Read KIMERU BIBLE PROTESTANT EDITION 2Ma 35 Bible Online

2Ma 35 - KIMERU BIBLE PROTESTANT EDITION bible

2Ma 35

¹Josia nawe nî aathithîrie kîatho gîa Pasaka ya MWATHANI kûû Jerusalemu. Tûtûrûme twa Pasaka tûrathînjwa ntukû ya îkûmi na inya ya mweri jwa mbere.

²Josia aragaîra athînjîri-Mûrungu ngûgî cia kûritaga kîûrûûne na araboomîîria nîkenda bairitaga bwega.

³Ningî areera Alawi barîa baarî aritani ba Israeli yonthe na barîa baathûrîri MWATHANI atîrî, “Îkeeni îthandûkû rîrîa rîtheru kîûrûûne kîrîa Solomoni mûtaana wa Daudi mûnene wa Israeli aakîre. Tigeeni kûrîkamataga na ituro. Ambîîrieni gûtumîkîra MWATHANI Mûrungu weenu na antû baawe ba Israeli.

⁴ Ithuranîreni gûtumîka kûringana na ikundi bia mîîrîga yeenu ta ûrîa Daudi mûnene wa Israeli na mûtaana waawe Solomoni baandîkîre.

⁵Ningî bwîte bûrûngame antû arîa atheru bwibangîte ûrîa o gîkundi gîkoomba gûteetheeria o nja îmwe ya antû ba Israeli.

⁶Rîu itherieni na bûthînjîre antû beenu tûtûrûme twa Pasaka nîkenda boojûria uuge bwa MWATHANI bûrîa baaerwe nî Musa.”

⁷Nawe Josia nî aaere antû tûtûrûme na tûbûri ngiri mîrongo îthatû (30,000) na ndeegwa ngiri ithatû cia igongwana bia Pasaka (3,000) kuuma ndîîthieene ciaawe.

⁸Atongeeria baawe kinya bo nî baaeejanîre into bibingî na gûciendera kîrî antû na kîrî athînjîri-Mûrungu na kîrî Alawi. Hilikia na Zekaria na Jehieli, barîa baarî arûngamîîri ba kîûrû kîa Mûrungu nî baaere athînjîri-Mûrungu tûtûrûme na tûbûri ngiri ijîîrî cia magana jatantatû (2,600), na ndeegwa magana jathatû (300) nîûntû bwa igongwana bia Pasaka.

⁹Konania na ataana ba ng'ina bobaîrî; Shemaia na Nethaneli, amwe na Hashabia na Jeieli na Jozabadi barîa baarî atongeeria ba Alawi nî baaere Alawi tûtûrûme na tûbûri ngiri ithaano (5,000) na ndeegwa magana jataano (500) cia igongwana bia Pasaka.

¹⁰Mambura jakûthiria kûthuranîrwa, athînjîri-Mûrungu nî baarûngamîre gûntû kwaao, nabo Alawi baraibanga kûringana na ikundi biaao ta ûrîa mûnene augîîte.

¹¹Barang'eera tûtûrûme twa Pasaka, nabo athînjîri-Mûrungu bakîminyaga tharike îrîa baanenkagîîrua, nabo Alawi bakîritaga mîgûûta.

¹²Bareeka igongwana bia gwakîîria mwanya nîkenda bigaanîrua antû kûringana na mîîrîga yaao nabo baritîra MWATHANI ta ûrîa kwaandîki yukuune rîa Musa. Ndeegwa nacio irathithua o ta u.

¹³ Baraakia tûtûrûme twa Pasaka na mwanki kûringana na ûrîa kwaathanîîtwe, nabio igongwana bia ûtheru barabiruga na nyongû na cuburia na tûraî biraikangîrua kîrîndî kîonthe na mpwîî.

