Read KIMERU BIBLE PROTESTANT EDITION 2Ma 19 Bible Online

2Ma 19 - KIMERU BIBLE PROTESTANT EDITION bible

2Ma 19

¹Jehoshafati mûnene wa Juda nî aacokîre nja yaawe Jerusalemu na thîîrî.

²Kîroria Jehu mûtaana wa Hanani nî eetîre gûtirimana nawe na aramwîra, “Ûbwuîrîte gûteethia barîa baaî na kwenda barîa bathwîre MWATHANI? Tontû bwa ûu ûthithîtie, MWATHANI arî na marûrû nîûntû bwaaku.

³Îndî kûrî wega ûrî nabu, nîûntû nî weebeeretie mîng'uanano ya Ashera nthîgûrûûne na weetîkia Mûrungu na nkoro yaaku.”

⁴Jehoshafati aatûûraga Jerusalemu. Nî aaumagarîre kaîrî areeta kûriûngîra antû kuuma Beerisheba mwanka nthî ya irîma ya Efuraimu, na arabacokia kîrî MWATHANI, Mûrungu wa biûjûjû biaao.

⁵Nî eekîre agambi nthîgûrû ya Juda, ntûûreene irîa ndikie cionthe,

⁶na arabeera ûjû, “Menyagîîreeni mantû jarîa bûkûthithia, nîûntû bûtîkûgiita magamba nîûntû bwa muntû, îndî nîûntû bwa MWATHANI. MWATHANI akîthagîrwa arî amwe naabuî bûkîgiita magamba.

⁷Imenyagîîreeni bûkîthithia ûu, nîkwîthîrwa MWATHANI Mûrungu weetû atîangaratanagia magamba, ningî atîendaga muntû ûmwe nkûrûki ya ûûngî kana akukumwa.”

⁸Ningî ndeene ya Jerusalemu, Jehoshafati nî aathuurîre Alawi bamwe, na athînjîri-Mûrungu na atongeeria ba mîîrîga ya Israeli, nîkenda baritagîra MWATHANI ngûgî ya kûgiita magamba na kûthiragia mateta. Nabo baakaraga Jerusalemu.

⁹Jehoshafati arabeera atîrî, “Ûjû nîu bûkaathithagia bûgîkîraga MWATHANI, na bûrî na ûûma, na bûcieejeene na nkoro yonthe:

¹⁰Rîrîa rîonthe bwareeterwa îgamba nî ataana ba abaagu kuuma ntûûreene ciaao rîegiî kûûragana, kana Waatho, kana maathana, kana mantû ja wîîthîre bûboonagîîrie ûrîa bathithia batîkeeje kwîyia mbere ya MWATHANI naabuî bwîjîîrwa nî marûrû jaawe amwe na ataana ba abaagu. Bwathithia ûu, bûtîîthîrwa bwîîtie.

¹¹Amaria mûthînjîri-Mûrungu ûrîa mûnene nîwe mûnene weenu ngûgîîne cionthe cia MWATHANI. Zebadia mûtaana wa Ishimaeli nîwe mûrûngamîîri wa antû ba Juda mantûûne jonthe ja mûnene. Alawi nabo nîbo nthûûmba cieenu cia kûrûngamagîîra mantû. Thithagieni mantû bûtî na ûguaa, na MWATHANI arokaraga na barîa baagîru.”