Read KIMERU BIBLE PROTESTANT EDITION 2Ma 13 Bible Online

2Ma 13 - KIMERU BIBLE PROTESTANT EDITION bible

2Ma 13

¹Mwakeene jwa îkûmi na înaana jwa waathani bwa Jeroboamu, nîrîo Abija aeere mûnene wa Juda.

²Aathanîre mîaka îthatû arî Jerusalemu. Ng'ina eetagwa Maaka, mwarî wa Urieli kuuma Gibea. Nawe ararwaa na Jeroboamu.

³Abija aumagarîre na njûûrî ya antû ngiri magana jana (400,000) nawe Jeroboamu areeta gûtirimana nawe na njûûrî ya antû magana janaana (800,000).

⁴Abija araitia kîrîmeene kîa Zemaraimu, nthîgûrû ya irîma ya Efuraimu arauga atîrî, “Gwe Jeroboamu na antû ba Israeli, nthikîîreeni!

⁵Nîka bûtiijî atî MWATHANI Mûrungu wa Israeli nî eekîre kîrîkanîro gîa kenya na Daudi atî anene ba Israeli bakaumaga kîrî nchiarwa ciaawe?

⁶Jeroboamu mûtaana wa Nebati, nthûûmba ya Solomoni mûtaana wa Daudi nî aakararîrie mwathi waawe.

⁷Ningî antû bamwe ngîti nî baamûgwaatîre mbaru nîkenda bakararia Rehoboamu mûtaana wa Solomoni o rîrîa aarî ûmûnini na rîrîa atîngîûmba gûtua îtua na rîrîa ataarî na inya ya kûrwaa nabo.

⁸“Rîu nîka bûkwenda kûrwaa na ûnene bwa MWATHANI, bûrîa bûrî kîrî nchiarwa cia Daudi? Gûtî nkaanja bûrî na njûûrî înene na bûrî na njaû cia thaabu irîa Jeroboamu aabûthithîîrie irî mîrungu yeenu.

⁹Anga bûteengîre kinya athînjîri-Mûrungu ba MWATHANI, na nchiarwa cia Aaroni, na Alawi, na bwaithuurîra athînjîri-mûrungu beenu ja ûrîa antû ba mîgongo îngî bathithagia? O muntû ûrëeja na kareegwa na ntûrûme mûgwanja no aee mûthînjîri-mûrungu wa mîrungu ya mîng'uanano.

¹⁰“Îndî tuî rî, MWATHANI noowe Mûrungu weetû, tûtamwîrûkîra. Athînjîri-Mûrungu beetû no nchiarwa cia Aaroni bagîteethagîîrua nî Alawi.

¹¹Baritagîra MWATHANI igongwana bia gwakîîria na bakaîîthia ubaani rûkîîrî na ûgoro. Beekaga mîgaate yaathûrîri Mûrungu metheene îrîa ntheru na bakagwatia taawa irîa ikaraga ikinyithîtue itungîîne bia thaabu o ûgoro bunthe. Tontû bûû, tuî nî twaathîkagîra uuge bwa MWATHANI, Mûrungu weetû, îndî buî nî bûmûtiganîrîtie.

¹²Mûrungu arî amwe naatuî, na nîwe mûtongeeria weetû. Athînjîri-Mûrungu baawe nîbo bakaaringa tarumbeta ya ndwaa. Antû ba Israeli, menya bwîja kûrwaa na MWATHANI, Mûrungu wa biûjûjû bieenu, nîûntû bûtîûmbana.”

¹³Jeroboamu nî aarî agûtûma antû bamwe bareeta gûcîgîîria njûûrî ya Juda bwa nyuma nawe arî mbere yaao amwe na njûûrî îngî yaawe.

¹⁴Rîrîa njûûrî ya Juda yaciûgûrîre îroona antû barî nyuma yaao na bangî mbere barakaîra MWATHANI. Athînjîri-Mûrungu bararinga tarumbeta.

¹⁵Nayo njûûrî ya Juda îraugîîria na kajû gakanene. Rîrîa bookîrie kajû, Mûrungu nî aatûmîre Jeroboamu na njûûrî ya Israeli yûmbwa nî Abija na njûûrî ya Juda.

¹⁶Aisraeli baramatûka, nawe Mûrungu aratûma boombwa nî antû ba Juda.

¹⁷Abija na antû baawe baragîa na ûûmbani bûbûnene, barooraga antû ngiri magana jataano (500,000) barîa baarî nchamba cia ndwaa cia Israeli.

¹⁸Aisraeli baroombwa nî Juda ndweene nîûntû bwa ûrîa antû ba Juda beerîgîrîre MWATHANI, Mûrungu wa biûjûjû biaao

¹⁹Abija nî eenganîre na Jeroboamu na arataa ntûûra cia Betheli na Jeshana na Efuroni amwe na bieni biaacio.

²⁰Jeroboamu atacoka kûgîa na inya kaîrî îgiita rîonthe rîa waathani bwa Abija. Mûthieene MWATHANI araringa Jeroboamu, aramûûraga.

²¹Îndî Abija nî eetîre na mbere kwirikîria. Aagûrîte aka îkûmi na bana, na aragîa na nthaka mîrongo îîrî na ijîîrî na aarî îkûmi na batantatû.

²²Mantû jangî jarîa Abija auga kana aathithia, jaandîki rûgonoone rwa Kîroria Ido.