Read KIMERU BIBLE PROTESTANT EDITION 2Ma 20 Bible Online

2Ma 20 - KIMERU BIBLE PROTESTANT EDITION bible

2Ma 20

¹Nyumeene, antû ba Moabu na Amoni, amwe na antû bamwe ba Ameuni nî beetîre kûrwaa na Jehoshafati.

²Antû bamwe bareeta bareera Jehoshafati atîrî, “Antû babaingî mono nî bakwîjîîrîte baumîte Edomu, rwongo rûrîa rûngî rwa îria rîa Chumbî, na atîrî, nandî baagûkinya Hazazoni-tamari.” Hazazoni-tamari nooku Enigedi.

³Jehoshafati araigua ûguaa, araambîrîîria kûromba MWATHANI, na aratûmîîria Juda kunthe arauga antû baciate irio.

⁴Nabo antû barauma ntûûreene cionthe cia Juda baroothûrana amwe nîkenda bacwaa ûteethio kuuma kîrî MWATHANI.

⁵Jehoshafati nî aarûngamîre ntunduune ya antû ba Juda na Jerusalemu kîûrûûne mbere ya kîarago kîrîa kîerû

⁶arauga atîrî, “Gwe MWATHANI, Mûrungu wa biûjûjû bieetû; anga gwe tîgwe Mûrungu ûrîa ûrî kûu îgûrû? Anga tîgwe waathaga moonene jonthe ja mîgongo? Inya na ûûmbani birî njareene ciaaku, na gûtî muntû ûûmba gûkwirima.

⁷ Atîrî, gwe Mûrungu weetû, anga ûteengîre antû barîa baatûûraga nthîgûrû îîjî nîûntû bwa antû baaku ba Israeli na ûramîeejana kîrî nchiarwa cia Abrahamu mûcoore waaku?

⁸Nabo nî batwîîre ku, na nî bagwaakîrîte nyomba întheru o ku nîûntû bwa riîtwa rîaaku bakiugaga,

⁹‘Tûkëeja kwîjîîrwa nî ûthûûku-rî, bûrî bwa ndwaa, kana bwa ndwari îmbîî, kana bwa mpara, tuî tûkaarûngama kîûrûûne gîkî, na mbere yaaku, nîûntû kîûrûûne gîkî nîku ûthaathagîrua. Naatuî twagûkaîra nîûntû bwa thîîna yeetû ûtwigue na ûtwonokie.’

¹⁰ Nandî tega woone antû ba Amoni na ba Moabu na ba Kîrîma kîa Edomu, barîa waagirîrie antû ba Israeli baithûkîra rîrîa baumaga nthî ya Misri, barabeeba na batîbathirie.

¹¹Nandî nî ûkwona barîtûrîaa na kwîja gûtwînga kiigaine gîaaku kîrîa ûtûgaîrîte!

¹²Itû gwe Mûrungu weetû; tîgwe ûkaagiita bwaao? Tontû tuî tûtî na inya ya kûûmba kîrîndî gîkî kîonthe gîtwîjîîrîte. Tûtîkûmenya ûrîa tûkathithia, îndî nîgwe twîrîgîrîte.”

¹³Îgiita rîu, antû bonthe ba Juda baarûngi mbere ya MWATHANI barî na tûkenke twaao, na aka baao, na aana baao.

¹⁴Roho wa MWATHANI nî eejîriîre Jahazieli mûtaana wa Zekaria. Zekaria aarî mûtaana wa Benaia. Benaia aarî mûtaana wa Jeieli. Jeieli aarî mûtaana wa Matania ûrîa waarî Mûlawi wa mwîrîga jwa Asafu. Roho wa MWATHANI aramwîjîîra arî ntunduune gatîgatî,

¹⁵ nawe arauga; “Thikîîreeni buî antû bonthe ba Juda, na atûûri ba Jerusalemu, na mûnene Jehoshafati. MWATHANI arîbwîîra ûjû: ‘Bûgáakîreni kana bûmaka nîûntû kîrîndî gîkî nî gîkiingî ûjû, nîûntû ndwaa tî yeenu, nî ya Mûrungu.

¹⁶Rûûjû înameeni bûkarwee nabo. Bagaitîîria njîreene ya Zizi, naabuî bûbatirime mûthieene jwa mûguuru bwa gaiti ya bûûrî ya Jerueli.

¹⁷ Bûtîbatara kûrwaa ndwaa îîjî. Bûkaarûngama arîa bûrî bûkirîte ki bwoone MWATHANI akîbûûmbanîra, buî antû ba Juda na Jerusalemu.’ Tigeeni gûkîra kana bûmaka. Rûûjû umagareni bûkarwee nabo, na MWATHANI akeethîrwa arî amwe naabuî.”

¹⁸Rîu Jehoshafati areenîka mûtwe aratiirithia ûthiû bwaawe nthi, na kinya antû ba Juda bonthe na atûûri ba Jerusalemu nî baairingîre nthî mbere MWATHANI, bakîmûthaathagia.

