Read KIMERU BIBLE PROTESTANT EDITION 2Ma 36 Bible Online

2Ma 36 - KIMERU BIBLE PROTESTANT EDITION bible

2Ma 36

¹Antû ba Juda nî baathuurîre Jehoahazi, mûtaana wa Josia, na baramweethia mûnene Jerusalemu îthe agûkua.

²Jehoahazi aarî na ûkûrû bwa mîaka mîrongo îîrî na îthatû rîrîa aeere mûnene, nawe araathana arî Jerusalemu mîeri îthatû.

³Mûnene wa Misri nî aagarûrîre waathani bwa Jehoahazi kûu Jerusalemu na areetia Juda ûgoti bwa talanta îgana rîmwe cia fetha na talanta îmwe ya thaabu.

⁴ Aracoka araeethia Eliakimu, mûtaana wa ng'ina wa Jehoahazi, mûnene wa Juda na Jerusalemu. Aragarûra riîtwa rîa Eliakimu, aramwîta Jehoiakimu. Neko, mûnene wa Misri, arajûkia Jehoahazi, mûtaana wa ng'ina wa Eliakimu, areeta nawe Misri.

⁵ Jehoiakimu aarî na ûkûrû bwa mîaka mîrongo îîrî na îtaano rîrîa aeere mûnene, na araathana arî Jerusalemu mîaka îkûmi na jûmwe. Nî eeîîrie mbere ya MWATHANI Mûrungu waawe.

⁶ Nebukadineza mûnene wa Babiloni nî amwithûkîîre na aramwîkîra mpengû cia îturutia aramwikia Babiloni.

⁷Ningî Nebukadineza nî aajûkîrie into bimwe kuuma kîûrûûne kîa MWATHANI areeta nabio Babiloni arabiîka nyomba yaawe ya ûnene.

⁸Mantû jangî jegiî waathani bwa Jehoiakimu na mantû jamathûûku jarîa aathithîrie nî jaandîki yukuune rîa anene ba Israeli na Juda. Mûtaana waawe, Jehoiakini, araa mûnene.

⁹Jehoiakini aarî na ûkûrû bwa mîaka îkûmi na înaana rîrîa aeere mûnene. Nawe araathana arî Jerusalemu mîeri îthatû na ntukû îkûmi. Nawe nî eeyîîrie MWATHANI mono.

¹⁰ Kîambîrîîriene kîa mwaka, mûnene Nebukadineza nî aamûtûmanîîre, araikua Babiloni amwe na into bia goro kuuma kîûrûûne kîa MWATHANI. Araeethia Zedekia, muntwoo wa Jehoiakini, mûnene wa Juda na Jerusalemu.

¹¹ Zedekia aarî na ûkûrû bwa mîaka mîrongo îîrî na jûmwe rîrîa aeere mûnene. Nawe araathana arî Jerusalemu mîaka îkûmi na jûmwe.

¹²Nî eeyîîrie MWATHANI Mûrungu waawe mono na ataainyiiyia mbere ya kîroria Jeremia, ûrîa waaragia nteto cia MWATHANI.

¹³ Ningî nî aaregere kwathîkîra mûnene Nebukadineza ûrîa waamûciîtithîtie na riîtwa rîa Mûrungu, aragîa na rwikumio. Aaroomia nkoro yaawe na ararega kwathîkîra MWATHANI, Mûrungu wa Israeli.

¹⁴Atongeeria ba Juda, na athînjîri-Mûrungu na antû bonthe nî baathingatîre mantû ja wîîyia jarîa jaathithagua nî nthîgûrû irîa ciabathiûrûkîrîte. Baraaka rûko kîûrû kîrîa MWATHANI wengwa aatheretie kûu Jerusalemu.

¹⁵MWATHANI, Mûrungu wa biûjûjû biaao nî aabatûmagîra iroria biaawe magiita na magiita, nîûntû nî aaigagîîrua antû baawe kîaao amwe na kîûrû kîaawe.

¹⁶Îndî bo no kûthûmbia baathûmbagia iroria bia Mûrungu na kûmaria nteto ciaawe. Nî beetîre na mbere kûruma iroria biaawe mwanka MWATHANI arathûûra mono nîbo na kûraaga bwa kûthithia.

¹⁷ Aratûma mûnene wa Babiloni abaithûkîra na arooragîra nthaka ciaao na kîûrûûne, na atacaîîra noo mûthaka kana mwarî kana mûkûrû kana ntindiri kana barîa bataarî na inya. MWATHANI aabanenkanîre bonthe kîrî mûnene ûu.

¹⁸Nebukadineza nî aataîre into bionthe bia kîûrû kîa Mûrungu; bibinene na bibinini na mîthithû îrîa yeeki ku. Ningî arataa mîthithû ya mûnene na atongeria baawe. Into biu bionthe aataîre arabiikia Babiloni.

¹⁹ Ningî baraîthia kîûrû kîa Mûrungu na baramomoranga rûthingo rwa Jerusalemu. Baraîthia nyomba cia anene cionthe na bareenyangia into bia goro bionthe.

²⁰Barîa boonokîre kûûragwa nî aabathamîrie arabaikia Babiloni na baraa nkombo ciaawe na cia ataana baawe mwanka rîrîa kwagîîre na waathani bûngî bwa mûnene wa Parasia.

²¹ Gwaakarîre ûu nîkenda kiugo kîa MWATHANI kîrîa kîaarîîtue nî kîroria Jeremia kîûjûra. Nthîgûrû nî yaathîkîîre waatho bwa sabatû îgiita rîu rîonthe yeerûkîri, îranogoka, mwanka mîaka mîrongo mûgwanja îrathira.

²²Kûrî mwakeene jwa mbere jwa waathani bwa Koreshi, mûnene wa Parasia, MWATHANI nî oojûrîrie rûteto rûrîa eerîte kîroria Jeremia. Nî aaringithîrie Koreshi nkoro nawe araandîka barûga na aratûmana iikua nthîgûrû îrîa aathaga yonthe. Barûga îîu yaugaga ûjû:

²³ “Ûjû nîu Koreshi mûnene wa Parasia augîîte: ‘MWATHANI Mûrungu wa îgûrû nî aampethetie mûnene wa moonene jonthe ja nthîgûrû na nî ampeete ngûgî ya kûmwakîra kîûrû kûu Jerusalemu nthîgûrûûne ya Juda. Nandî buî bwinthe barîa bûrî antû ba MWATHANI Mûrungu, cokeeni nao, na MWATHANI arokara naabuî.’”