Read KIMERU BIBLE PROTESTANT EDITION 2Ma 23 Bible Online

2Ma 23 - KIMERU BIBLE PROTESTANT EDITION bible

2Ma 23

¹Mwakeene jwa mûgwanja jwa waathani bwa Athalia, mûthînjîri-Mûrungu ûrîa weetagwa Jehoiada nî aajûkîrie îtagaaria, araireba na atongeeria ba njûûrî ya antû îgana. Nabo baarî Azaria, mûtaana wa Jehoramu, na Ishimaeli mûtaana wa Jehohanani, Azaria mûtaana wa Obedi, na Maaseia mûtaana wa Adaia, na Elishafati mûtaana wa Zikiri.

²Bareetania na nthîgûrû ya Juda yonthe bakîuthûranagia Alawi kuuma ntûûreene cionthe cia Juda, na atongeeria ba mîîrîga ya Israeli, baracemania Jerusalemu.

³ Ntundu îîu yonthe îrarîîkania na mûnene îrî kîûrûûne kîa Mûrungu. Jehoiada arabeera ûjû, “Tegeeni, ûûjû nî mûtaana wa mûnene! Ka aathane o ta ûrîa MWATHANI augîîte bwa nchiarwa cia Daudi.

⁴Ûjû nîu bûkaathithia: buî athînjîri-Mûrungu na Alawi barîa bwîthagîrwa bûtî ngûgîîne ntukû ya sabatû, gîchunchî kîmwe kîrî bithatû kîeenu gîgaakaria mpingîro.

⁵Gîchunchî kîîngî kîmwe kîrî bithatû gîgaakaria gîkaro kîa mûnene, na kîu kîngî gîgaakaria mpingîroone ya Mûsingi. Antû bau bangî bonthe nabo bakeethîrwa barî biaragoone bia kîûrû kîa Mûrungu.

⁶Gûkágîta muntû noo ûrîkû ûkûrûka kîûrûûne tiga athînjîri-Mûrungu na Alawi barîa bagûtumîka. Bau no bakûrûke nîûntû nî babatheru, îndî antû bangî bonthe no mwanka boojûrie Waatho bwa MWATHANI.

⁷Alawi bagaacigîîria mûnene na beetanagie nawe arîa onthe ageeta, o muntû agwete mathaga jaawe ja ndwaa, na o muntû ûrîa ûgaakûrûka kîûrûûne ooragwe.”

⁸Nabo Alawi na antû bonthe ba Juda nî baathithîrie mantû jonthe kûringana na ûrîa Jehoiada mûthînjîri-Mûrungu aabeerîte. O mûtongeeria areeta na antû baawe barîa baabuîrîte kwambûrwa na barîa baabuîrîte kwambûrana ntukû ya sabatû. Jehoiada mûthînjîri-Mûrungu ataaraganîrie mûtaratara jwaao jwa kûrita ngûgî.

⁹Ningî Jehoiada nî aanenkeere atongeeria ba njûûrî matumo na rong'o irîa nene na irîa nini irîa ciaarî cia mûnene Daudi, na cieeki kîûrûûne kîa Mûrungu.

¹⁰Arabangania antû nîkenda bakaria mûnene, kuuma rûteere rwa ûmotho rwa kîûrû gwîta rûteere rwa ûrîo, na kîritîro kîa igongwana, na kûthiûrûka kîûrû kîonthe.

¹¹Jehoiada aracoka araumagaria mûtaana wa mûnene, aramwîkîra thirû mûtwe, na aramûnenkera yuku rîa waathani. Jehoiada na ataana baawe baramwîtûûrîria maguta, baramwethia mûnene, na antû baratûmîîria bakiugaga, “Mûnene arotûûra matukû jamaingî!”

¹²Rîrîa Athalia aaigîrue gîtuma gîa antû boogîi bagîkumagia mûnene, nî eetîre kîûrûûne naarîa antû baarî.

¹³Nawe aatega, aroona mûnene arûngi gîtugîîne kîaawe mwariine, nabo atongeeria ba njûûrî na aringi mîtûrirû barûngi akuî na mûnene. Nabo antû bonthe ba Juda nî baagwîrîtue mono. Nî baaringaga tarumbeta, na aini bakîringaga into biaao bia wiini batongeeretie mambura. Athalia akwoona ûu aratambûranga nguû ciaawe akiugaga, “Îî ngûkunyanîrwa! Îî ngûkunyanîrwa!”

¹⁴Jehoiada, mûthînjîri-Mûrungu nî eetîre atongeeria ba njûûrî arabeera, “Muumagarîîrieni gatîgatî ka njûûrî, na muntû noo ûrîkû akëeja kûmûthingata ooragwe na rûchiû.” Ningî nî aarî akuuga atîrî, “Menyeni bwîja kûmûûragîra kîûrûûne.”

¹⁵Nabo baramûgwata baramwikia gîkaro kîa mûnene, na baramûûragîra Mpingîroone ya Mbarathi.

¹⁶Jehoiada nî aathithîrie kîrîkanîro amwe na antû bonthe na mûnene barauga atî bakarage barî antû ba MWATHANI.

¹⁷Ningî antû bonthe nî beetîre kîûrûûne kîa Baali barakîmomoranga. Barathûûkangia iritîro bia igongwana bia Baali amwe na mîng'uanano yaawe, na barooragîra Matani ûrîa waarî mûthînjîri wa Baali mbere ya iritîro bia igongwana.

¹⁸Jehoiada nî eekîre akaria ba kîûrû kîa MWATHANI, tabo athînjîri-Mûrungu Alawi amwe na Alawi barîa Daudi aabangîte bamenyagîîra kîûrû kîa MWATHANI, baritagîra Mwathani igongwana bia gwakîîria ta ûrîa kwaandîki Waathoone bwa Musa, barî na kûgwîrua, na bakiinaga ndwîmbo kûringana na mûbango jwa Daudi.

¹⁹Areeka akaria mpingîroone cia kîûrû nîkenda muntû noo ûrîkû ûtîtheri atîkeeje gûkûrûka kîûrûûne.

²⁰Ningî Jehoiada nî eetîre atongeeria ba njûûrî, na antû barîa batîîe, na agambi, na antû bonthe ba nthîgûrû, nabo baragîîra mûnene kîûrûûne. Baramûûmagarîîria mpingîroone ya bwa rûgûrû, baramwikia gîkaro kîa mûnene na baramûkarithia rûrigeene rwa ûnene.

²¹Tontû bûû, antû bonthe ba nthîgûrû îîu nî baagwîrîrue mono na ntûûra îragîa na thîîrî nyuma ya Athalia akûûragwa.