Read KIMERU BIBLE PROTESTANT EDITION 2Ma 25 Bible Online

2Ma 25 - KIMERU BIBLE PROTESTANT EDITION bible

2Ma 25

¹Amazia aeere mûnene arî na mîaka mîrongo îîrî na îtaano. Aathanîre arî Jerusalemu mîaka mîrongo îîrî na kenda. Ng'ina eetagwa Jehoadani kuuma Jerusalemu.

²Nî aathithîrie mantû jameega mbere ya MWATHANI, îndî nkoro yaawe îtaarî întheru buru.

³Rîrîa oonîre aakwirikîria waathaniine, nî ooragîre nthûûmba ciaawe irîa cioragîre îthe, Joashi.

⁴ Îndî atooragîre aana baao nîûntû bwa ûrîa kwaandîki Waathoone bwa Musa ûrîa MWATHANI aaugîre atî, “Aciari batîûragwa nîûntû bwa meeyia ja aana baao, kana aana booragwa nîûntû bwa meeyia ja aciari baao; îndî o muntû akooragwa nîûntû bwa meeyia jaawe wengwa.”

⁵Mûnene Amazia aracoka arabangania arûme bonthe ba mîîrîga ya Juda na Benjamini kûringana na mîciî yaao, na arathuura atongeeria ba njûûrî ba antû ngiri ngiri, na ba antû îgana îgana. Muntû wonthe ûrîa waarî na ûkûrû bwa mîaka mîrongo îîrî kana nkûrukî nî aathuuragwa. Bonthe barîa baathuurîrwe baarî ngiri magana jathatû (300,000). Aathuurîre antû barîa baijî kûrwaa na matumo na rong'o bwega.

⁶Ningî nî aakoomborere nchamba cia ndwaa ngiri îgana rîmwe (100,000) kuuma Israeli na îrîi rîa mbeecha kilo ngiri ithatû na magana jana (3,400) cia fetha.

⁷Îndî kîroria kîmwe kîreeta kîrî mûnene kîramwîra, “Itû mûnene, menya ûreka njûûrî ya Israeli îîtania naagwe ndweene, nîûntû MWATHANI atî amwe na antû ba Israeli, bau bonthe ba mwîrîga jwa Efuraimu.

⁸Kinya bûkarwaa na ûchamba bûnene atîa ndweene, Mûrungu agaatûma bûûmbwe nî anthû, nîûntû nowe ûûmba kûbûteethia kana agatûma bûûmbwa.”

⁹Amazia arooria kîroria atîrî, “A mbeecha cionthe irîa ndîîte nîûntû bwa njûûrî ya Israeli?” Nawe muntû ûu wa Mûrungu aramwîra, “MWATHANI no akwee inyiingî nkûrûki ya iu.”

¹⁰Tontû bûû, Amazia areera antû barîa baumîte Efuraimu baane. Nabo barathûûra mono nîûntû bwa Juda na baraana bang'enti mono.

¹¹Amazia aracoka araciûmia aratongeeria njûûrî yaawe Mûuro jwa Chumbî, na arooraga antû ngiri îkûmi (10,000) ba Seiri.

¹²Ningî njûûrî ya Juda îragwata antû ngiri îkûmi (10,000) barî mwoyo, îrabaikia rwareene ntûûreene ya Sela îrabaarûkia, nabo baragwa nthî barataatimûkanga.

¹³Îgiita rîu, njûûrî ya Israeli îrîa Amazia eerîte îaane îtîgeete nawe ndweene nî yaaithûkîîre ntûûra cia Juda kuuma Samaria mwanka Bethihoroni îrooraga antû ngiri ithatû (3,000) na îrataa into bibingî.

¹⁴Amazia akiuma kûrwaa na antû ba Edomu, nî aakamatîre mîrungu ya antû ba Seiri. Nawe aramîeethia mîrungu yaawe, aratua kûmîthaathagia na kûmîritîra igongwana bia gwakîîria.

