Read KIMERU BIBLE PROTESTANT EDITION 2Ma 30 Bible Online

2Ma 30 - KIMERU BIBLE PROTESTANT EDITION bible

2Ma 30

¹Hezekia nî aatûmanîre kîrî antû bonthe ba Israeli na Juda, na araandîkîra mîîrîga ya Efuraimu na Manase barûga, akîbeetaga beeta kîûrûûne Jerusalemu nîkenda bathithia mambura ja Pasaka ya MWATHANI, Mûrungu wa Israeli.

² Mûnene na atongeeria baawe, na kîrîndî kîonthe kîa Jerusalemu baatuîte atî bakathithia mambura ja Pasaka mweriine jwa îîrî.

³Batoombîre gûkûngwîra mambura jau ta wîthîre nîûntû athînjîri-Mûrungu baarî babakai na antû bataarî bakûûthûrana Jerusalemu.

⁴Mûbango jûu jûrooneka jûrî jûmwega kîrî mûnene na kîrîndî kîonthe.

⁵Baratua atî batûmane nthîgûrû ya Israeli yonthe kuuma Beerisheba mwanka Dani, bagîîtaga antû bonthe Jerusalemu mambureene ja Pasaka ya MWATHANI, Mûrungu wa Israeli, nîûntû bateerîgîîte kûthithia ûu ta ûrîa kwaandîkîtwe îgiita rîrîraaja.

⁶Nabo barîa baikagia barûga nî beetîre nthîgûrû ya Israeli na Juda yonthe kûringana na waatho bwa mûnene barî na barûga ciaandîki nî mûnene na atongeeria baawe ikuuga: “Atîrî antû ba Israeli, cokeeni kîrî MWATHANI, Mûrungu wa Abrahamu na Isaaka na Israeli, nîkenda nawe abûcokeera buî barîa bûtigeere nyuma ya kwithûkîrwa nî anene ba Asîria.

⁷Bûkáthithia ja biûjûjû bieenu na antû ba ndûgû cieenu, barîa baaregîre kwathîkîra MWATHANI Mûrungu wa biûjûjû biaao, nawe MWATHANI arabakanûkia mono ja ûrîa bûkwoona.

⁸Tigeeni kûûmia biongo ja ûrîa biûjûjû bieenu biaathithîrie. Inyiyieni kîrî MWATHANI, bwîte kîûrûûne kîaawe kîrîa aathûrîre mwanka kenya, bûtumîkagîre MWATHANI, Mûrungu weenu nîkenda marûrû jarîa arî najo nîûntû bweenu jathira.

⁹Bwacoka kîrî MWATHANI, antû barîa baikîrie antû ba ndûgû cieenu na aana beenu kîthamîrio bakabaigîîrua kîaao babarekeerie bacoke nthîgûrû îîjî. Tontû MWATHANI, Mûrungu weenu nî ûmwega na wa kîaao, na atîrega kûbwigîîrua kîaao bwamûcokeera.”

¹⁰Barîa baatûmi bareetania na ntûûra cionthe cia Efuraimu na Manase, mwanka Zebuloni. Nabo antû barabathekera na kûbacikûûra.

¹¹Îndî antû babakai kuuma mîîrîga ya Asheri na Manase na Zebuloni nî bainyiîrie bareeta Jerusalemu.

¹²Mûrungu nî aarîngithîrie antû ba Juda, arabeekîra ngwatanîro baraathîkîra ûrîa mûnene na atongeeria baawe baugîîte kûringana na kiugo kîa MWATHANI.

¹³Kîrîndî gîkiingî mono nî kîoothûranîre Jerusalemu gûkûngwîra mambura ja mîgaate îtiimbithîtue.

¹⁴Nabo antû bau nî baatharîrie iritîro bia igongwana birîa biaki Jerusalemu, na barakamata iritîro bia igongwana bia kwîîthîria ubaani bareeta barabigera mûuro jwa Kidironi.