¹⁴Baracoka barathuranîra igongwana biaao na bia athînjîri-Mûrungu nîûntû athînjîri-Mûrungu ba rûrîîjo rwa Aaroni nî baarî na ngûgî înene ya kûrita igongwana bia gwakîîria na mathuunya mwanka ûtukû. Tontû bûû, Alawi barathuranîra igongwana biaao na bia athînjîri-Mûrungu ba rûrîîjo rwa Aaroni.

¹⁵ Nabo aini barîa baarî ba rûrîîjo rwa Asafu, nî baarî kûrîa baabangîri nî Daudi na Asafu na Hemani na Jeduthuni kîroria kîa mûnene. Akaria ba mpingîro nabo baakari mpingîroone ciaao. Bau bateerûkagîra ngûgî ciaao nîûntû ataana ba ng'ina, Alawi, nî baathuranagîra igongwana nîûntû biaao.

¹⁶Tontû bûû, mambura ja MWATHANI nî jaathuranîrwe ntukû îîu; kîatho gîa Pasaka kîrathithua na igongwana bia gwakîîria biraritîrwa kîritîroone kîa igongwana kîa MWATHANI ta ûrîa mûnene Josia aathanîte.

¹⁷ Aisraeli barîa baarî o nî baarîîre Pasaka îgiita rîu na barathithia mambura ja mîgaate Îtiimbithîtue ntukû mûgwanja.

¹⁸Kuuma matukûûne ja kîroria Samueli, mambura ja Pasaka jataathithua ta ûu. Ningî gûtî mûnene wa Israeli ûûngî wathithia kîatho gîa Pasaka ja kîu Josia aathithîtie barî na athînjîri-Mûrungu na Alawi na antû ba Juda bonthe na ba Israeli na atûûri ba Jerusalemu.

¹⁹Pasaka îîu nayo yaathithîrue mwakeene jwa îkûmi na înaana Josia akwaa mûnene.

²⁰Josia akûthiria kûthuranîra kîûrû, Neko mûnene wa Misri nî eetîre kwithûkîra Karikemishi rûteere rwa rûûjî rwa Eufurate. Nawe Josia araumagara areeta kûrwaa nawe.

²¹Îndî Neko aratûmana kîrî Josia aramûûria atîrî, “Ga tûrî na îteta rîrîku naagwe itû gwe mûnene wa Juda? Tî gwe mbîjîte kwithûkîra îgiita rîrî, nî antû bangî tûrî na ndwaa nabo. Mûrungu nîwe ûmbîrîte mbîtange; tontû bûû tiga gûkararia Mûrungu nîûntû arî amwe naani, atîkeeje gûkûthiria.”

²²Îndî Josia ataatigana nawe, no kwigarûra aigarûrîre nîkenda barwaa. Ararega kûthikîîra ûrîa Neko augaga nî Mûrungu ûmwathîte, areeta kûrwîra nawe mûgwanthîîne jwa Megido.

²³Nabo asikarî barîa baatumagîra mîgwî bararatha mûnene Josia. Areera nthûûmba ciaawe atîrî, “Nditariteeni aja; ndîkûrathwa bûbûûî mono.”

²⁴Baramûrita ngaarîîne yaawe, baramwîkîra ngaarîîne îngî îrîa aarî nayo, na baramûania Jerusalemu, arakuîra ku. Nawe arathikwa mbîrîreene cia beethe, nabo antû ba Juda na ba Jerusalemu bonthe baraithikîîra nîûntû bwaawe.

²⁵Jeremia kinya we nî aatuungîre rwîmbo nîûntû bwa Josia, na aini ba arûme na aka nî batwîre kûgweta Josia ndwîmboone ciaao mwanka naarua. Ndwîmbo iu nî ciaeere mantû ja wîîthîre ndeene ya Israeli na nî ciaandîki yukuune rîa Ndwîmbo cia Kîrîro.

²⁶Mantû jangî jonthe ja waathani bwa Josia na ûrîa eetîkîtie MWATHANI na akaathîkagîra mawaatho jaawe na

²⁷ningî mathithio jaawe kuuma kîambîrîîria mwanka mûthia nî jaandîki yukuune rîa anene ba Israeli na Juda.