Read KIMERU BIBLE PROTESTANT EDITION 2Ma 28 Bible Online

2Ma 28 - KIMERU BIBLE PROTESTANT EDITION bible

2Ma 28

¹Ahazi aambîrîîrie kwaathana arî na ûkûrû bwa mîaka mîrongo îîrî, na araathana mîaka mîrongo îtaantatû arî Jerusalemu. Îndî we ataathîkagîra MWATHANI ja ûrîa Daudi athithagia.

²Îndî aathingatîre mathithio ja anene ba Israeli, na kinya arathithia mîng'uanano ya Baali.

³Ningî nî aaîthagîîria ubaani kîguuruune kîa Hinomu, na akarita aana baawe barî igongwana bia gwaakîîria athingatîte wîîthîre bwa antû barîa MWATHANI eengîre nthîgûrûûne îîu rîrîa antû ba Israeli baakinyîre kuuma Misri.

⁴Ningî Ahazi nî aaritaga igongwana na akaîîthia ubaani iromberoone bia Baali bionthe, na irîmeene, na ruungu rwa mîtî îrîa îriibîte.

⁵ Tontû bûû, MWATHANI nî aatûmîre Ahazi oombwa ndweene nî mûnene wa Sîria. Nî aataîre antû ba Ahazi babaingî mono na arabaikia Damaski. Ningî MWATHANI nî aatûmîre Ahazi oombwa nî Peka, mûtaana wa Remalia, mûnene wa Israeli, ûrîa wooragîre antû babaingî mono.

⁶Ooragîre nchamba cia ndwaa ngiri îgana rîa mîrongo îîrî (120,000) cia Juda ntukû îmwe, nîûntû nî baarî ba kwîrûkîra MWATHANI, Mûrungu wa biûjûjû biaao.

⁷Zikiri, nchamba ya ndwaa ya mwîrîga jwa Efuraimu, nî ooragîre Maaseia, mûtaana wa mûnene, na arooraga Azirikamu, ûrîa waarî mûrûngamîîri wa gîkaro kîa mûnene, na arooraga Elikana, ûrîa waarî mûnini wa mûnene.

⁸Aisraeli nî baagwatîre antû ngiri magana jaîrî (200,000) ba ndûgû ciaao cia Juda: aka na nthaka na aarî. Ningî barataa into bibingî mono, bareeta nabio Samaria.

⁹Îndî nî kwaarî na kîroria kîa MWATHANI gîeetagwa Odedi. Nî eetîre kûthagaana njûûrî îcokeete Samaria na aramîîra, “MWATHANI, Mûrungu wa biûjûjû bieenu aratûmîre bûûmba Juda nîûntû nî arathûûri nîbo. Îndî nî aigîîtue ûrîa bûbooragîte bûtî na kîaao.

¹⁰Rîu bûrîenda kweethia antû ba Juda na Jerusalemu, arûme na aka, nkombo cieenu. Uga kinya buî bûtî na meeyia mbere ya MWATHANI Mûrungu weenu?

¹¹Nandî thikîîreeni ûrîa nkûbwîra, na bûcokie antû bau bûgweete kuuma ndûgûûne cieenu nîûntû nî bûthûûrîîtie MWATHANI mono.”

¹²Nabo atongeeria bamwe ba Israeli kuuma mwîrîgeene jwa Efuraimu tabo Azaria, mûtaana wa Johanani, na Berekia, mûtaana wa Meshilemothi, na Jehizikia, mûtaana wa Shalumu, na Amasa, mûtaana wa Hadilai, nî baateterie barîa baaumîte ndweene.

¹³Barabeera atîrî, “Menyeni bûreeta atae bau gûkû tûtîkeeje kûthûûria MWATHANI. Meeyia jeetû nî jamanene mono na gûtî na gîtûmi gîa kûjoongeera nîûntû Israeli nî îthirîtie kûthûûria MWATHANI.”

¹⁴Tontû bûû, antû ba njûûrî ya Israeli bararekeeria barîa baataîte amwe na into birîa bataîte mbere ya atongeeria na kîrîndî.

¹⁵Nabo atongeria bau bana barîa mariîtwa jaao jagweti, barajûkia atae barîa baarî kîthûnû, barabaa nguû cia gwîkîra kuuma intoone birîa biatai. Ningî barabeekîra iraatû, na barabaa irio na biakûnyua, na baraaka ironda maguta. Barathuutia barîa bonthe bataarî na inya ntigiriine na barabaringîîria mwanka Jeriko, ntûûra ya mîkîndû, gwa antû baao. Rîu baracoka Samaria.

¹⁶Îgiita rîu mûnene Ahazi nî aatûmanîîre anene ba Asîria nîkenda beeta kûmûteethia

¹⁷Nîkwîthîrwa antû ba Edomu nî baarî bakwithûkîra Juda na bataa antû bamwe.

¹⁸Afilisti nabo nî baaithûkagîra ntûûra cia mûgwanthî na bûûrî ya Juda. Nî baarî bagûtaa Bethishemeshi na Aijaloni na Gederothi na Soko na Timuna na Gimuzo, na tûtûûra tûrîa twaithiûrûkîrîte.

¹⁹MWATHANI aakanûkagia nthîgûrû ya Juda tontû bwa ûrîa Ahazi, mûnene wa Juda, aathithagia mantû jamaaî na ataamwathîkagîra.

²⁰Tigilathi Pileseri mûnene wa Asîria aramwoongeera thîîna antû a kûmûteethia.

²¹Ahazi arajûkia into bia goro kuuma kîûrûûne kîa MWATHANI, na gîkaro kîa mûnene na kuuma kîrî athani baawe araikîria mûnene wa Asîria îndî kinya bûu bûtaamûteethia.

²²Îgiita rîa mîthangîko yaawe, mûnene Ahazi nî eetîre na mbere kwîîyîria MWATHANI nkûrûki.

²³Aratua kûritagîra mîrungu ya antû ba Sîria barîa baamûûmbîre ndweene igongwana akiugaga, “Tontû mîrungu ya antû ba Sîria nî yabateetherie, nkamîritîra igongwana nîkenda înteethia kinya ni.” Îndî ûntû bûû bûrareeta thîîna kîrî we na kîrî Israeli yonthe.

²⁴Ningî Ahazi nî oothûranîrie into bia kîûrû kîa Mûrungu arabithûûkangia na arainga mîrango ya kîûrû kîa MWATHANI. Aracoka araaka iritîro biaawe bia igongwana nteere cionthe cia Jerusalemu.

²⁵Nî aakîre irombero bia kûritagîra mîrungu ya mîng'uanano igongwana bia ubaani ntûûreene cionthe cia Juda. Ûntû bûû bûrathûûria MWATHANI, Mûrungu wa biûjûjû biaao mono.

²⁶Najo mathithio jangî ja waathani bwa Ahazi, kuuma kîambîrîîria mwanka mûthia, nî jaandîki yukuune rîa anene ba Juda na Israeli.

²⁷ Ahazi nî aakuîre, na arathikwa ntûûra ya Jerusalemu, îndî ataathikîrwe mbîrîreene cia anene ba Israeli. Mûtaana waawe, Hezekia, araa mûnene.