¹⁹Nabo Alawi ba mwîrîga jwa Kohathi na jwa Kora bararûngama barakumia MWATHANI Mûrungu wa Israeli na kajû gaakanene.

²⁰Rûûneene barookîîra rûkîîrî kainda baraumagara bareeta bûûrîîne ya Tekoa. Rîrîa baaumagaraga Jehoshafati nî aarûngamîre na arauga, “Nthikîîreeni buî antû ba Juda na atûûri ba Jerusalemu! Îtîkieni MWATHANI Mûrungu weenu, nawe agaatûma bwirikîrie. Îtîkieni iroria biaawe, naabuî bûkoona ûûmbani.”

²¹Aracoka araireba na atongeeria, arathuura antû ba kwinîra MWATHANI bakîmûkumagia na ndwîmbo, beetîte barî mbere ya njûûrî. Nabo bainaga ûjû: “Cokerieni MWATHANI nkaatho, nîûntû kîaao kîaawe gîtûûraga kenya na kenya.”

²²Rîrîa baambîrîîrie kwina na gûkumia, MWATHANI nî aumbuthûrîre antû ba Amoni na Moabu na ba Kîrîma kîa Edomu barîa beetîte kwithûkîra Juda na baroombwa.

²³Antû ba Amoni na ba Moabu nî bagarûkîre atûûri ba Kîrîma kîa Edomu barabathiria buru. Bakûthiria kûthithia ûu, baracoka kûthirania bongwa.

²⁴Rîrîa antû ba Juda baakinyîre mûnaareene jwa akaria rwanda, nî baategîre ndeerîa njûûrî îîu ya maitha yaarî, baroona nî biimba akî bianyaganîte nthîgûrû. Gûtî noo ûmwe waatigeere arî mwoyo.

²⁵Jehoshafati na antû baawe nî beetîre gûtaa into kîrî bo, nabo bareethîra ng'ombe inyiingî mono, na into, na nguû, na into bia goro, barabikamata mwanka birarema. Baathirîrie ntukû ithatû bagîkamataga into biu nî ûrîa biaingîîte.

²⁶Ntukû ya inya baroothûrana mûuro jwa Beraka baratharimîra MWATHANI nao. Tontû bûû, mûuro jûu jwîtagwa Mûuro jwa Beraka[3] mwanka naarua.

²⁷Rîu antû bau bonthe ba Juda na Jerusalemu baracoka Jerusalemu batongeeretue nî Jehoshafati bagwîrîtue, nîûntû MWATHANI nî aaboombanîrîte kîrî anthû baao.

²⁸Nabo baracoka Jerusalemu bakîringaga inanda na wandîîndî na tarumbeta bareeta kîûrûûne.

²⁹Najo moonene ja nthîgûrû cionthe jarakîra Mûrungu rîrîa baigîrue atî MWATHANI nî aarwîte na anthû ba Israeli.

³⁰Tontû bûû, nthîgûrû îrîa Jehoshafati aathaga nî yaakarîre îrî na ûkiri nîûntû Mûrungu waawe nî aamweete thîîrî nteere cionthe.

³¹Ûu nîu Jehoshafati aathanîre Juda. Aarî na ûkûrû bwa mîaka mîrongo îthatû na îtaano rîrîa aambîrîîrie kwaathana, na araathana mîaka mîrongo îîrî na îtaano arî Jerusalemu. Ng'ina eetagwa Azuba, mwarî wa Shilihi.

³²Nî aathingatîre ngerekano ya îthe Asa atîkûmîebera, arathithia mantû ja kûgwîria MWATHANI.

³³Îndî iritiro bia igongwana bia tûrîma bitoomba kwebeerua, nîûntû antû bataarî bagûcokeera Mûrungu wa biûjûjû biaao na nkoro ciaao.

³⁴Najo mantû jangî jonthe jarîa Jehoshafati aathithîrie, kuuma bwa mbere mwanka bwa mûthia jaandîki rûgonoone rwa Jehu, mûtaana wa Hanani rûrîa rûrî yukuune rîa anene ba Israeli.

³⁵Jehoshafati mûnene wa Juda nî aathithîrie ngwatanîro na mûnene Ahazia wa Israeli, ûrîa wathithagia mantû jamathûûku mono.

³⁶Baagwatanîîre nîkenda bathithia meri cia gwîta Tarishishi, nabo baacithithagîria Ezioni-geberi.

³⁷Îndî Eliezeri mûtaana wa Dodarahu wa ntûûra ya Maresha nî aarorerie Jehoshafati mantû jamaaî aramwîra, “Tontû bwa kûgwatanîra na Ahazia, MWATHANI akaathûkangia birîa bûthithîtie.” Nacio meri irathûûkanga iraremwa nî gûkinya Tarishishi.