Read KIMERU BIBLE PROTESTANT EDITION 2Ma 14 Bible Online

2Ma 14 - KIMERU BIBLE PROTESTANT EDITION bible

2Ma 14

¹Abija arakua, na arathikwa ntûûra ya Daudi. Asa, mûtaana wa Abija, nîwe waatigîîrwe waathani bwa îthe, na rîrîa aathanaga, nthîgûrû nî yaakarîre na thîîrî mîaka îkûmi.

²Asa nî aathîkagîra MWATHANI, Mûrungu waawe mantûûne jarîa aathithagia.

³Aratharia iritîro bia igongwana bia mîgongo ingî na arathûûkia gûntû kûrîa kwarombagîrwa mîng'uanano, na aramomoranga maiga jarîa jaarûngîki, na aratemanga ikingi bia mûrungu jwa Ashera.

⁴Araathana atî antû ba Juda bacokeere MWATHANI, Mûrungu wa biûjûjû biaao, ningî baathîkagîre mawaatho jaawe na uuge bwaawe.

⁵Arathûûkagia iritîro bîa igongwana bionthe na kûrîa kwaîîthagîrua ubaani ntûûreene cia Juda cionthe, nayo nthîgûrû îrakara na thîîrî îgiita rîa waathani bwaawe.

⁶Îgiita rîu gûtî we waithûkagîra Juda, nîûntû MWATHANI nî aamîeete thîîrî. Tontû bûû, Asa nî oombîre gwaakîra ntûûra cia Juda nthingo arairikia buru.

⁷Eerîre antû ba Juda ûjû, “Ga twaake ntûûra iji na twicîgîîrie na nthingo irî na mînaara ya akaria na mpingîro, na iburi. Nthîgûrû îîjî no yeetû nîûntû nî tûcokeereete MWATHANI, Mûrungu weetû, na nîkîo gîtûmîte atwaa thîîrî nteere cionthe.” Tontû bûû baraaka mîako na barathinyaara.

⁸Asa aarî na njûûrî ya antû ngiri magana jathatû (300,000) ba mwîrîga jwa Juda barîa baakamataga rong'o irîa nene na matumo. Ningî nî aarî na njûûrî ya antû ngiri magana jaîrî ja mîrongo înaana (280,000) ba mwîrîga jwa Benjamini barîa baakamataga rong'o inini na moota. Bonthe baarî nchamba cia ndwaa.

⁹Zera, muntû wa kuuma Ethiopia, nî eetîre kwithûkîra nthîgûrû ya Juda arî na njûûrî ya asikarî milioni îmwe (1,000,000) na ngaarî cia ndwaa magana jathatû (300) arakinya Maresha.

¹⁰Asa araumagara gûtirimana nawe, na barabanga njuurî ciaao mûgwanthî jwa Zefatha akuî na Maresha.

¹¹Rîu Asa araromba MWATHANI, Mûrungu waawe akiugaga, “MWATHANI! Gûtî ûngî tiga gwe ûûmba gûteethia barîa batî inya kîrî barîa barî inya. Tûteethie gwe MWATHANI, Mûrungu weetû, nîûntû nîgwe twîrîgîîrîte, na twîjîte kûrwaa na njûûrî îîjî nene ûjû riîtweene rîaaku. Gwe MWATHANI, nîgwe Mûrungu weetû. Ûkáreka muntû no ûrîkû akûûmba.”

¹²MWATHANI nî aatûmîre Asa na antû ba Juda boomba antû ba Ethiopia. Antû bau ba Ethiopia baramatûka.

¹³Asa na njûûrî yaawe bareengana nabo mwanka Gerari. Barooraga njûûrî ya Ethiopia mwanka kûraaga muntû noo ûmwe waatigarîre arî mwoyo. Barakinyangwa barathira buru nî MWATHANI na njûûrî yaawe, nabo antû ba Juda barataa into bibingî mono.

¹⁴Barathûûkangia ntûûra cionthe irîa ciaarî akuî na Gera, nîûntû MWATHANI nî aarî agwîîkîra antû ba gûntû kûu ûguaa bûbwingî, na barataa into bibingî.

¹⁵Ningî nî baithûkîîre arîîthi kûrîa baarî na ndîîthia ciaao na barataa ng'ondu na mbûri na nkamîîra inyiingî mono. Nyumeene baracoka Jerusalemu.