¹⁵MWATHANI arathûûra mono nîûntû bwa Amazia na aramûtûmîra kîroria. Nakîo kîroria kîramwîra, “Nîmbi îtûmîte ûtua kûrombaga mîrungu îîjî ya antû baba, îrîa îtoombîre kwonokia antû baayo kuuma kîrî gwe?”

¹⁶Îndî o akîaragia, mûnene aramwîra, “Nîka ûthuurîîtwe ûrî mweejani kîrîra wa mûnene? Kira, kana mbuge ûûragwe?” Kîroria kîu nakîo kîrakira îndî kîramwîra, “Nî nkûmenya atî MWATHANI nî abangîte gûkûûraga, nîûntû bwa kûthithia ûjû na nîûntû bwa kûrega kûnthikîîra.”

¹⁷Nyuma ya Amazia mûnene wa Juda kûromba kîrîra kîrî agambi baawe, nî aatûmanîre agikumagia kîrî Joashi mûtaana wa Jehoahazi, mûtaana wa Jehu, mûnene wa Israeli akîmwîraga: “Njû twonane nkaanja ithire.”

¹⁸ Îndî Joashi mûnene wa Israeli aracokeria Amazia mûnene wa Juda atîrî, “Îgiita rîmwe gîtî kîmwe kîa miigua kîa Lebanoni nî gîatûmanîre kîrî mûtarakwa o kûu Lebanoni kîrauga, ‘Reka mûtaana waakwa agûre mwarî waakû.’ Îndî nyamû ya kîthaka îkûrûkîte îrakinyanga gîtî kîû kîa mîîgua.

¹⁹Naagwe ûriuga, ‘Ûtîkwona, ndîkûûmba Edomu,’ na nî gwikumia gwa nkoro yaaku gûkwaîrîîtie. Ikarîre gwaaku gwe. Ûrîcwa thîîna nîkî ûcoka ûguaa amwe na antû ba Juda?”

²⁰Îndî Amazia ararega kwigua, nîûntû Mûrungu nî eendaga kûbanenkanîra kîrî Joashi nîûntû bwa kûromba mîrungu ya Edomu.

²¹Tontû bûû, Joashi mûnene wa Israeli arabaithûkîra. We na Amazia mûnene wa Juda baratirimana ndweene Bethishemeshi îrîa îrî nthîgûrû ya Juda.

²²Antû ba Juda nî boombîrwe ndweene nî Aisraeli na baramatûka o muntû nja yaawe.

²³Joashi mûnene wa Israeli aragwatîra Amazia mûnene wa Juda nau Bethishemeshi. Aramûikia Jerusalemu na aramomoranga rûthingo rwa Jerusalemu kuuma Mpingîroone ya Efuraimu mwanka Mpingîroone ya Gîkumbo, antû a ûraaja bwa mita magana jaîrî (200m).

²⁴Ningî Joashi arajûkia thaabu yonthe, na fetha, na into bionthe birîa biaarî kîûrûûne kîa Mûrungu birîa biamenyagîîrwa nî Obediedomu, amwe na mîthithû ya gîkaro kîa mûnene na atae, areeta nabo Samaria.

²⁵Amazia, mûnene wa Juda aatûûrîre mîaka îkûmi na îtaano nyuma ya Joashi mûnene wa Israeli agûkua.

²⁶Mantû jau jangî ja waathani bwa Amazia, kuuma kîambîrîîria mwanka mûthia nî jaandîki ndeene ya Yuku rîa anene ba Juda na Israeli.

²⁷Kuuma rîrîa Amazia aatigîre kûrombaga MWATHANI, antû ba Jerusalemu nî baamûkunyanîîre, nawe aramatûka Lakishi, îndî baramûtûmîra antû baramûthingata nau Lakishi, baramûûragîra nao.

²⁸Rîu baracoka na kiimba kîaawe gîkamati nî mbarathi mwanka Jerusalemu, baramûthika ntûûreene ya Daudi kûrîa beethe baathiki.