Read KIMERU BIBLE PROTESTANT EDITION 2Ma 3 Bible Online

2Ma 3 - KIMERU BIBLE PROTESTANT EDITION bible

2Ma 3

¹ Solomoni nî aambîrîrie gwaka kîûrû kîa MWATHANI kûu Jerusalemu kîrîmeene kîa Moria arîa MWATHANI aaumîrîte ithe Daudi. Aragiaka îtîriine rîa Orinani, ûrîa Mûjebusi, antû arîa îthe Daudi oonanîtie.

²Solomoni ambîrîrie gwaka kîûrû ntukû ya ijîîrî ya mweri jwa îîrî, mwakeene jwa îna kuuma akwambîrîria kwaathana.

³Kîûrû kîrîa Solomoni aakaga kîaarî kîa ûraaja bwa mita mîrongo ithatû (30m) na waariî bwa mita îkûmi (10m).

⁴Mwari jûrîa jwaarî bwa mbere ya kîûrû jwaarî jwa mita îkûmi (10m) jûjûkîtie wariî bwa nyomba bunthe, na mita mîrongo îtantatû (60m) gwitia bwa îgûrû. Arajwereeria bwa ndeene na thaabu îrîa nthongi.

⁵Nacio nthingo cia nyomba irîa nene ya kîûrû araikunîka na mîtî ya mîtarakwa bwa ndeene na thaabu îrîa ntheru, na araigemia na mbicha cia mîkîndû na mînyororo.

⁶Ningî kîûrû kîu nî aakîgemetie na maiga ja goro, nayo thaabu yaarî ya kuuma Paravaimu.

⁷Arakîgemia kîonthe na thaabu: mîrathoone na mîrangoone nthî na îgûrû na nthingoone. Ningî araaja mbicha cia kerubimu nthingoone.

⁸ Arathithia antû arîa atheru buru. Nabu ûraaja bwa antû au bwaarî mita îkûmi (10m), bûng'aneene na wariî bûrîa bwaarî bwa mita îkûmi (10m). Arereeria antû au na thaabu îrîa nthongi ya tani mîrongo îîrî na îmwe.

⁹Mîchumaarî îrîa yaatûmîîrwe yaathithîtue na thaabu ya ûrito bwa nusu kilo. Ningî arereeria nthingo cia tûnyomba twa îgûrû na thaabu.

¹⁰ Arathithia mîng'uanano îîrî ya Kerubi na aramîereeria na thaabu. Aramîka antû arîa atheru buru.

¹¹Mathagu ja Kerubi cio-ijîîrî jaarî na ûraaja bwa mita îkûmi (10m). Îthagu rîmwe rîaarî rîa ûraaja bwa mita ijîîrî na nusu (2.5m). Îthagu rîmwe rîa kerubi ya mbere rîaringithîtie rûthingo rwa kîûrû. Îthagu rîu rîngî rîaringithîtie mûthia jwa îthagu rîa Kerubi îîu îngî.

¹²Îthagu rîmwe rîa kerubi ya ijîîrî rîaarî rîa ûraaja bwa mita ijîîrî na nusu (2.5m). Narîo rîaringithîtie rûthingo rûngî rwa kîûrû. Îthagu rîu rîngî kinya rîo rîaarî rîa ûraaja bwa mita ijîîrî na nusu (2.5m). Narîo rîaringithîtie mûthia jwa îthagu rîa kerubi ya mbere.

¹³Mathagu ja kerubi îîu jaambaarîte antû a mita îkûmi (10m). Ciakinyîte nthî na magûrû jacio, cierekerete bwa ndeene ya kîûrû.

¹⁴ Ningî aratuma gîtambaa gîa kûgaania kîûrû na antû arîa atheru kîa nguû înthongi aragîaka rangi ya wiirû bwa îgûrû na întuune, na arakîgemia na mbicha cia kerubi.

¹⁵Aarathithia itugî biîrî mbere ya kîûrû bia ûraaja bwa mita îkûmi na mûgwanja na nusu (17.5m). Nabio biongo biaabio biaarî bia mita ijîîrî na nusu (2.5m).

¹⁶Ningî arathithia mîtungo îkarî ja mîkathî aramîcuuria itugîîne îgûrû na aracuuria mîng'uanano ya matuunda ja kûûmba na îturutia jakari ta mîkukumanga mîtungoone îîu.

¹⁷Itugî biu nabio abiîkîte mbere ya kîûrû, kîmwe kîrî rûteere rwa ûmotho na kîngî rûteere rwa ûrîo. Kîrîa kîaarî rûteere rwa ûmotho aragîîta Jakini[1] nakîo kîrîa kîaarî rûteere rwa ûrîo aragîîta Boazi.[2]