Read KIMERU BIBLE PROTESTANT EDITION 2Ma 33 Bible Online

2Ma 33 - KIMERU BIBLE PROTESTANT EDITION bible

2Ma 33

¹Manase aambîrîîrie kwaathana arî na ûkûrû bwa mîaka îkûmi na îîrî. Aathanîre mîaka mîrongo îtaano na îtaano arî Jerusalemu.

² Nî aathithîrie mantû jarîa MWATHANI ateendaga, akîthingatagia mîkarîre îmîthûûku ya mîgongo îrîa MWATHANI eengîre rîrîa Aisraeli baatonyaga ku.

³Araaka irombero birîa îthe Hezekia aarî akûmomoranga, araaka iritîro bia igongwana bia Baali na itugi bia Ashera na aratua kûthaathagia njota.

⁴ Arathithia iritîro bia kîgongwana kîûrûûne o kûrîa MWATHANI augîîte, “Riîtwa rîaakwa rîgatûûra Jerusalemu kenya na kenya.”

⁵Manase araaka iritîro bia igongwana nîûntû bwa kûthaathagia njota na biûmbe bionthe bia îgûrû biaragoone bio-biîrî bia kîûrû kîa MWATHANI.

⁶Nî aaritîre aana baawe barî igongwana bia gwakîîria Mûuro jwa Beni Hinomu. Ningî nî aaragia na akuû na kûringia na gûtumîra agaa na arogi. Ningî nî aathithîrie mantû jamaingî jamaaî jarîa MWATHANI ateendaga na tontû bûû, Manase aramûthûûria.

⁷ Nî eekîre mûrungu jwa mûng'uanano jwa kwithithîria ndeene ya kîûrû kîa Mûrungu o kûrîa Mûrungu eerîîrîte Daudi na mûtaana waawe Solomoni atî, “Ngatûûria riîtwa rîaakwa kenya na kenya kîûrûûne gîkî kîa Jerusalemu, ntûûra îrîa ndiithuurîrîte gatîgatî ka mîîrîga yonthe ya Israeli.

⁸Ntîkarîreka kaîrî Aisraeli baritwa nthî îrîa ndagaîîre biûjûjû biaao këethîra bunka bageetîkîra kûthithia mantû jonthe jarîa ndabeerîre ja mawaatho, na mauuge, na mantû ja mîtûûrîre jarîa jaeejanîrwe nî Musa.”

⁹Îndî Manase aratûma Juda na atûûri ba Jerusalemu bathithia mantû jamathûûku kinya nkûrûki ya jarîa jaathithagua nî mîgongo îrîa MWATHANI eengîre nîûntû bwa Israeli.

¹⁰MWATHANI nî aarîîrie Manase na antû baawe, îndî batîmûthikîîre.

¹¹MWATHANI ararekeeria atongeeria ba njûûrî ya Asîria babaithûkîra. Baragwata Manase, baramûtheeka na mînyororo na baramwîkîra mîkang'i ya îturutia, baramwikia Babiloni.

¹²Rîrîa aathangîkîre mono arairira kîrî MWATHANI, Mûrungu waawe, na arainyiiyia mono mbere ya Mûrungu wa biûjûjû biaawe.

¹³Araromba Mûrungu, na Mûrungu aramwigîîrua kîaao, araigua maromba jaawe, na aramucokia Jerusalemu ûneneene bwaawe. Rîu nîrîo Manase eetîkîrie atî MWATHANI nîwe Mûrungu.

¹⁴Nyuma ya mantû jau, Manase nî aakîre kaîrî rûthingo rwa bwa oome ya Ntûûra ya Daudi rûteere rwa rûgûrû rwa karûûjî ka Gihoni mûguuruune, gwîta mwanka mpingîro ya Makûyû na kûthiûrûka karîma ga Ofeli. Areeka atongeeria ba njûûrî baathanaga ntûûreene cia Juda cionthe indikie.

¹⁵Ningî areberia mîrungu mîgeni na ya mûng'uanano kîûrûûne kîa MWATHANI, na kinya iritîro bia igongwana birîa bionthe aakîîte kîrîmeene gîa kîûrû kîa MWATHANI na Jerusalemu, arabita oome ya ntûûra.

¹⁶Aracoka araaka kaîrî kîritîro kîa igongwana kîa MWATHANI na araritîra igongwana o bia thîîrî na bia gûcokia nkaatho, na ararita Waatho arauga antû ba Juda batumîkagîre MWATHANI, Mûrungu wa Israeli.

¹⁷Antû nî beetîre na mbere kûritaga igongwana tûrîmeene îndî baaritagîra MWATHANI Mûrungu waao wenka.

¹⁸Mathithio jangî jonthe jarîa Manase aathithîrie, na îromba rîrîa aarombere Mûrungu waawe na nteto irîa eeragwa nî iroria bia MWATHANI, Mûrungu wa Israeli nî jaandîki jonthe ndeene ya Rûgono rwa Anene ba Israeli.

¹⁹Îromba rîa mûnene na macokio ja Mûrungu na meeyia jarîa aathithîtie mbere ya kwirira, na ûthûûku bwaawe, na kûrîa aakîîte irombero bia mîrungu mîgeni na aanda itugî bia Ashera na eeka mîng'uanano mbere ya kwirira, jonthe nî jaandîki yukuune rîa Mantû ja Iroria.[4]

²⁰Nawe Manase arakua, na arathikwa nja yaawe. Mûtaana waawe Amoni araa mûnene.

²¹Amoni aarî na ûkûrû bwa mîaka mîrongo îîrî na îîrî rîrîa aeere mûnene. Nawe aathanîre mîaka îîrî arî Jerusalemu.

²²Nî eeîîrie mbere ya MWATHANI o ja ûrîa îthe Manase aathithîrie. Nî aathaathayia na akaritîra igongwana mîng'uanano yonthe îrîa îthe Manase aathithîtie.

²³Ningî Amoni atainyiiyia mbere ya MWATHANI ta ûrîa îthe aathithîrie. Meeyia jaawe nîka jeetîre na mbere kwongeereka.

²⁴Amoni nî akunyanîîrwe nî nthûûmba ciaawe na iramûûragîra nyomba yaawe.

²⁵Îndî antû nabo barooraga barîa bonthe baakunyanîrîte mûnene Amoni na baraeethia mûtaana waawe Josia mûnene.