¹⁴Rehoboamu eeîîrie nîûntû bwa kûrega kûromba kîrîra kuuma kîrî MWATHANI.

¹⁵Najo mathithio ja Rehoboamu kuuma kîambîrîîria mwanka mûthia nî jaandîki ndeene ya rûgono rwa Kîroria Shemaia na ndeene ya rûgono rwa Kîroria Ido. Rehoboamu na Jeroboamu nî baarwaga magiita na magiita.

¹⁶Rehoboamu nî aakuîre na arathikwa ntûûra ya Daudi, na Abija mûtaana waawe araa mûnene.