Read KIMERU BIBLE PROTESTANT EDITION 2Ma 15 Bible Online

2Ma 15 - KIMERU BIBLE PROTESTANT EDITION bible

2Ma 15

¹Roho wa Mûrungu nî eejîriîre Azaria mûtaana wa Odedi,

²areeta kîrî Asa aramwîra atîrî, “Thikîîra gwe mûnene Asa, naabuî antû ba Juda na ba Benjamini. Bwaakara kîrî MWATHANI, kinya we agakara kîrî buî. Bwamûcwa bûkamwona, îndî bwamûtiganîrîa kinya we akabûtiganîria.

³Aisraeli baatwîre batî na Mûrungu wa mma. Ningî bataarî na Waatho kana mûthînjîri-Mûrungu wa kûbaritana.

⁴Îndî rîrîa baarî mîthangîkoone, nî baacokeerere MWATHANI, Mûrungu wa Israeli, baramûcwa na baramwona.

⁵Îgiita rîu, muntû atîngîûmba kûrîûngarîûnga naarîa akwenda nîûntû nî kwaarî na thîîna na mîthangîko îmingî nthîgûrûûne cionthe.

⁶Mîgongo yaithûkagîra îngî, nacio ntûûra ikaithûkîra ingî nîûntû Mûrungu nî aabareetagîra mîthangîko îmiingî.

⁷Îndî gwe, ûmîîria na ûgaitîîjîra nîûntû ngûgî yaaku îkagia na umithio.”

⁸Ningî rîrîa Asa aigîrue nteto iu cia ûroria bwa Azaria mûtaana wa Odedi, aroomîîria. Nawe areebeeria mîrungu ya mîng'uanano nthîgûrû ya Juda na Benjamini yonthe, na kuuma ntûûreene irîa aataîte nthî ya irîma ya Efuraimu. Ningî araaka kaîrî kîritîro kîa igongwana kîa MWATHANI gîa kîgongwana kîrîa kîaarî kîaragoone mbere ya kîûrû kîa MWATHANI.

⁹Nî kwaarî na antû babaingî kuuma mîîrîgeene ya Efuraimu na Manase, na Simioni barîa baatûûraga nthîgûrû îîu nîûntû bwa kwona atî MWATHANI nî aarî amwe na Asa. Mûnene Asa nî aabeetîre bonthe amwe na antû ba Juda na Benjamini.

¹⁰Baroothûrana Jerusalemu mweriine jwa îthatû jwa mwaka jwa îkûmi na îtaano kuuma akwambîrîria kwaathana.

¹¹Ntukû îîu bararitîra MWATHANI igongwana kuuma kîrî into birîa baataîte ndweene bia ndeegwa magana mûgwanja (700) na ng'ondu ngiri mûgwanja (7,000).

¹²Nabo bareeka kîrîkanîro atî bakaathîkagîra MWATHANI, Mûrungu wa biûjûjû biaao, na nkoro ciaao cionthe na mîoyo yaao yonthe.

¹³Barauga atî ûrîa wonthe ûkaarega kwathîkagîra MWATHANI, Mûrungu wa Israeli ooragwe, ëethîrwa arî mûnini kana arî mûnene, ntomûrûme kana mûka.

¹⁴Nabo baraciîtîria MWATHANI na kajû gakanene, bagîtûmagîîria na tarumbeta na ngoji.

¹⁵Antû bonthe ba Juda baragwîrîrua mûciîtio jûu nîûntû baaciîtîtie na nkoro yonthe nî baarî bagûcwa MWATHANI na wîru na baramwona. Tontû bûû, MWATHANI arabaa thîîrî nthîgûrû yaao kunthe.

¹⁶Mûnene Asa nî aaritîre ûjûûwe Maaka gîtîîne kîaawe kîa mûka-mûnene nîûntû nî aathithîtie gîkingi kîa mûng'uanano jwa Ashera. Asa aratemanga gîkingi kîu, aragîatûranga na arakîîthîîria mûuro jwa Kidironi.

¹⁷Kinya këethîra Asa atoombîre kwebeeria irombero bia mîng'uanano bionthe kuuma nthî îîu, we nî aatûûrîre aathîkîrîte MWATHANI matukû jonthe ja ûtûûro bwaawe.

¹⁸Nî eekîre into birîa bionthe îthe, Abija aathûrîrîte Mûrungu, o amwe na into bia thaabu na bia fetha birîa we wengwa aathûrîrîte Mûrungu.

¹⁹Naku gûtacoka kûgîa ndwaa kaîrî mwanka mwakeene jwa mîrongo îthatû na îtaano jwa waathani bwa Asa.