Read KIMERU BIBLE PROTESTANT EDITION 2Ma 21 Bible Online

2Ma 21 - KIMERU BIBLE PROTESTANT EDITION bible

2Ma 21

¹Jehoshafati nî aakuîre na arathikwa mbîrîreene cia biûjûjû biaao Ntûûreene ya Daudi, na Jehoramu mûtaana waawe araa mûnene.

²Jehoramu aarî na ataana ba îthe baba: Azaria na Jehieli na Zekaria na Azaria na Mikaeli na Shefatia. Bonthe barî ataana ba Jehoshafati.

³Îthe nî aabatigîrîte biewa bibingî bia fetha na thaabu na into bigiingî bia goro o amwe na ntûûra indikie cia Juda. Îndî aatigîîre Jehoramu ûnene nîûntû nîwe waarî mûtaana waawe wa kîranga.

⁴Rîrîa Jehoramu aakarîîre gîtî kîa îthe kîa ûnene na arairikîria, nî ooragîre ataana ba îthe bonthe na atongeeria bamwe ba Juda.

⁵Jehoramu aarî na ûkûrû bwa mîaka mîrongo îthatû na îîrî rîrîa aambîrîirie kwaathana, nawe araathana mîaka îkûmi arî Jerusalemu.

⁶Nî eeîîrie mbere ya MWATHANI mono. Nî aathingatîre ngerekano ya anene ba Israeli ta ûrîa nchiarwa cia Ahabu ciathithîrie, nîûntû nî aagûrîte mwarî wa Ahabu.

⁷ Îndî MWATHANI ateendîre kûthiria rûrîîjo rwa Daudi nîûntû bwa kîrîkanîro kîaawe na Daudi na ûrîa aamûciîtîrîtie atî nchiarwa ciaawe igaatûûra ciathanaga kenya na kenya.

⁸ Matukûûne ja Jehoramu, antû ba Edomu nî baakararîrie waathani bwa Juda na baraithuurîra mûnene waao bongwa.

⁹Jehoramu nî aumagarîre na atongeeria baawe ba njûûrî na ngaarî ciaawe cia ndwaa, na arookîîra ûtukû araûûra antû ba Edomu barîa baamûcîgîîrîîtie amwe na atongeeria baawe ba ngaarî cia ndwaa.

¹⁰Tontû bûû, Edomu nî yaareganîre na waathani bwa Juda mwanka naarua. Îgiiteene o rîu, antû ba Libuna kinya bo nî baareganîre na waathani bwa Jehoramu, nîûntû nî aatiganîte na MWATHANI, Mûrungu wa biûjûjû biaao.

¹¹Nkûrûki ya jau nî aathithîtie tûrîma twa kûritagîrwa mîrungu ya mîng'uanano igongwana nthîgûrû ya irîma ya Juda. Ningî aratûma atûûri ba Jerusalemu bamaramara na araatithia Juda njîra.

¹²Jehoramu nî aareeteerwe barûga kuuma kîrî kîroria Elija îkiugaga: “Ûjû nîu MWATHANI, Mûrungu wa kiûjûjû kieenu Daudi augîîte: ‘Nî ûregeete kûthingata mîîtîre ya abaagu Jehoshafati, kana mîîtîre ya Asa ûrîa waarî mûnene wa Juda,

¹³wathingata mîîtîre ya anene ba Israeli. Nandî nî ûtûmîte antû ba Juda na atûûri ba Jerusalemu baamaramara ta ûrîa nja ya Ahabu yaatûmîre Israeli îmaramara. Ningî gwe nî ûûragîte ataana ba abaagu, barîa baraarî babega nkûrûki yaaku.

¹⁴Tontû bûû, MWATHANI agatûma antû baaku amwe na aana baaku, na aka baaku, baajue nî mûrimo jûmûthûûku, na athirie into biaaku bionthe.

¹⁵Gwe naagwe ûkagwatwa nî mûrimo jûmûnene jwa kîu na jwîte na mbere kwongereka o ntukû o ntukû.’”

¹⁶MWATHANI nî aatûmîre Afilisti na Arabu barîa baarî akuî na antû ba Ethiopia bathûûra Jehoramu.

¹⁷Nabo bareeta baraithûkîra Juda, na barataa into bia gîkaro kîa mûnene bionthe na kinya ataana baawe, na aka baawe. Gûtî mûtaana waawe baatiga tiga Ahazia, mûtaana waawe ûrîa waarî mûnini buru.

¹⁸Nyuma ya mantû jau jonthe, MWATHANI aramwajithia mûrimo jûmûthûûku jwa kîu jûtîkwora.

¹⁹Nyuma ya mîaka îîrî, mûrimo jaawe jûreeta na mbere kwongereka nkûrûki na arakua gîkuû kîa ûrûrû bûbwingî mono. Antû baawe batakîrie mwanki jwa kwonania nî bamûtîîte ta ûrîa anene barîa baarî mbere yaawe bathithagîrua.

²⁰Jehoramu aarî na ûkûrû bwa mîaka mîrongo îthatû na îîrî akîambîrîîria kwaathana, na aathanîre arî Jerusalemu mîaka inaana. Rîrîa akuîre gûtî muntû waamûrîrîra. Nawe aathikîrwe Ntûûra ya Daudi, îndî tî mbîrîreene cia anene.