Read KIMERU BIBLE PROTESTANT EDITION 2Ma 29 Bible Online

2Ma 29 - KIMERU BIBLE PROTESTANT EDITION bible

2Ma 29

¹Hezekia aambîrîîrie kwaathana arî na ûkûrû bwa mîaka mîrongo îîrî na îtaano, na araathana mîaka mîrongo îîrî na kenda. Ng'ina eetagwa Abija, na aarî mwarî wa Zekaria.

²Hezekia nî aathîkagîra MWATHANI o ta ûrîa Daudi aathithagia.

³Mweriine jwa mbere jwa mwaka jwa mbere kuuma akwambîrîria kwaathana, Hezekia nî aarugûrîre mîrango ya kîûrû kîa MWATHANI na aramîthithia kûrîa yathûûkangi.

⁴Ningî areeta athînjîri-Mûrungu na Alawi, baroothûrana kîaragoone kîa rûteere rwa gaiti rwa kîûrû.

⁵Arabeera ûjû, “Thikîîreeni buî Alawi! Itherieni nandî na bûtherie kîûrû kîa MWATHANI, Mûrungu wa biûjûjû bieenu bweebeerie kîrîa kîonthe gîîkîrîte kîûrû kîa MWATHANI mûgiro.

⁶Biûjûjû bieetû nî bieeyîrie, biaathithia mantû jatîagîrîte mbere ya MWATHANI na biamwîrûkîra. Nî biaatiganîrie gîkaro kîa MWATHANI na biamuutatîra.

⁷Nî biaaingîre mîrango ya kîûrû, na booria taawa, na biaatiga kwîîthagia ubaani na kûritagîra igongwana bia gwakîîria kîûrûûne kîa Mûrungu wa Israeli.

⁸Tontû bûû, MWATHANI nî athûûri mono nî Juda na Jerusalemu, na abathithîria mantû ja kûmakania na kûrigaria na kûmenagîîrua nî antû bonthe o ta ûrîa bûthîrîtie gûcionera.

⁹Nîkîo gîtûmîte ba-baaba bathirîrua ndweene, nacio nthaka na aarî na aka beetû batawa baikua kîthamîrioone.

¹⁰“Nandî ndîenda kûthithia kîrîkanîro na MWATHANI, Mûrungu wa Israeli nîkenda atiga kûthûûra nî tuî.

¹¹Nandî aana baakwa, bûgateeni îgiita, nîûntû nî buî bûthuuri nî MWATHANI bûtongagîîria antû kûmûthaathayia, na bûmûtumîkagîra na bûmwîîthagîria ubaani.”

¹²Nabo Alawi baraithuranîra ta ûjû: barîa baumîte mwîrîgeene jwa Kohathi baarî Mahathi, mûtaana wa Amasai na Joeli, mûtaana wa Azaria. Kuuma mwîrîga jwa Merari baarî Kishi, mûtaana wa Abudi na Azaria, mûtaana wa Jehaleleli. Kuuma mwîrîga jwa Gereshoni baarî Joaha, mûtaana wa Zima na Edeni, mûtaana wa Joaha.

¹³Kuuma mûciî jwa Elizafani, kwaarî na Shimuri na Jeieli. Ningî kuuma mûciî jwa Asafu, nî kwaarî na Zekaria na Matania.

¹⁴Kûuma mûciî jwa Hemani, nî kwaarî na Jehueli na Shimei, na kuuma mûciî jwa Jeduthuni, nî kwaarî na Shemaia na Uzieli.

¹⁵Nabo nî boothûranîrie Alawi bangî na baraitheria, baracoka bareeta kûtheria kîûrû kîa MWATHANI ûrîa mûnene aabeerîte, kûringana na Waatho bwa MWATHANI.

¹⁶Barakûrûka kîûrûûne nîkenda bakîtheria. Baraumagaria into bionthe birîa bitaarî bibitheru barabiîka kîaragoone. Nabo Alawi barabijûkia barabikamata barabiikia mûuro jwa Kidironi.

¹⁷Baambîrîîrie ngûgî îîu ya kûtheria kîûrû ntukû ya mbere ya mweri jwa mbere, na barakinya mwariine jwa kîûrû ntukû ya inyanya. Barajûkia ntukû ingî inyanya kûtheria kîûrû. Ntukû ya îkûmi na ithanthatû ya mweri jwa mbere, nî baarî bakûthiria ngûgî iu cionthe.

¹⁸Rîu baracoka kîrî mûnene Hezekia baramwîra atîrî, “Tûkûthiria ngûgî ya kûtheria kîûrû kîa MWATHANI kîonthe amwe na kîritîro kîa igongwana bia gwakîîria na into biaakîo bionthe, na meetha ya kûrîkîîra mîgaate îrîa mîtharime na into biaayo bionthe.

¹⁹Ningî nî tûtheretie na twathuranîra into bionthe birîa mûnene Ahazi aaritîte kîûrûûne rîrîa aarî akwîrûkîra MWATHANI. Nandî birî mbere ya kîritîro kîa igongwana kîa MWATHANI.”

