Read KIMERU BIBLE PROTESTANT EDITION 2Ma 26 Bible Online

2Ma 26 - KIMERU BIBLE PROTESTANT EDITION bible

2Ma 26

¹Nabo antû bonthe ba Juda nî baajûkîrie Uzia, ûrîa waarî na ûkûrû bwa mîaka îkûmi na îtaantatû, na baramwethia mûnene îthe Amazia agûkua.

²Nî aakîre ntûûra ya Elothi na aramîcokia nthîgûrû ya Juda nyuma ya îthe agûkua.

³Uzia aarî na ûkûrû bwa mîaka îkûmi na îtaantatû rîrîa aambîrîîrie kwaathana. Aathanîre mîaka mîrongo îtaano na îîrî arî Jerusalemu. Ng'ina eetagwa Jekolia kuuma Jerusalemu.

⁴Uzia nî aathithîrie mantû jameega mbere ya MWATHANI ta ûrîa îthe Amazia aathithîtie mbere.

⁵Zekaria nîwe waamûtaaraga mantûûne ja kwathîkîra Mûrungu. Uzia nî eetîkîrîrie kûthingata Mûrungu îgiita rîonthe rîrîa Zekaria aarî mwoyo. Îgiita rîonthe rîrîa aathingataga MWATHANI, nî aathinyaaraga.

⁶Nî eetîre kwithûkîra Afilisti, na aramomoranga rûthingo rwa ntûûra ya Gathi na rwa ntûûra ya Jabune na rwa ntûûra ya Ashidodi. Ningî araaka ntûûra ciaawe rûteere rwa Ashidodi na nthîgûrû ya Afilisti.

⁷Mûrungu nî aamûteethîrie kûûmba ndweene Afilisti na Arabu barîa baatûûraga Gurubaali na antû ba Ameuni.

⁸Aamoni nabo nî baaritagîra Uzia ûgoti, na nkuma yaawe nî yaataambîte îgakinya mwankeene jwa Misri nîûntû bwa ûrîa aagîîte na inya.

⁹Ningî Uzia nî aakîre mînaara ya akaria Mpingîroone ya Gîkumbo, na Mpingîroone ya Mûguuru na Kîthioroone kûu ntûûreene ya Jerusalemu, na arairikia.

¹⁰Ningî nî aakîre mînaara ya akaria bûûrîîne na areenja ithima bibingî nîûntû nî aarî na ng'ondu inyiingî kûu Shefela na mûgwanthîîne. Nî aarî na ariti ngûgî ba miuunda na ba mîzabibû irîmeene kûrîa kwaarî gûkûnoru nîûntû nî eendeete ngûgî ya ûrîmi.

¹¹Ningî Uzia nî aarî na njûûrî ya nchamba cia ndwaa, na yagaanîtue ikundi-ikundi kûringana na ûtari bûrîa bwonanîtue yukuune nî Jeieli mwandîki, na Maaseia, bagîtaaragwa nî Hanania, ûmwe wa atongeeria ba njûûrî ba mûnene.

¹²Nchamba cia ndwaa irîa ciatongagîîria njûûrî cia ndwaa irîa ciataari kuuma o mwîrîga o mwîrîga ciaarî ngiri ijîîrî cia magana jatantatû (2,600).

¹³Nabo baatongeeretie njûûrî ya antû ngiri magana jathatû ja mûgwanja na magana jataano (307,500), barîa barîngîûmba kûrwaa na inya mono na bagateethia mûnene kîrî anthû.

¹⁴Uzia arathuranîra njûûrî yonthe na aramînenkera mathaga ja ndwaa tajo rong'o na matumo, na nkoobia cia chuuma, na nguû cia chuuma, na moota na maiga ja kûgera na gîkûtha.

¹⁵Ningî ntûûreene ya Jerusalemu, atea baawe nî baamûthithîîrie ngaarî cia kûgera mîgwî na maiga jamanene, îreekwa mînaareene îgûrû, na ikumboone. Nkuma ya Uzia îrataamba nkûrûki nî ûrîa aathithagia mantû ja kûrigaria na aaragîa na inya mono.

¹⁶Îndî rîrîa aagîîre na inya mono, nî aambîrîîrie gwikumia, naju mwikumio jûramûthûûkia. Nî eeyîîrie MWATHANI Mûrungu waawe nîûntû bwa gwîta kîûrûûne kwîîthîria ubaani kîritîroone kîa igongwana.

¹⁷Îndî Azaria mûthînjîri-Mûrungu aramûthingata barî na athînjîri-Mûrungu bangî mîrongo înaana (80), antû nchamba.

¹⁸Nabo baragiria mûnene Uzia baramwîra, “Tî gwe Uzia ûbuîrîte kwîîthîria MWATHANI ubaani, îndî ngûgî îîu nî ya athînjîri-Mûrungu, na nchiarwa cia Aaroni, barîa baathûri kwîîthagia ubaani. Umagara kîûrûûne, nîûntû ûgwaatia na ûntû bûbû bûtîkûretera wega kuuma kîrî MWATHANI Mûrungu.”

¹⁹Uzia nî aagwete karaî ga kwîîthîria ubaani. Arathûûra, nîûntû bwa athînjîri-Mûrungu bau, nawe aragwatwa nî mûtigiri ûthiû bwaawe arî o au mbere ya athînjîri-Mûrungu na mbere ya kîritîro kîa igongwana gîa kwîîthîria ubaani ndeene ya kîûrû kîa MWATHANI.

²⁰Rîrîa Azaria, mûthînjîri-Mûrungu ûrîa mûnene na athînjîri-Mûrungu bangî boonîre atî Ûzia aakûgwatwa nî mûtigiri ûthiû, baramûmagaria oome na mpwîî, na kînya we araumagara na mpwîî nîûntû nî MWATHANI Mûrungu Mweneinya waamûkanûkîtie.

²¹Mûnene Uzia aratûûra arî na mûtigiri mwanka ntukû îrîa aakuîre. Tontû bwa kwîthîrwa nî aarî na mûtigiri, aakaraga nyomba yaawe wenka nîûntû atîngîgûkarania na antû kîûrûûne kîa MWATHANI. Jothamu mûtaana waawe nîwe waamenyagîîra nja ya mûnene na kwatha antû ba Juda.

²²Mantû jangî jarîa Uzia aathithîrie, kuuma bwa mbere mwanka bwa mûthia nî jaandîki nî Isaya kîroria, mûtaana wa Amozi.

²³ Uzia nî aakuîre na arathikwa kîeniine kîa anene, îndî tî mbîrîreene cia anene, nîûntû nî aarî na mûrimo jwa mûtigiri. Jothamu mûtaana waawe nîwe waaere mûnene îthe agûkua.