Read KIMERU BIBLE PROTESTANT EDITION 2Ma 34 Bible Online

2Ma 34 - KIMERU BIBLE PROTESTANT EDITION bible

2Ma 34

¹ Josia aarî na ûkûrû bwa mîaka înaana rîrîa aambîrîîrie kwaathana. Nawe aathanîre mîaka mîrongo îthatû na jûmwe arî Jerusalemu.

²Nî aathithagia mantû jarîa jaagwîragia MWATHANI, athingatîte ngerekano ya Daudi, na atîkuuna Waatho noo bûrîkû.

³Mwakeene jwa înaana kuuma akwambîrîria kwaathana, Josia arî o ûmûnini nîrîo aambîrîîrie kûthaathayia Mûrungu wa ûjûûwe Daudi. Mwakeene jwa îkûmi na îîrî nî aambîrîîrie kûmomoranga irombero bia mîrungu mîgeni na itugî bia Ashera na mîng'uanano ya kwaja na ya yûmba.

⁴ Nabio iritîro bia igongwana bia Baali biramomorangwa na Waatho bwaawe. Aramomoranga into birîa biaîthagîrua ubaani îgûrû rîa iritîro bia igongwana biu. Ningî araunanga itugî bia Ashera na mîng'uanano ya kwaja na ya yûmba; aramîthetheranga îraa tîîri aramînyagia îgûrû rîa mbîrîra cia antû barîa baamîritagîra igongwana.

⁵ Ningî araakîîria mîrûitû ya athînjîri-mîrungu ya mîng'uanano iritîroone bia igongwana biaao aratheria Juda na Jerusalemu.

⁶Nî aathithîrie ûu ntûûreene cia Manase na Efuraimu na Simioni gwîta mwanka Nafutali na bieniine birîa biacithiûrûkîrîte.

⁷Nî amomorangîre iritîro bia igongwana na itugî bia Ashera, na arathetheraga mîng'uanano îraa mûtu na aramomoranga iritîro bia igongwana bia kwîthîria ubaani bionthe birîa biaarî nthîgûrû ya Israeli. Nawe aracoka Jerusalemu.

⁸Mwakeene jwa îkûmi na înaana kuuma akwambîrîria kwaathana, nyuma ya kûtheria nthîgûrû na kîûrû kîa Mûrungu, Josia nî aatûmîre antû bathatû gwaka kîûrû kîa MWATHANI Mûrungu waawe kûrîa kîathûkangîtue. Nabo nî Shafani, mûtaana wa Azalia na Maaseia, mûrûngamîîri wa ntûûra na Joaha, mûtaana wa Joahazi, ûrîa waarî karani.

⁹Nabo bareeta kîrî Hilikia mûthînjîri-Mûrungu ûrîa mûnene, baranenkanîra mbeecha irîa ciariti nîûntû bwa kîûrû kîa Mûrungu, irîa ciothûranîtue nî Alawi barîa baakaragia mwari kuuma kîrî antû ba Manase na Efuraimu na kuuma kîrî Aisraeli bonthe barîa baatigeere na kuuma kîrî antû bonthe ba Juda na Benjamini na atûûri ba Jerusalemu.

¹⁰Nabo baranenkanîra mbeecha iu kîrî arûngamîîri ba ngûgî ya gwaka kîûrû kîa MWATHANI. Nabo arûngamîîri bau baranenkera ariti ngûgî barîa baathithagia kîûrû kûrîa kwathûkangi.

¹¹Ningî baranenkera abundi ba mbaaû na ba maiga nîkenda bagûra nacio maiga jamathambie na mbaaû cia gwaka nyomba îrîa anene ba Juda baarekeete îkamomokanga.

¹²Nabo antû bau nî baaritîre ngûgî îîu na wîru bûbûnene. Nabo baatongeeretue nî Jahathi na Obadia, Alawi ba nchiarwa cia Merari, na Zekaria na Meshulamu, nchiarwa cia Kohathi. Nabo Alawi bonthe barîa baarî na ûtea bwa kûringa into bia kwina,

¹³nîbo baarûngamagîîra akamati ba into na ariti ngûgî ba mîthemba mwanya mwanya. Alawi bangî nabo baarî tûrani na bangî aandîki na bangî akaria ba mpingîro.

¹⁴Rîrîa baumagaragia mbeecha irîa ciareeti kîûrûûne kîa MWATHANI, Hilikia, mûthînjîri-Mûrungu, nî oonîre Yuku rîa Waatho bwa MWATHANI rîrîa rîaejani na njîra ya Musa.

¹⁵Hilikia areera Shafani ûrîa waarî karani atîrî, “Nkwona Yuku rîa Waatho kîûrûûne kîa MWATHANI.” Nawe Hilikia aranenkera Shafani yuku rîu.

¹⁶Shafani araikîria mûnene yuku rîu na aramwîra atîrî, “Nthûûmba ciaaku nî ikûrita ngûgî cionthe irîa ûracieete.