¹⁵Ntukû ya îkûmi na inya ya mweri jwa îîrî barathînja tûtûrûme twa kîgongwana gîa Pasaka. Nabo athînjîri-Mûrungu na Alawi barîa bataitheretie nî baaigîrue nthoni mono, bareeta baraitheria mbere ya MWATHANI na baraikia igongwana bia gwakîîria kîûrûûne.

¹⁶Nabo baraibanga ja wîîthîre, kûringana na Waatho bwa Musa, muntû wa Mûrungu. Alawi baanenkagîîria athînjîri-Mûrungu tharike nabo bakaminyaminyîria kîritîroone gîa igongwana.

¹⁷Antû babaingî ba barîa boothûranîte bataarî bakwitheria, nabo batîngîûmba kûthînja tûtûrûme twaao na batûrita kîrî MWATHANI. Tontû bûû, Alawi nîbo baabathînjîîre tûtûrûme twaao twa Pasaka na baratwathûrîra MWATHANI.

¹⁸Antû babaingî ba barîa baaumîîte Efuraimu na Manase, na Isakari na Zebuloni bataitheretie, îndî nî baarîîre Pasaka kinya këethîra tîu Waatho bwaugîte. Îndî Hezekia nî aabarombeere akiugaga, “Gwe MWATHANI ûmweega, rekera muntû wonthe

¹⁹ûrîa wiithuranîrîte nkoroone nîkenda eeta kîrî MWATHANI, Mûrungu wa biûjûjû biaao, kinya këethîra atiitheretie kûringana na Waatho.”

²⁰MWATHANI nî aaigîrue îromba rîa Hezekia, na ararekeera kîrîndî atîgîkanûkie.

²¹Antû ba Israeli barîa baarî Jerusalemu nî baakûngwîre mambura ja mûgaate jûtiimbithîtue ntukû mûgwanja bagwîrîtue mono. Nabo Alawi na athînjîri-Mûrungu nî bakumagia MWATHANI ntûkû cionthe bakîmwinagîra na into bia kwina.

²²Hezekia nî aakaathîrîîrie Alawi mono nîûntû nî boombîre gûtongeeria mambura ja MWATHANI na njîra înthongi mono. Antû nî baarîre bagîkûngwagîra kîatho kîu ntûkû mûgwanja bakîritaga igongwana bia thîîrî na bagîkumagia MWATHANI, Mûrungu wa biûjûjû biaao.

²³Nakîo kîrîndî kîonthe nî kîarîîkanîrie atî mambura jeete na mbere ntukû ingî mûgwanja. Tontû bûû, barathithia mambura ntukû ingî mûgwanja bagwîrîtue mono.

²⁴Hezekia mûnene wa Juda nî aeejanîre ndeegwa ngiri îmwe (1,000) na ng'ondu ngiri mûgwanja (7,000), nabo atongeeria nî baeejanîre ndeegwa ngiri îmwe (1,000) na ng'ondu ngiri ikûmi (10,000). Nabo athînjîri-Mûrungu babaingî nî baarî bakwitheria.

²⁵Antû bonthe barîa boothûranîte mambureene jau nî baagwîrîrue mono: ba Juda na barîa baaumîte Israeli, na athînjîri-Mûrungu na Alawi na kinya antû barîa bataarî Aisraeli barîa baatûûraga nthîgûrû ya Israeli na ya Juda.

²⁶Nî kwagîîre na gîkeno gîkînene mono kûu Jerusalemu, nîûntû gûtoonekeete ûntû ja bûu Jerusalemu kuuma matukûûne ja mûnene Solomoni, mûtaana wa Daudi.

²⁷Rîu athînjîri-Mûrungu na Alawi bararûûngama na baratharima kîrîndî. MWATHANI araigua maromba jaao arî gîkaroone kîaawe gîkîtheru kûu îgûrû.