Read KIMERU BIBLE PROTESTANT EDITION 2Ma 2 Bible Online

2Ma 2 - KIMERU BIBLE PROTESTANT EDITION bible

2Ma 2

¹Solomoni nî aabangîre gwaka kîûrû nîûntû bwa riîtwa rîa MWATHANI na gûciakîra gîkaro kîaawe kîa ûnene.

²Araa antû ngiri mîrongo mûgwanja (70,000) ngûgî ya gûkamataga into bia gwaka, na antû ngiri mîrongo înaana (80,000) arabaa ngûgî ya kwînja maiga irîmeene, nabo antû ngiri ithatû cia magana jatantatû (3,600) arabaethia arûngamîîri ba bau bangî.

³Ningî Solomoni aratûmana kîrî Hiramu, mûnene wa Tiro aramwîra atîrî, “Nthithîria o ta ûrîa wathithîîrie baaba Daudi ûramûtûmîra mîtarakwa ya gwaka nyomba yaawe.

⁴Atîrî, ndî akuî gwakîra MWATHANI Mûrungu waakwa nyomba ya kûmûkumithia. Nîyo tûkamûthaathagîria na antû baakwa tûkîîthagia ubaani na kûmûritîra biewa bia mîgaate na igongwana bia gwakîîria rûkîîrî na ûgoro na kinya ntukû ya sabatû, na mambureene ja kûguûka kwa mweri, na ntukû ingî cia mambura ja MWATHANI Mûrungu weetû. Nîwe waathanîte mantû jaja jathithague Israeli kenya na kenya.

⁵Nyomba îrîa ngaaka îkeethîrwa îrî înene mono, nîûntû Mûrungu weetû nî ûmûnene nkûrûki ya mîrungu îngî yonthe.

⁶ Îndî nûû ûûmbîkia gwakîra Mûrungu nyomba na we atîûmba kûng'anîra îgûrû na kinya îgûrû buru? Ga kinya ni mpûûmba kûmwakîra nyomba îkari tiga o antû a kwîîthagîria ubaani mbere yaawe?

⁷Nandî ntûmîra muntû ûrî na ûtea bwa kûthithia into bia thaabu, na bia fetha, na bia îturutia, na bia chuuma. Ningî ûrî na ûtea bwa kûgemia nguû na rangi ya mûkû, na întuune, na ya wiirû bwa îgûrû. Ningî eethîrwe arî na ûtea bwa kwaja into nîkenda aritithanagia ngûgî na atea barîa ndî nabo Juda na Jerusalemu barîa baaba Daudi aathuranîrîte.

⁸Nî mbijî nthûûmba ciaaku nî ciijî gwaatûra mîtî mono. Tontû bûû, ntûmîra mîtî ya mîtarakwa, na mîthithinda na mîraana kuuma Lebanoni. Naani ngatûma nthûûmba ciaakwa iteethanie na ciaaku,

⁹nîkenda ithuranîra mbaaû înyiingî nîûntû ndîenda gwaka nyomba înene mono na ya kûrîgaria.

¹⁰Naani nkaa nthûûmba ciaaku irîa igwaatûra mîtî tani ngiri ijîîrî (2,000) cia nkano, na tani ngiri ijîîrî (2,000) cia mûnyaki, na lita ngiri magana jana (400,000) cia ndibei, na lita ngiri magana jana (400,000) cia maguta ja nzeituni.”

¹¹Hiramu, mûnene wa Tiro nî aatûmîîre Solomoni macokio na barûga aramwîra, “Tontû MWATHANI nî eendeete antû baawe, nî akwethetie mûnene waao.”

¹²Ningî arauga, “Arotharimwa MWATHANI Mûrungu wa Israeli, mûûmbi wa îgûrû na nthî. Nî aeete mûnene Daudi mwana ûmûûme, na ûrî na ûmenyo na ûtea bwa kûûmba gwaakîra MWATHANI nyomba na gûciakîra gîkaro kîaawe kîa ûnene.

¹³Nandî naani ndîgûgûtûmîra Huramiabi, mûtea ûrî na ûmenyo mono.

¹⁴Ng'ina nî wa mwîrîga jwa Dani, na îthe nî wa kuuma Tiro. Nî aijî kûthithia into bia thaabu, na bia fetha na bia îturutia, na bia chuuma, na bia maiga na bia mîtî. Ningî nî aijî kûthithia itambaa bia rangi ya mûkû na întuune na ya wiirû bwa îgûrû, na nguû imbûthû. Ningî oomba kwaja gîntû o kîonthe kîrîa akeerîrwa. Akaritanîria ngûgî amwe na atea ba abaagu, mwathi waakwa Daudi.

¹⁵Nandî tumîra nthûûmba ciaaku nkano, na mûnyaki, na maguta, na ndibei o ûu uugîîte.

¹⁶Tuî naatuî tûgatema mîtî îrîa ûkwenda yonthe kuuma Lebanoni na tûkûreetere yo na îria mwanka Jopa. Naagwe, kuuma au, ûmîjûkie ûmiikie Jerusalemu.”

¹⁷“Solomoni aratara ageni bonthe barîa baatûûraga nthîgûrû ya Israeli o ta ûrîa îthe Daudi athithîtie. Nabo bagûtarwa, barooneka baarî antû ngiri îgana rîa mîrongo îtaano na îthatû na magana jatantatû (153,600).

¹⁸Kîrî ageni bau, nî aaere antû ngiri mîrongo mûgwanja (70,000) ngûgî ya gûkamata into, na antû ngiri mîrongo înaana (80,000) arabaa ngûgî ya kwaja maiga kîrîmeene, nabo antû ngiri ithatû cia magana jatantatû (3,600) arabaa ngûgî ya kûrangamîîra bau bangî bakîrita ngûgî.”