¹⁷Nî baritîîte mbeecha cionthe irîa cieeki nyomba ya MWATHANI na bainenkanîra kîrî arûngamîîri na ariti ba ngûgî.”

¹⁸Ningî Shafani areera mûnene atîrî, “Mûthînjîri-Mûrungu Hilikia akûnenkera yuku.” Shafani arathomera mûnene rîo.

¹⁹Rîrîa mûnene aigîrue nteto cia Waatho aratambûranga nguû ciaawe.

²⁰Areera Hilikia na Ahikamu, mûtaana wa Shafani na Abidoni, mûtaana wa Mika na Shafani, ûrîa waarî karani na Asaia, nthûûmba ya mûnene ûjû:

²¹“Îteeni bûkarombe kîrîra kîrî MWATHANI nîûntû bwaakwa na antû barîa batigeere Israeli na Juda mantûûne jegiî nteto cia yuku rîrî. MWATHANI nî athûûri mono nî tuî nîûntû biûjûjû bieetû nî biaregîre kwaathîkîra kiugo kîa MWATHANI kana bathingata mantû jarîa jaandîki yukuune rîrî.”

²²Tontû bûu Hilikia amwe na barîa baatûmi nî mûnene, bareeta kîrî mûka-kîroria weetagwa Hulida ûrîa waatûûraga Jerusalemu ntûûra ya ijîîrî baramwîra mantû jarîa jaakarîkîte. Hulida aarî mwekûrû wa Shalumu. Shalumu aarî mûtaana wa Tokathi. Nawe Tokathi aarî mûtaana wa Hasira ûrîa waarî mûmenyeeri wa nguû cia rwambambio kîûrûûne.

²³Nawe arabeera bacoke kîrî mûnene bamwîre atîrî,

²⁴“MWATHANI Mûrungu wa Israeli ariuga ûjû: Nkaareetera nthîgûrû îîjî na antû baayo ûthûûku, mbagwatithie irumi bionthe birîa biaandîki yukuune rîu rîthirîtie kûthomerwa mûnene wa Juda.

²⁵Mûthûûro jwaakwa jûkabatûrîkîra na jûtîoreka nîûntû nî bambîrûkîrîte beeta kûîthîria mîrungu îngî ubaani nîkenda banthûûria na mathithio jaao.

²⁶Îndî îreni mûnene wa Juda, ûu ûbûtûmîte bwîîja kûromba kîrîra kîa MWATHANI ûjû, ‘MWATHANI Mûrungu wa Israeli ariuga ûjû bwegiî nteto iu wiigîîtue:

²⁷Tontû gwe nî wairirîre na wainyiiyia mbere ya Mûrungu rîrîa waigîrue mantû jarîa aarîîtie jegiî nthî îîjî na atûûri baayo; wainyiiyia mbere yaakwa na watambûranga nguû ciaaku ûkîrîraga mbere yaakwa, kinya ni nî mbigîîtue maromba jaaku.

²⁸Naani ngaakûa thîîrî mwanka rîrîa ûgaakua na ntîreka woona ûthûûku bunthe bûrîa nkaareetera nthîgûrû îîjî na atûûri baayo.’” Nabo baracoka kîrî mûnene, baramwîra nteto iu.

²⁹Rîu mûnene areeta akûrû bonthe ba Juda na Jerusalemu na baroothûrana.

³⁰Mûnene areeta kîûrûûne amwe na antû ba Juda bonthe na atûûri ba Jerusalemu na athînjîri-Mûrungu na Alawi na kîrîndî kîonthe, kuuma ûrîa mûnini mwanka ûrîa mûnene. Arabathomera nteto cionthe cia yuku rîa Waatho rîrîa rîonekeete kîûrûûne.

³¹Mûnene ararûngama antû arîa aathithîtue nîûntû bwa anene nawe areeka kîrîkanîro na MWATHANI arauga atî akaathîkagîra MWATHANI na akathingataga maathana jaawe na wîrane bwaawe na nkoro yaawe yonthe na mwoyo jwaawe junthe na atî akoojûragia jarîa jonthe jaandîki yukuune rîu rîa Waatho.

³²Aratûma antû ba Benjamini bonthe na atûûri ba Jerusalemu betîkîîria kwathîkîra kîrîkanîro kîu. Atûûri ba Jerusalemu baroojûria ûrîa kîrîkanîro kîa Mûrungu wa biûjûjû biaao kîaugaga.

³³Tontû bûû, Josia nî aaritîre mîng'uanano na moomaramari jonthe jarîa jaarî nthîgûrû ya antû ba Israeli, na aratûma antû bonthe barîa baatûûraga Israeli bacokeera MWATHANI Mûrungu waao. Rîrîa rîonthe aarî mwoyo, antû bataatiga kûthingata MWATHANI Mûrungu wa biujûjû biaao.