²⁰Rûûneene rûkîîrî mûnene Hezekia nî oothûranîrie atongeeria ba ntûûra bareeta kîûrûûne kîa MWATHANI.

²¹Baraikia ndeegwa mûgwanja na ntûrûme mûgwanja na tûtûrûme mûgwanja na nthenge mûgwanja irî igongwana bia kûthiria meeyia ja waathani bwa Juda, na bia kîûrû na bia antû ba Juda. Mûnene areera athînjîri-Mûrungu, bau ba rûrîîjo rwa Aaroni, barite igongwana biu kîritîroone kîa igongwana kîa MWATHANI.

²²Nabo barathînja ndeegwa iu, na baraminyaminyîria kîritîro kîa igongwana tharike yaacio. Baracoka barathînja ntûrûme na baraminyaminyîria kîritîro kîa igongwana tharike yaacio. Ningî barathînja tûtûrûme na baraminyaminyîria kîritîro kîa igongwana tharike yaatu.

²³Rîu baraikia nthenge irîa cia kîgongwana kîa kûthiria meeyia ja kîrîndî iraumagarua kîrî mûnene na antû barîa boothûranîîte, nabo bararîkîîra njara ciaao kîrî cio.

²⁴Athînjîri-Mûrungu barathînja nthenge iu na baraminyaminyîria kîritîro kîa igongwana tharike yaacio îrî kîgongwana nîûntû bwa kûthiria meeyia ja Aisraeli bonthe. Tontû mûnene nî aarî akuuga kûritwe igongwana bia gwakîîria na bia kûthiria meeyia nîûntû bwa antû bonthe ba Israeli.

²⁵Hezekia areeka Alawi kîûrûûne barî na thaani cia kûringithania na inanda na wandîîndî ta ûrîa Gadi, kîroria kîa mûnene Daudi, na kîroria Nathani baugîîte. Yaathana rîu rîaeejani nî MWATHANI na njîra ya iroria.

²⁶Alawi bararûngama bagwete into bia kwina ja birîa bia Daudi, nabo athînjîri-Mûrungu barî na tarumbeta.

²⁷Nawe Hezekia arauga kûritwe kîgongwana gîa gwakîîria. Gîkîambîrîria gwakîîrua, rwîmbo rwa MWATHANI naru rûraambîrîria, nacio tarumbeta îraringwa na kinya into bia kwina birîa biathithîrue nî Daudi, mûnene wa Israeli.

²⁸Antû bonthe barîa boothûranîte nî baambîrîîrie kûthaathayia MWATHANI. Aini nî beetîre na mbere kwina tarumbeta îkîringagwa. Bareeta na mbere kûthithia ûu mwanka rîrîa kîgongwana kîathirîrie kûritwa.

²⁹Rîrîa baathirîrie kûrita igongwana, mûnene amwe na antû barîa baarî o bonthe nî baatûrîrie maru barathaathayia Mûrungu.

³⁰Mûnene Hezekia na atongeeria baawe bareera Alawi bakumie MWATHANI na rwîmbo rûrîa rwa Daudi na kîroria Asafu. Tontû bûû, barakumia MWATHANI bagwîrîtue mono, na baraturia maru, bareenamîîria na barathaathayia Mûrungu.

³¹Nawe Hezekia arauga, “Nandî bûkûthiria kwitheria mbere ya MWATHANI. Rîu îjeeni bûreete igongwana na igongwana bia gûcokia nkaatho kîûrûûne kîa MWATHANI.” Tontû bûû, kîrîndî kîraikia igongwana na igongwana bia gûcokia nkaatho na barîa baaciendagîra na nkoro ciaao baraikia igongwana bia gwakîîria.

³²Igongwana bia gwakîîria birîa biaritîîrwe MWATHANI biaarî ndeegwa mîrongo mûgwanja (70), na ntûrûme îgana rîmwe (100) na tûtûrûme magana jaîrî (200).

³³Nacîo nyamû cionthe irîa ciaeejani nîûntû bwa igongwana ciaarî ndeegwa magana jataantatu (600) na ng'ondu ngiri ithatû (3,000).

³⁴Îndî athînjîri-Mûrungu barîa baarî o batîngî kûng'ana ba kûthînja nyamû iu cionthe. Tontû bûû, Alawi baracieejana gûteethereria athînjîri-Mûrungu mwanka barathiria ngûgî îîu. Bareeta na mbere kûthithia ûu mwanka rîrîa athînjîri-Mûrungu bangî baathûûrîrwe. Alawi nî baarî barî na wîru bwa kwitheria nkûrûki ya athînjîri-Mûrungu.

³⁵Amwe na igongwana biu bibingî bia gwakîîria, nî kwaarî na maguta jarîa jaakagîîrua jarî kîgongwana kîa thîîrî, na kinya igongwana bia ndibei birîa biaritagwa amwe na igongwana bia gwakîîria. Ûu nîu ngûgî ya kîûrû yaambîrîrie kaîrî.

³⁶Hezekia na antû bonthe nî baagwîrîrue mono nîûntû bwa ûrîa Mûrungu aathithîrîtie antû, nîûntû nî athithîtie ûntû bûû na mpwîî mono.