Read KIMERU BIBLE PROTESTANT EDITION 2Ma 16 Bible Online

2Ma 16 - KIMERU BIBLE PROTESTANT EDITION bible

2Ma 16

¹Mwakeene jwa mîrongo îthatû na îtaantatû jwa waathani bwa Asa, Baasha mûnene wa Israeli nî aaithûkîîre Juda na araambîrîria kwirigîra ntûûra ya Rama na kûmîrikia nîkenda arigîîria antû gwîta nthîgûrû ya Juda kana kuuma ku.

²Asa ararita fetha na thaabu mîthithûûne ya kîûrû na gîkaro kîa mûnene aratûmana Damaski kîrî Beni-hadadi mûnene wa Sîria aramwîra,

³“Nî tûgîe ngwatanîro gatîgatî gaakwa naagwe ta ûrîa kwaarî gatîgatî ka baaba na abaagu. Nî ûkwona ndîgûgûtûmîra fetha na thaabu. Nandî tharia ngwatanîro yaaku na Baasha, mûnene wa Israeli, nîkenda auma nthî yaakwa.”

⁴Beni-hadadi nî eetîkanîrîrie na mûnene Asa nawe aratûma njûûrî ciaawe ciîta kwithûkîra ntûûra cia Israeli. Barataa Ijoni, na Dani na Abeli-maimu, na ntûûra cia gwîka into cionthe cia nthîgûrû ya Nafutali.

⁵Rîrîa Baasha aigîrue mantû jau, aratiga gwaka Rama, na aratiganîria ngûgî yaawe.

⁶Mûnene Asa areeta Rama na arûme bonthe ba Juda, nabo barakamata mîtî na maiga jarîa Baasha aakaga najo. Aratumîra into biu gwaaka nthingo cia ntûûra cia Geba na Mizipa.

⁷O îgiita rîu, Kîroria Hanani areeta kîrî Asa, mûnene wa Juda, aramwîra atîrî, “Tontû bwa ûrîa ûreekîre wîîrîgîîro bwaaku kîrî mûnene wa Sîria antû a MWATHANI Mûrungu waaku, njûûrî ya mûnene wa Sîria îgûkwîrûkîra.

⁸Uga Ethiopia na Lîbia bataarî na njûûrî inene na ngaarî cia ndwaa na mbarathi inyiingî? Naagwe nîûntû nî weekîre wîîrîgîîro bwaaku kîrî MWATHANI, nî aakûûmbanîrîre kîrî bo.

⁹MWATHANI akaraga araithîîrîîtie nthîgûrû yonthe, nawe aejaga barîa bamwathîkagîra inya. Ûkûthithia waa, naagwe kuuma nandî ûrîtua gûtûûraga ndweene.”

¹⁰Rîu Asa araathûûra mono nî kîroria kîu arakîtheeka na nyororo, arakîgera ncheera. Ningî araambîrîria kwinyîîria antû bamwe baawe mono.

¹¹Mantû jonthe ja waathani bwa Asa kuuma kîambîrîîria mwanka mûthia nî jaandîki rûgonoone rwa Anene ba Juda na ba Israeli.

¹²Mwakeene jwa mîrongo îthatû na kenda jwa ûnene bwa Asa, nî agwaatîrwe nî mûrimo jûmûthûûku jwa magûrû. Nawe kînya rîo ataacwa ûteethio kuuma kîrî MWATHANI, tiga kîrî agaa.

¹³Nyuma ya mîaka îîrî, arakua.

¹⁴Nawe arathikwa gîkurunguune kîa iiga kîrîa aithithîrîtie ntûûreene ya Daudi. Baramûmamia ûrûrîîne bwîkîri macoco na maguta jakûeera bwega. Ningî barakia mwanki jûmûnene jwa kwonania ûrîa baramûtîîte.